Փաստ ինֆո

33-ամյա Քեթրին Քոքսն ու 25-ամյա Դեննի Շեփերդը Քենթից մեղավոր են ճանաչվել չորս ամսական Էլի Քոքսի սպանության մեջ: Երեխան մահացել է գլխի վնասվածքի ու 28 կոտրվածքի հետևանքով: Բացի այդ, նրա արյան մեջ հայտնաբերվել են թմրանյութեր, ըստ life.ru-ի, հաղորդում է Daily Mail-ը:

Երեխայի մայր Քեթրին Քոքսն արդեն ունի 12 դատվածություն 20 տարբեր հանցագործությունների համար, ներառյալ՝ դիտավորյալ մարմնական վնասվածքներ հասցնելը, փականը կոտրելով գողություն և գողություն խանութներում: 2016թ. ապրիլի 13-ին նա շտապօգնություն է կանչել «հիվանդացած» Էլիի համար, իսկ երկու շաբաթ անց նա մահացել է հիվանդանոցում:

Փորձագետները հաստատել են, որ մահվան պահին տղայի գլխուղեղը ուժեղ վնասված էր. առավել հավանական է, որ նա մի քանի ուղեղի ցնցում է տարել: Չորսամսական փոքրիկի կոտրվածքների քանակից դատելով՝ նա պարբերաբար ծեծի է ենթարկվել: Բացի այդ, երեխայի արյան մեջ հայտնաբերվել են թմրանյութեր՝ կոկաին ու ամֆեթամին:

Ե՛վ Քոքսը, և՛ Շեփերդը մինչև վերջ հերքում էին երեխայի սպանության մեղադրանքները, սակայն երդվյալների դատարանը միաձայն նրանց մեղավոր է ճանաչել: Այժմ մարդասպանների նկատմամբ կանցկացվի դատահոգեբուժական փորձաքննություն, որից հետո դատարանը նրանց նկատմամբ պատիժ կնշանակի:

«Մեզնից ոչ ոք երբեք չի հասկանա, թե ինչն է ստիպում մարդկանց վնաս պատճառել երեխաներին: Ցավոք, պետք է ընդունել, որ Էլին ավելի ուժեղ է տառապել, քան մարդկանց մեծամասնությունը, և զրկվել կյանքից նախքան այն հասցրել է սկսվել»:

Աղբյուր` Փաստինֆո