Փաստ ինֆո

Երևանի քաղաքապետարանին պատկանող «Կենտրոն Մաքրություն» փակ բաժնետիրական ընկերությունում կեղծ հավաքարարների անվան առանձնապես խոշոր չափերի հափշտակությունների գործով այսօրվա դատական նիստում մեղադրող Հակոբ Մելքոնյանը մեղադրական ճառով հանդես եկավ:

Մեղադրողը հիմնավորված համարեց մեղադրանքը, ինչպես նաև գործով 13 ամբաստանյալների առնչությամբ կազմակերպված խմբի իրավական բնորոշումը: Քրեաիրավական գնահատականները ճիշտ են, նշեց մեղադրողը:

Վերլուծելով գործով ձեռք բերված ապացույցները՝ մեղադրողը եզրահանգեց, որ հափշտակվել են իրականում չաշխատող անձանց անուններով և գոյություն չունեցող փողոցների մաքրման դիմաց գումարները:

Մեղադրողը միջնորդեց 02.04.2007թ. ապրիլից մինչև 2013թ. սեպտեմբերի ամիսը Երևանի քաղաքապետարանի «Կենտրոն մաքրություն» ՓԲԸ-ի տնօրենի, ինչպես նաև ինժեների պաշտոնները զբաղեցրած Արթուր Հովհաննիսյանին դատապարտել 9 տարվա ազատազրկման: Նրա եղբորը՝ Սամվել Հովհաննիսյանին, ով նույնպես զբաղեցրել է հիշյալ՝ տնօրենի և ինժեների պաշտոնները, մեղադրողը միջնորդեց դատապարտել 6 տարվա ազատազրկման, պատժին հաշվեցկել նրա կրած մեկ տարվա կալանքը, թողնել կրելու հինգ տարվա ազատազրկում և պատիժը պայմանականորեն չկիրառել:

Մեղադրողը միջնորդեց նաև 2003-2013 թվականներին ընկերության փոխտնօրենի պաշտոնը զբաղեցրած Արմեն Խաչատրյանին և 2004 թվականից ընկերության գլխավոր հաշվապահի պաշտոնը զբաղեցրած Գագիկ Հարությունյանին դատապարտել հինգ տարվա պայմանական ազատազրկման:

Մնացած ամբաստանյալների վերաբերյալ մեղադրողը միջնորդեց նրանց դատապարտել ազատազրկման ամենանվազը 9 ամսվա, ամենաառավելը՝ 6 տարվա ժամկետով:

Մեղադրողը միջնորդեց նաև ամբողջությամբ բավարարել պատճառված 375 մլն դրամի վնասի հատուցման վերաբերյալ քաղաքացիական հայցը:
Հաջորդ դատական նիստում, որը տեղի կունենա արդեն սեպտեմբերին, ճառերով հանդես կգա պաշտպանական կողմը:

Աղբյուր` Փաստինֆո