Փաստ ինֆո

2016թ. ձմեռային (2016 թ. դեկտեմբեր-2017 թ. փետրվար) եւ 2017 թ. ամառային (2017 թ. մայիս-հուլիս)  զորակոչերին ՀՔԱ Վանաձորի  գրասենյակ դիմած 50 զորակոչիկներից 42-ի խնդիրը կապված է եղել ոչ պատշաճ բժշկական զննության իրականացման և առողջական վիճակի վերաբերյալ բժշկական եզրակացության հետ համաձայն չլինելու հետ:  Այս մասին հայտնում է ՀՔԱ Վանաձորի գրասենյակը:

Դիմած զորակոչիկների առողջական վիճակի վերաբերյալ բժշկական փաստաթղթերն ուսումնասիրվել են կազմակերպության բժիշկ–փորձագետի կողմից, որի արդյունքների հիման վրա կազմակերպության կողմից ուղարկվել է 18 գրություն ՀՀ պաշտպանության նախարարությանը, 1-ը ՀՀ առողջապահության նախարարությանը: Բացի դրանից՝ 1-ական գրություն ուղարկվել է ՀՀ Կենտրոնական բժշկական հանձնաժողով եւ Վանաձորի զինկոմիսարիատ:

4 զորակոչիկ դիմել է  քաղաքացիության հարցի վերաբերյալ պարզաբանումներ ստանալու համար, 2 հոգի՝ «Զինապարտության մասին» ՀՀ օրենքով սահմանված տարկետման և ազատման հիմքերի /ընտանեկան դրության բերումով, առողջական վիճակի պատճառով եւ ուսումը շարունակելու համար/, ինչպես նաև օրենքով սահմանված իրենց իրավունքների վերաբերյալ խորհրդատվություն և պարզաբանումներ ստանալու համար, 1-ական հոգի բնակության վայրին մոտ ծառայելու եւ սահմանված կարգի խախտմամբ խուսափելու հետ կապված հարցի վերաբերյալ պարզաբանում ստանալու համար:

Գրավոր ընթացակարգով իրավական աջակցության արդյունքում 4 հոգու տրամադրվել է տարկետում մինչեւ 1 տարի ժամանակով, իսկ 3 հոգի  ճանաչվել է ժամանակավորապես ոչ պիտանի զինվորական ծառայության համար, որոնցից 1-ի նկատմամբ հարուցվել էր քրեական գործ՝ զինվորական ծառայությունից խուսափելու հիմքով։

Լուսանկարը՝ ֆոտոլուրի

Աղբյուր` Փաստինֆո