Փաստ ինֆո

Դատարանը մեղադրական դատավճիռ է կայացրել անցյալ տարվա հուլիսին «news.am» լրատվական կայքի լրագրողի նկատմամբ բռնության գործով:

 Մասնավորապես, ամբաստանյալ Գոռ Խաչատրյանը մեղավոր է ճանաչվել ՀՀ քրեական օրենսգրքի 164-րդ  հոդվածի 1-ին մասով՝ Լրագրողի մասնագիտական օրինական գործունեությանը խոչընդոտելը,  և 185-րդ հոդվածի 1-ին մասով՝ Գույքը դիտավորությամբ ոչնչացնելը կամ վնասելը, ընդհանուր առմամբ  դատապարտվել տուգանքի` նվազագույն աշխատավարձի երկուհարյուրհիսնապատիկի` 250.000 ՀՀ դրամի չափով։

Ամբաստանյալ  Գարեգին  Հովսեփյանը մեղավոր է ճանաչվել ՀՀ քրեական օրենսգրքի 164-րդ  հոդվածի 1-ին մասով և դատապարտվել տուգանքի` նվազագույն աշխատավարձի երկուհարյուրապատիկի` 200.000 ՀՀ դրամի չափով։

Ամբաստանյալներից համապարտության կարգով հօգուտ ՀՀ պետական բյուջեի դատավճռով բռնագանձվելու է  123.660 ՀՀ դրամ` որպես դատական ծախս։

Ըստ  ամբաստանյալներին առաջադրված մեղադրանքի, Գոռ  Խաչատրյանը՝ քեռորդու հետ, տեղեկանալով, որ Երևան քաղաքում ցույցեր են կազմակերպվում` ի պաշտպանություն ՀՀ ոստիկանության ՊՊԾ գնդի տարածքը գրաված «Սասնա Ծռեր» խմբի անդամների, 2016թ. հուլիսի 29-ի երեկոյան Մասիս քաղաքից եկել են Երևան քաղաքի «Ազատության» հրապարակ։ Ցուցարարների մեջ նկատել են նաև Գարեգին  Հովսեփյանին, ում հետ ծանոթացել են մեկ շաբաթ առաջ Երևանի Նուբարաշենի խճուղում գործող ավտոշուկայում։  

 Երբ ցուցարարները հայտարարել են, որ երթով շարժվում են Երևանի քաղաքի Մ.Խորենացու փողոց, միացել են նրանց և  ցուցարարների հետ քայլելով հասել են Նար-Դոս փողոց։ Նշված փողոցից երթի մասնակցների հետ փոխել են ուղղությունն ու բարձրացել Սարի թաղ։ Այնտեղ ցուցարարները կանգնել են Մ.Խորենացու փողոց իջնող ոլորանների մոտ, որտեղից երևացել է ՊՊԾ գնդի տարածքն ու իրենց ողջույնի խոսքն են ուղղել «Սասնա Ծռեր» խմբի անդամներին։

 Ցուցարարներից ներքև տեղակայված են եղել ոստիկանության ստորաբաժանումները։ Ժողովրդի կողմից ոստիկանների ուղղությամբ քարեր նետելուց և վերջիններիս կողմից հատուկ միջոցներ կիրառելուց հետո սկսվել է անկանոն, խառնաշփոթ իրավիճակ։ Առաջացած իրարանցման ժամանակ նկատել են, որ իրենց է տեսանկարահանում լրագրողական անվանաքարտ  կրող «news.am» լրատվական-վերլուծական կայքի լրագրող Խորեն Գրիգորյանը։ Իրենց մասնակցությամբ տեսագրությունը հետագայում համացանցով կամ հեռուստատեսությամբ հայտնվելուց խուսափելու նպատակով որոշել են լրագրողից խլել տեսախցիկը։

 Այդ նպատակով Գոռ Խաչատրյանը մոտեցել է լրագրողին, փորձել խլել տեսախցիկը, սակայն դրա բացված էկրանը կոտրվել է, որից հետո, նույն նպատակով, Գարեգին Հովսեփյանն է մոտեցել, ու բռնելով Խորեն Գրիգորյանի ձեռքից` կարողացել է խլել «Sony HDR-CX620» մոդելի թվային տեսախցիկն ու դիմել են փախուստի։

 Դրանից հետո Գոռ Խաչատրյանը նշված տեսախցիկը վերցրել է Գարեգին Հովսեփյանից ու հարվածելով գետնին կոտրել` «news.am» լրատվական-վերլուծական կայքին պատճառելով զգալի չափի` 145.000 ՀՀ դրամի գույքային վնաս։

 Այնուհետև, նկատելով իրենց մոտեցող ոստիկաններին, դիմել են փախուստի։

 Դատաքննությամբ առաջադրված մեղադրանքում ամբաստանյալներն իրենց  մեղավոր են ճանաչել և օգտվելով իրենց  սահմանադրական իրավունքից, հրաժարվել են դատաքննությամբ ցուցմունք տալուց։

