Փաստ ինֆո

Արամ Մանուկյանի և մյուսների վերաբերյալ «Սասնա Ծռեր-2»-ի գործով այսօրվա դատական նիստում դատարանը մերժեց ամբաստանյալ Թորոս Թորոսյանի պաշտպան Լիպարիտ Սիմոնյանի միջնորդությունը՝ դահլիճից հեռացված իր պաշտպանյալին դահլիճ վերադարձնելու մասին:

Պաշտպանը նշեց, որ «դատավարական ժամ» հասկացությունը, որի վրա հղում է կատարում դատարանն, ընդամենը սանկցիայի ժամկետի հաշվարկման վերաբերյալ դատավորի կարծիքն է և չի բխում օրենքից: Թորոս Թորոսյանը ցանկություն ունի լիարժեք մասնակցել դատավարությանը, ուստի նրա մասնակցությունը դատական նիստին պարտադիր է, նշեց Լ.Սիմոնյանը:

Փաստաբանի միջնորդությանը միացան գործով այլ պաշտպաններ ևս՝ իրենց հերթին միջնորդելով դատարանի դահլիճ վերադարձնել դահլիճից հեռացված իրենց պաշտպանյալներին:

Դատարանի որոշման դեմ, ի նշան բողոքի, ամբաստանյալ Արամ Մանուկյանը հայտարարեց, որ ինքը հեռանում է դատարանի դահլիճից՝ ի պատասխան դատարանը նրա նկատմամբ դատական սանկցիա կիրառեց՝ 10 ժամով դատական նիստերի դահլիճից հեռացում:

Ամբաստանյալ Հովհաննես Հարությունյանը հայտարարեց, որ ինքը ինքնաբացարկի միջնորդություն ունի, ինչը նրան թույլ չտրվեց անել և նրան հրելով հեռացրեցին դատական նիստերի դահլիճից:

Կրքերը բորբոքվել էին ոչ միայն նիստերի դահլիճում, այլև դահլիճի՝ դատավարության մասնակիցներից ապակիով սահմանազատված հատվածում, որտեղ գտնվում են ամբաստանյալների հարազատներն ու համակիրները:

Ներկա պահին դատական նիստն ընդմիջված է:

Աղբյուր` Փաստինֆո