Փաստ ինֆո

Հանցավոր համագործակցության վերաբերյալ՝ Վահան Շիրխանյանի ու մյուսների գործով այսօրվա դատական նիստում ավարտվեց մեղադրական եզրակացության եզրափակիչ մասի երեք դատական նիստ տևած հրապարակումը: 

Գործով ամբաստանյալ Արթուր Վարդանյանի պաշտպան, փաստաբան Լևոն Բաղդասարյանը հրապարակման միջնամասում հայտարարություն-միջնորդություն արեց՝ նույն տեքստը քսան անգամ չհրապարակել, այլ նշել, որ միացյալ մեղադրական եզրակացությամբ մեղադրվում են այս ու այն մարդիկ: «Սա արդարադատություն չի: Ի վիճակի չենք նույն մեղադրական եզրակացությունը քսան անգամ լսել, հարգեք պետական միջոցները, խնայեք մեր ժամանակը»,- ասաց փաստաբանը: Ի պատասխան մեղադրողը հայտարարեց, որ մեղադրանքներում առանձին-առանձին կան անհատականացնող, իրարից տարբերվող ելակետային տվյալներ:

Մեղադրական եզրակացության՝ 120 էջ կազմող եզրափակիչ մասի հրապարակումից հետո բոլոր ամբաստանյալներն էլ հայտարարեցին, որ իրենց մեղավոր չեն ճանաչում:

Մասնավորապես, Արթուր Վարդանյանը հայտարարեց. «Ինչո՞ւ պետք է իշխանությունը յուրացնեմ կամ բռնազավթեմ, երբ իշխանությունն ինձ է պատկանում, այն միայն կարելի է ազատագրել»: Ամբաստանյալը պարզաբանեց, որ իշխանությունը հայ ազգին է պատկանում:

ՀՀ նախկին փոխվարչապետ և Պաշտպանության նախկին փոխնախարար, ամբաստանյալ Վահան Շիրխանյանը հայտարարեց, որ ինքը ոչ մի կապ չունի ընթերցվածի հետ: Ավելին, Վ.Շիրխանյանը որպես անգրագիտություն որակեց մեղադրական եզրակացությունը և որպես օրինակ հիշատակեց ինքնաթիռ խփելու մտադրության վերաբերյալ քննության վարկածը: Ո՞նց կարելի է մեկուկես կմ հեռավորությունից ՌՊԳ տեսակի հակատանկային նռնականետով ինքնաթիռ կամ որևէ այլ թիրախ խփել: Հիշեցնենք, որ ըստ մեղադրական եզրակացության, քննարկվել է նաև ՀՀ Նախագահի օդանավը թռիչքի պահին «Զվարթնոց» օդանավակայանի անմիջապես հարևանությամբ գտնվող Արևաշատ գյուղի տարածքից, որտեղ բնակվել է գործով ամբաստանյալ Հարություն Սարիբեկյանը, «ՌՊԳ» տեսակի հակատանկային նռնականետով կամ «ՊԿ» գնդացրով խոցելու հնարավորությունը, սակայն սպանության ուղղությամբ նախապատրաստական կոնկրետ գործողություններ չեն ձեռնարկվել և իրականացվել:

Այս վարկածի կապակցությամբ արձագանքեց նաև ամբաստանյալ Հարություն Սարիբեկյանը՝ «իմ տնից շատ հեռու է աէրոպորտի խոցելի հատվածը, իմ ինչի՞ն էր պետք խփել նախագահի ինքնաթիռը»:

Ամբաստանյալ Գառնիկ Մարգարյանը հայտարարեց, որ գործով ձեռք չեն բերվել ապացույցներ կամ փաստարկներ, հոդվածները արհեստածին են և իր նկատմամբ քաղաքական հետապնդում է իրականացվում երեսուն տարվա քաղաքական գործունեության պատճառով՝ իշխանությունում ու երկրում տիրող կոռուպցիայի և այլ հանգամանքների հետ կապված: Այդ մասին ինքը ապացույցներ կներկայացնի դատաքննության ժամանակ: «Ես կապ չունեմ հանցավոր խմբի հետ, հանցավոր խումբ չկա: Երիտասարդ երեխաներին բերել, փաթաթել են այս ծանր մեղադրանքները: Աբսուրդ է»,-ասաց նա:

Ամբաստանյալ Վլադիմիր Առաքելյանն իր հերթին հայտարարեց՝ զարմանում եմ՝ ո՞նց են փչած գործ սարքել: Իսկ ամբաստանյալ Խաչիկ Ավետիսյանն էլ արձագանքեց՝ զվարճալի կլիներ, եթե ճակատագրական չլիներ:

Ամբաստանյալ Արա Պողոսյանը հայտարարեց, որ պարտադրված ու շինծու ցուցմունքներ են, մեղադրական եզրակացությունը հիմնված է հակասությունների վրա:

Ամբաստանյալ Տիգրան Բոյաջյանը հայտարարեց՝ խնդրում եմ կարճել գործի վարույթը, հանցակազմ չկա, ինչին ամբաստանյալ Նելլի Մինասյանը հակադարձեց՝ բա ի՞նչ ես այդքան գրել:

Դատարանի կողմից որոշված ապացույցների հետազոտման հաջորդականության համաձայն, դատարանում նախ կհարցաքննվեն անջատված գործով 11 մեղադրյալները, ապա վկաները, կհետազոտվեն գործի գրավոր ապացույցները, վերջում ցանկության դեպքում ցուցմունքներ կտան ամբաստանյալները:

Մինչ այսօրվա նիստի սկսվելը դատարանը հրապարակեց «Երևան-Կենտրոն» քրեակատարողական հիմնարկի՝ դատարանին վերահասցեագրած գրությունը, որում դատարանը տեղյակ էր պահվում, որ ՔԿՀ-ին է դիմել փաստաբան Աննա Մարալյանը և խնդրել ՄԻԵԴ-ում Վ.Շիրխանյանի գանգատի քննության շրջանակում իրեն հնարավորություն տալ տեսակցել Վահան Շիրխանյանի հետ:

Իր հերթին Վ.Շիրխանյանի պաշտպան Հայկ Ալումյանը հայտարարեց, որ Աննա Մարալյանը ՔԿՀ-ին ներկայացրել է համապատասխան փաստաթղթեր, որպեսզի ինքը որպես ՄԻԵԴ-ում Վ.Շիրխանյանի ներկայացուցիչ կարողանա տեսակցել իր վստահորդի հետ:

Դատարանը հայտնեց, որ ինքը պատասխան գրություն կուղարկի ՔԿՀ-ին:

Աղբյուր` Փաստինֆո