Փաստ ինֆո

Երևանի քաղաքապետարանում տեղի ունեցած աշխատանքային  խորհրդակցության ժամանակ զեկուցվել է, որ մայրաքաղաքի բոլոր վարչական շրջաններում բնակչության և անչափահասների շրջանում պարբերաբար բացատրական աշխատանքներ են տարվում արհեստական ջրավազաններում լողալու դեպքերը բացառելու նպատակով: Զեկուցվել է, որ ջրավազանների հարակից տարածքներում տեղադրված են նաև համապատասխան իրազեկող ցուցանակներ և արգելող նշաններ:

Աշխատակազմի համապատասխան վարչություններին և վարչական շրջանների ղեկավարներին հանձնարարվել է շարունակել այս ուղղությամբ հսկողությունն ու Ոստիկանության Երևան քաղաքի վարչության հետ համատեղ խստորեն վերահսկել ու բացառել մասնավորապես ջրավազաններում կենդանիներին լողացնելու դեպքերը:

Զեկուցվել է, որ քաղաքապետարանի ծրագրերով մայրաքաղաքում սահմանված ժամանակացույցով շարունակվում են  փոսանորոգման և փողոցների մայթերի վնասված սալիկների վերականգնման աշխատանքները: Հանձնարարվել է շարունակել գործընթացը՝ հետևողական ուշադրություն դարձնելով աշխատանքների ինչպես որակին, այնպես էլ սահմանված ժամանակացույցի պահպանմանը:

Անդրադառնալով ընթացիկ աշխատանքներին` զեկուցվել է, որ մայրաքաղաքում շարունակվում է ամենօրյա հսկողությունը` ապօրինի շինարարությունների և հողազավթումների կանխման, բացօթյա ապօրինի առևտրի կանխարգելման, չնախատեսված վայրերում աղբ թափելու դեպքերը հայտնաբերելու նպատակով:

Զեկուցվել է նաև, որ սահմանված ժամանակացուցով  շարունակվում են բազմաբնակարան բնակելի շենքերի մուտքերի, տանիքների վերանորոգման, ինչպես նաև ընդհանուր օգտագործման գույքի վնասված հատվածների վերականգնման աշխատանքները:  Պատասխանատուներին և վարչական շրջանների ղեկավարներին հանձնարարվել է շարունակել բոլոր ուղղություններով հետևողական  հսկողությունը:

Աշխատանքային խորհրդակցության ավարտին աշխատակազմի բնապահպանության, կրթության, մշակույթի վարչություններին, ինչպես նաև վարչական շրջանների ղեկավարներին հանձնարարվել է գույքագրել հանրակրթական դպրոցների, նախակրթական  և արտադպրոցական հաստատությունների հարակից այն տարածքները, որտեղ կա ոռոգման ցանցի անցկացման անհրաժեշտություն, և դրա հիման վրա նախապատրաստել ու ներկայացնել համապատասխան առաջարկություն՝ խնդրի լուծումը հաջորդ տարվա ծրագրում ներառելու նպատակով:Այս մասին տեղեկացանք՝ Երևանի քաղաքապետարանի տեղեկատվության
և հասարակայնության հետ կապերի վարչությունից:

Աղբյուր` Փաստինֆո