Փաստ ինֆո

Փաստաբան Նիկոլայ Բաղդասարյանը դիմել է Արդարադատության խորհրդին՝ Երևանի Կենտրոն և Նորք-Մարաշ վարչական շրջանների ընդհանուր իրավասության դատարանի դատավոր Արմեն Բեկթաշյանին կարգապահական պատասխանատվության ենթարկելու պահանջով` դատավորի վարքագծի կանոնների պարբերաբար և կոպիտ խախտման համար:

Փաստաբանն ԱԽ է դիմել Վլադիսլավ Մանգասարյանի վերաբերյալ առանձնապես խոշոր չափերի խարդախության աղմկահարույց գործի շրջանակներում՝ որպես տուժողներ Էդմոնդ Խուդյանի, Նունե Սահակյանի, Արմեն Բագիրովի, Մարիամ Մնացականյանի և Րաֆի Սիրաքիի ներկայացուցիչ:

Փաստաբանը, մասնավորապես, նշում է, որ հիշյալ քրեական գործի շրջանակներում արդարադատություն իրականացնելիս դատավոր Արմեն Բեկթաշյանը պարբերաբար թույլ է տալիս դատավորի վարքագծի կանոնների խախտումներ, որի հետևանքով իր վստահորդների մոտ առաջացել են անվստահություն և կասկածներ արդարադատության արդյունավետության նկատմամբ, ուստի փաստաբանը գտնում է, որ Արդարադատության խորհուրդը պետք է օրենքով իրեն վերապահված իրավասությունների շրջանակներում միջամտի սույն դատավորի գործունեությանը և նրա նկատմամբ կիրառի կարգապահական պատասխանատվության միջոցներ:

Որպես ասվածի հիմնավորում Նիկոլայ Բաղդասարանը նշում է, որ քրեական գործը դատական քննության է նշանակվել 05.12.2016թ.-ին և այդ ժամանակից մինչև այժմ` այս մի քանի ամիսների ընթացքում նշանակված դատական նիստերից 4-ը չեն կայացել` նախագահող դատավորի մեկ այլ գործով խորհրդակցական սենյակում գտնվելու պատճառաբանությամբ: Մասնավորապես չեն կայացել և հետաձգվել են 28.03.2017թ.-ին, 19.04.2017թ.-ին և 21.06.2017թ.-ին նշանակված դատական նիստերը, ընդ որում 21.06.2017թ.-ի նիստի հետաձգումից հետո 19.07.2017թ. նշանակված դատական նիստը ևս չի կայացել:

ՀՀ Սահմանադրության, Մարդու իրավունքների և հիմնարար ազատությունների պաշտպանության մասին եվրոպական կոնվենցիայի, ՀՀ քրեական դատավարության և Դատական օրենսգրքերի, Հայաստանի Հանրապետության դատավորի վարքագծի կանոնների իրավական նորմերի համակարգային վերլուծությունից և փաստերի համադրումից հետևում է, որ դատավոր Արմեն Բեկթաշյանը, ունենալով օրենսդրությամբ հստակ ամրագրված պարտավորություն գործի քննությունն իրականացնելու ողջամիտ ժամկետներում, նշանակված դատական նիստերը պարբերաբար չի անցկացնում` դրանով իսկ կոպտորեն խախտելով օրենքի և դատավորի վարքագծի կանոնների պահանջները:

Դատավորը խախտել է էթիկայի կանոնները՝ պաշտպան Ալումյանը պատրաստվում է դիմել ԱԽ

Փաստաբանն ակնկալում է, որ ՀՀ արդարադատության խորհուրդը կիրացնի ՀՀ օրենսդրությամբ իրեն վերապահված լիազորությունները և կարգապահական պատասխանատվության միջոցներ կկիրառի Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության դատարանի դատավոր Արմեն Բեկթաշյանի նկատմամբ, քանի որ նման միջոցների չկիրառումը անխուսափելիորեն հանգեցնելու է արդարադատության արդյունավետության նկատմամբ անվստահության, ինչ էլ իր հերթին հեղանակազրկելու է ՀՀ դատական համակարգը:

Նիկոլայ Բաղդասարյանը նույնաբովանդակ դիմում է հղել նաև ՀՀ արդարադատության նախարար Դավիթ Հարությունյանին:

Նշենք նաև, որ ավելի վաղ նույն դատավորի՝ Արմեն Բեկթաշյանի, կողմից էթիկայի կանոնների խախտման հիմքով նրա նկատմամբ կարգապահական վարույթ հարուցելու խնդրանքով ՀՀ դատավորների ընդհանուր ժողովի էթիկայի և կարգապահական հարցերի հանձնաժողովին ու ՀՀ արդարադատության նախարարությանն է դիմել ՀՀ նախկին փոխվարչապետ ու Պաշտպանության նախկին փոխնախարար Վահան Շիրխանյանի պաշտպան, փաստաբան Հայկ Ալումյանը: «Փաստինֆո»-ի հետ զրույցում Հ.Ալումյանը հայտնեց, որ դեռևս իր դիմումներին չեն պատասխանել:

Աղբյուր` Փաստինֆո