Փաստ ինֆո

ՀՀ կառավարությունը հավանություն տվեց «Հայաստանի ներդրողների ակումբ» փակ ոչ հրապարակային պայմանագրային ներդրումային ֆոնդի հետ Լոռու մարզում 76 ՄՎտ դրվածքային հզորությամբ «Շնող» հիդրոէլեկտրակայանի նախագծման, կառուցապատման, ֆինանսավորման, կառուցման, սեփականության իրավունքով տնօրինման, տիրապետման, շահագործման մասին շրջանակային համաձայնագրի ստորագրման որոշման նախագծին:

Ինչպես հաղորդում է «Արմենպրես»-ը, ՀՀ էներգետիկ ենթակառուցվածքների և բնական պաշարների նախարար Աշոտ Մանուկյանը նշեց, որ ծրագրի իրականացման նպատակով ՀՀ կառավարության և նշված ֆոնդի միջև 2017թ. ապրիլի 13-ին ստորագրվել է փոխըմբռնման հուշագիր: Ֆոնդը փոխըմբռնման հուշագրի դրույթներով դիմել է ՀՀ կառավարությանը՝ ծրագիրն իրականացնելու առաջարկով և դրա համար անհրաժեշտ ֆինանսական miջոցներ ներգրավելու նախաձեռնությամբ:

«Որոշման ընդունումը բխում է կառավարության ծրագրից, որի նպատակն է հասնել էներգետիկ անվտանգության ամրապնդմանը: Հայտնի է, որ Դեբեդ և Արաքս գետերի ջրային ռեսուրսները mnում են թերօգտագործված, այս ներդրումային ծրագիրը նպատակ ունի մասամբ լրացնել այդ բացը: Ծրագիրը կիրականացվի պետություն- մասնավոր համագործակցության շրջանակում: Այն քննարկվել է վաղուց և «Հայաստանի ներդրողների ակումբ»-ի առաջին խոշոր ծրագիրն է, որը քննարկվել է ֆոնդի ստեղծման առաջին իսկ օրվանից՝ բավականին մանրակրկիտ»,- «Արմենպրես»- ի փոխանցմամբ, ասաց Մանուկյանը՝ ավելացնելով, որ ծրագիրը համապատասխանում է բնապահպանական կազմակերպություններին ներկայացվող չափորոշիչներին:

Ծրագրի շրջանակում ներդրումային ֆոնդը համագործակցելու է արևմտյան մասնագիտացված ընկերությունների հետ: Ծրագրի ներդրումային արժեքը գնահատվում է 150-180 մլն դոլար, սակայն այն կարող է լրացուցիչ ճշգրտվել:

«ՀԷԿ-ն իրենից կներկայացնի ժամանակակից բարդ ինժերենական կառույց, որը ՀԷԿ-ը կդարձնեն ժամանակակից սարքավորումներով հագեցած և բնապահպանական տեսանկյունից հնարավորինս անվտանգ: ՀԷԿ-ը կարտադրի էլեկտրաէներգիայի մեր երկրի ներքին սպառման հինգ տոկոսը: Այս ՀԷԿ-ի կառուցման և արդեն իսկ տրված լիցենզիաների շրջանակում փոքր ՀԷԿ-երի կառուցման արդյունքում մեր երկրի ներքին ռեսուրսներով արտադրվող էլեկտրաէներգիայի տեսակարար կշիռը կմոտենա 50 տոկոսի: 10 տարի առաջ նույնը ցուցանիշը հասնում էր 18-20 տոկոսի»,- ընդգծեց Աշոտ Մանուկյանը՝ ավելացնելով, որ ՀԷԿ-ը կառուցվում է առաջիկա 100-ամյակի համար:

Ծրագրի վերաբերյալ ստացվել է 500-ից ավելի դիտողություն և առաջարկություն, որոնց հիմնական մասն ընդունվել է:

Անդրադառնալով հարցին՝ ՀՀ վարչապետ Կարեն Կարապետյանը նշեց, որ ներկայացվել է լավ և հեռանկարային ծրագիր: Նախատեսվում է, որ ՀՀ կառավարությունը կաջակցի կառուցապատողին ձեռք բերել հողատարածք՝ ՀԷԿ-ի կառուցման համար: Կառուցապատողը պարտավորվում է կառուցել ՀԷԿ-ը:

Կայանի կոմերցիոն շահագործման ամսաթվից 20 տարուց ոչ պակաս ժամանակահատվածում ՀՀ կառավարությունը երաշխավորելու է «Հայաստանի էլեկտրական ցանցեր» ՓԲԸ-ի կողﬕց տարեկան 500 մլն կՎտժ էլեկտրաէներգիայի գնում:

Հայաստանի Հանրապետության վարչապետ Կարեն Կարապետյանի և Ռուսաստանի Դաշնության հայկական սփյուռքի 3 տասնյակից ավելի գործարարների մասնակցությամբ «Հայաստանի ներդրողների ակումբ» ոչ հրապարակային պայմանագրային ներդրումային ֆոնդի գործունեության մեկնարկը տրվել է 2017 թվականի մարտի 25-ին: 2017 թ. հունվարի 25-ին ռուսաստանաբնակ հայազգի գործարար շրջանակների ներկայացուցիչները հայտարարություն էին տարածել՝ Հայաստանում խորը բարեփոխումներ անցկացնելու գործընթացին աջակցելու և ՀՀ կառավարության հետ համատեղ նախաձեռնություններին և բիզնես-ծրագրերին մասնակցելու վերաբերյալ։

Աղբյուր` Փաստինֆո