Փաստ ինֆո

Պավել Մանուկյանի և մյուսների վերաբերյալ «Սասնա Ծռեր»-ի գործով այսօրվա դատական նիստում առաջ քաշվող խնդիրները նույնն էին՝ դատական կարգադրիչների կողմից փաստաբանի խուզարկություն, պաշտպանների բացակայություն, դատարանի դահլիճից հեռացվելու ժամկետի հաշվարկ:

Այսպես, պաշտպան Արայիկ Պապիկյանն այսօրվա նիստում հայտարարեց, որ ինքը օրենքի խախտմամբ՝ դատական կարգադրիչների կողմից խուզարկվել է:

Քննության առարկա դարձավ նաև պաշտպանների բացակայության հարցը: Մասնավորապես, դատարանը հայտնեց, որ ամբաստանյալ Սմբատ Բարսեղյանի պաշտպան, փաստաբան Հայկ Ալումյանը 7-րդ նիստն է բացակայում է դատական նիստից: Գրությամբ պաշտպանը դատարանին տեղեկացրել է, որ մի քանի դատական նիստեր ունի տարբեր դատարաններում, ուստի զբաղվածության պատճառով չի կարող ներկայանալ դատական նիստին:

Դատարանը նաև հայտարարեց, որ Հայկ Ալումյանը գործով անցկացված յոթ նիստից միայն մեկին է ներկայացել, սակայն այդ նիստի ժամանակ էլ դատարանի դահլիճ չի մտել:

Դատարանն արձանագրեց, որ դատական նիստերի դահլիճից հեռացվելու սանկցիայի ենթարկված Սմբատ Բարսեղյանի համար պաշտպանի մասնակցությունը պարտադիր է, ուստի դատարանը դիմել է Հանրային պաշտպանի գրասենյակին՝ հանրային պաշտպան նշանակելու խնդրանքով:

Ժամանակավորապես դատարանի դահլիճ ներկայացված Սմբատ Բարսեղյանը հայտարարեց, որ իր շահերը պաշտպանում է միայն Հայկ Ալումյանը, եթե նա չի ներկայացել դատական նիստին, ինքն այդտեղ որևիցե խնդիր չի տեսնում: Ամբաստանյալը հայտարարեց, որ ինքը ցանկություն չունի այլ պաշտպան ունենալ:

Դատարան ներկայացած հանրային պաշտպան Արմինե Ֆանյանը, ով այս գործի շրջանակում պաշտպանում է նաև ամբաստանյալ Արմեն Բիլյանի շահերը, հայտարարեց, որ ինքը չի կարող ստանձնել Սմբատ Բարսեղյանի պաշտպանությունը, քանի որ վերջինս ցանկանում է, որ իր պաշտպանությունն իրականացնի Հայկ Ալումյանը:

Պաշտպան Արա Զաքարյանն էլ իր հերթին կոչ արեց դատարանին չանել այնպիսի գործողություններ, որոնք հակասում են օրենսդրությանը:
Այդուհանդերձ դատարանը Արմինե Ֆանյանին ներգրավեց որպես Սմբատ Բարսեղյանի պաշտպան, ինչին հետևեց վերջինիս արձագանքը՝ անօրինականություն եք թույլ տալիս և դեռ դատարանի հանդեպ հարգալից վերաբերմունք եք պահանջում:
Դատարանի որոշմանը արձագանքեց նաև հանրային պաշտպան Արմինե Ֆանյանը՝ նա նկատեց, որ ինքը չի կարողանալու պաշտպանության մարտավարություն քննարկել Սմբատ Բարսեղյանի հետ, քանի որ նա իրեն չի ընդունելու որպես իր պաշտպան: «Չեմ կարող տեխնիկապես և իրավաբանորեն»,- ասաց Արմինե Ֆանյանն՝ ընդգծելով, որ հանրային և պայմանագրային պաշտպանները չեն կարող համատեղ պաշտպանություն իրականացնել՝ օրենքի ուժով:

Պաշտպանական կողմը բարձրացրեց նաև, սանկցիայի ժամկետի հաշվարկի հարցը: Մասնավորապես, կարծիք հնչեց, որ սանկցիայի հաշվարկի մեջ պետք է ներառել ոչ միայն դատական նիստերի ժամանակը, այլև դատարանի՝ խորհրդակցական սենյակում գտնվելու ժամանակը՝ չէ՞ որ դատարանը խորհրդակցական սենյակ է հեռանում աշխատելու:

Դատարանը հորդորեց պաշտպաններին «Սասնա Ծռեր»-ի գործի նիստերի հետ նույն օրը նշանակված այլ նիստերը հետաձգել՝ երբ որ սույն գործով դատարանում սկսվի դատաքննության փուլը, անգամ մեկ պաշտպանի բացակայության պարագայում դատական նիստերը հետաձգվելու են:

Դատարանը տեղեկացրեց կողմերին, որ այսօրվա նիստից հետո դատական նիստը հետաձգվելու է 15 աշխատանքային օրով՝ դատարանում արձակուրդային սեզոնը սկսվելու կապակցությամբ:

Աղբյուր` Փաստինֆո