Փաստ ինֆո

«ԱրմենՏել»-ի տեխնիկական բլոկի նախկին տնօրեն Վլադիմիր Սաչկովը բողոք է հղել ՀՀ արդարադատության նախարար Դավիթ Հարությունյանին ու ՀՀ դատական դեպարտամենտի ղեկավար Կարեն Փոլադյանին՝ իր գործը քննող դատավոր Արմեն Բեկթաշյանի դեմ: Այս մասին «Փաստինֆո»-ի լրագրողին հայտնեց «ԱրմենՏել»-ի հաշվարկային համակարգը շրջանցելով միջազգային մուտքային հեռախոսազանգերի այլընտրանքային կապուղիների գործով ամբաստանյալ Վլադիմիր Սաչկովի պաշտպան, փաստաբան Նարինե Ռշտունին:

Վ.Սաչկովը բողոքում խնդրում է միջոցներ ձեռնարկել ողջամիտ ժամկետում արդար դատաքննության իր իրավունքի խախտումը վերացնելու ուղղությամբ՝ ընդհուպ մինչև Կենտրոն և Նորք-Մարաշ վարչական շրջանների դատավոր Ա.Բեկթաշյանին կարգապահական պատասխանատվության ենթարկելը: Ըստ ամբաստանյալի, դատավորը դիտավորյալ կամ կոպիտ անփութությամբ թույլ է տալիս դատավարական նորմերի ակնհայտ խախտում:

Երեք տարուց ավելի անազատության մեջ գտնվող Վ.Սաչկովը նշում է, որ գործը դատավոր Արմեն Բեկթաշյանի վարույթ է ընդունվել 27.11.2015թ., 21.12.2015թ. նշանակվել էր գործով առաջին դատական նիստը, որը տեղի չի ունեցել դատավորի՝ այլ դատական գործով զբաղվածության պատճառով: Դրանից ի վեր նշանակվել է 51 դատական նիստ, որոնցից ռեալ կերպով տեղի է ունեցել ընդամենը 19-ը:

Բացի այդ, ըստ ամբաստանյալի, դատավորը բազմիցս մտացածին պատճառներով ձգձգել է խափանման միջոցը փոխելու մասին պաշտպանության կողմի միջնորդությունների քննությունը:
Ամբաստանյալն ընդգծում է, որ ողջամիտ ժամկետում արդար դատաքննության իրավունքն ամրագրված է միջազգային՝ Քաղաքացիական ու քաղաքական իրավունքների միջազգային դաշնագիր, Մարդու իրավունքների եվրոպական կոնվենցիա, փաստաթղթերի, ինչպես նաև Հայաստանի օրենսդրությունում՝ Քրեական դատավարության և Դատական օրենսգրքերի իրավանորմերում:

Տվյալ դեպքում ոչ մի դատական նիստ չի հետաձգվել պաշտպանական կողմի մեղքով: Բոլոր չկայացած դատական նիստերը հետաձգվել են «կոմպետենտ իշխանությունների գործողությունների արդյունքում»: Եվ եթե դատախազի չներկայանալը, դատավարության մասնակիցների՝ թարգմանիչ, վկաներ և այլն, ներկայանալը ապահովելու անհնարինությունը կամ դատարանի ոչ բավարար ջանքեր գործադրելը ամեն դեպքում պետության մեղքն է, ապա դատական նիստի հետաձգումն այն պատճառով, որ դատավորը նիստ նշանակելով արձակուրդ է գնացել, չի ավարտել նախորդ դատական նիստը կամ գտնվում է խորհրդակցական սենյակում՝ դատավորի անբարեխիղճ աշխատանքի արդյունքն է, ով անընդունակ է ռացիոնալ կազմակերպել դատարանի աշխատանքը և դրանով իսկ անմիջականորեն խախտում է երեք տարուց ավելի անազատության մեջ գտնվող ամբաստանյալի ողջամիտ ժամկետում արդար դատաքննության իրավունքը:

Իսկ Վ.Սաչկովի կինը՝ Եկատերինա Ազյոման, դիմել է Հայաստանի Հանրապետության Ազգային Ժողովի Նախագահ Արա Բաբլոյանին: Դիմումում նա նշում է, որ չորրորդ տարին է, ինչ իր ամուսինը գտնվում է բանտում, առանց դատարանի կողմից մեղքի ապացուցման:

««Նուբարաշեն» ՔԿՀ պայմանները քիչ են տարբերվում միջնադարյաններից: Հիմա այնտեղ չկան զբոսանքներ: Արևի, լիարժեք սննդի և քնի բացակայության պատճառով իմ ամուսնու առողջական վիճակը արագորեն վատանում է:
Ես չեմ խնդրում Ձեզ հանդես գալ որպես երաշխավոր: Դա անօգուտ է, քանի որ մինչև դատարանի որոշումը կալանքի տակ պահելը, դա անխախտելի կարգ է և մեղադրյալի վրա ճնշման որոշակի ձև»,- նշում է ամբաստանյալի կինը:

Անդրադառնալով ողջամիտ ժամկետում գործը քննելուն ուղղված դատարանի ոչ բավարար կազմակերպչական աշխատանքին, Ե.Ազյոման նշում է. «Ես չեմ նշում դատավորի ազգանունը, դա նշանակություն չունի: Սա համակարգի խնդիր է: Երբ նիստ չանցկացնելու հնարավորությունը օգտագործվում է անպատիժ կերպով: Ես չեմ հավատում այդպիսի դատարանի արդարությանը: Դատավճիռը չի լինի արդար, այլ կլինի դատարանի անգործությունը արդարացնող»:

Չորրորդ տարին է, ինչ իր ամուսինը չի կարողանում դատարանում ներկայացնել իր անմեղության ապացույցները, հրավիրել իր վկաներին: Եվ ինչպե՛ս հրավիրել վկաներ, եթե երբեք նախապես հայտնի չէ, կլինի՞ նիստ, թե՞ ոչ, նշում է Վլադիմիր Սաչկովի կինը:

Լուսանկարը՝ Hetq.am-ի

Աղբյուր` Փաստինֆո