Դատարանը գտել է, որ Գոռ Խաչատրյանի և Գարեգին Հովսեփյանի մեղքը մեղսագրված արարքներում հաստատված է, Գ.Խաչատրյանը կատարել է արարք, որը նախատեսված է ՀՀ քրեական օրենսգրքի 164-րդ  հոդվածի 1-ին մասով և 185-րդ  հոդվածի 1-ին մասով, իսկ Գ.Հովսեփյանը` ՀՀ քրեական  օրենսգրքի 164-րդ  հոդվածի 1-ին մասով, որով և պետք է ենթարկվեն քրեական պատասխանատվության։

Դատարանն ամբաստանյալ Գոռ Խաչատրյանի պատասխանատվությունը և պատիժը մեղմացնող, ինչպես նաև անձը բնութագրող հանգամանք է համարել  այն, որ վերջինս երիտասարդ է, ամուսնացած, խնամքին ունի մինչև 14 տարեկան 3 մանկահասակ երեխաներ, իր դրսևորած վարքագծով արժանացել է տուժողի ներողամտությանը և վերջինս նրանից որևէ պարտք ու պահանջ չունի, զղջացել է կատարած արարքի համար և ընդունել մեղքը, ինչն որպես մեղավոր անձի հետհանցավոր դրական վարքագիծ, վկայում է այն մասին, որ նա լրիվ գիտակցել է իր արարքի հանրային վտանգավորությունը և զղջացել է դրա համար։

Դատարանն արձանագրել է, որ ՀՀ քրեական օրենսգրքի 185-րդ  հոդվածի 1-ին մասի սանկցիան պատիժ է նախատեսում տուգանքի, կալանքի և ազատազրկման ձևով։ ՀՀ քրեական օրենսգրքի 57-րդ  հոդվածի 2-րդ մասի համաձայն` կալանքը չի նշանակվում դատավճիռը կայացնելու պահին (...) խնամքին մինչև ութ տարեկան երեխա ունեցող անձանց նկատմամբ, ուստի Գ.Խաչատրյանի նկատմամբ օրենքի ուժով չի կարող նշանակվել նշված պատժատեսակը։

Հետևաբար, դատարանը գտել է, որ Գոռ Խաչատրյանի նկատմամբ ՀՀ քրեական օրենսգրքի 185-րդ  հոդվածի 1-ին մասի սանկցիայով պատիժ պետք է սահմանվի այդ հանցագործության համար նախատեսված պատիժներից առավել մեղմ պատիժը` տուգանքի ձևով, քանի որ այն կարող է ապահովել պատժի նպատակները։ Ըստ դատավճռի, նման պատիժ նշանակելով հնարավոր է հասնել ՀՀ քրեական օրենսգրքի 48-րդ  հոդվածով նախատեսված պատժի նպատակներին` սոցիալական արդարության վերականգնմանը, պատժի ենթարկված անձի ուղղմանը, հանցագործությունների կանխմանը, ինչպես նաև ապահովել ՀՀ քրեական օրենսգրքի 10-րդ  և 61-րդ  հոդվածներով սահմանված արդարության, պատասխանատվության անհատականացման և պատիժ նշանակելու ընդհանուր սկզբունքները, ուստի դատարանը գտել  է, որ ամբաստանյալի ուղղվելը և պատժի նպատակների իրականացումը հնարավոր է առանց նրան հասարակությունից մեկուսացնելու։

Դատարանը գտել  է, որ Գ.Խաչատրյանի նկատմամբ ՀՀ քրեական օրենսգրքի 164-րդ  հոդվածի 1-ին մասի սանկցիայով պատիժ կարող է սահմանվել միայն տուգանքի ձևով, քանի որ նշված հոդվածի սանկցիայով նախատեսվում է պատիժ միայն տուգանքի ձևով։

Դատարանն ամբաստանյալ Գարեգին Հովսեփյանի պատասխանատվությունը և պատիժը մեղմացնող, ինչպես նաև անձը բնութագրող հանգամանք է համարել  այն, որ վերջինս երիտասարդ է, իր դրսևորած վարքագծով արժանացել է տուժողի ներողամտությանը և վերջինս նրանից որևէ պարտք ու պահանջ չունի, զղջացել է կատարած արարքի համար և ընդունել մեղքը, ինչը որպես մեղավոր անձի հետհանցավոր դրական վարքագիծ, վկայում է այն մասին, որ նա լրիվ գիտակցել է իր արարքի հանրային վտանգավորությունը և զղջացել է դրա համար։

Դատարանն ի նկատի ունենալով այն, որ Գ.Հովսեփյանի կողմից կատարած արարքի` ՀՀ քրեական օրենսգրքի 164-րդ  հոդվածի 1-ին մասի սանկցիայով նախատեսվում է պատիժ միայն տուգանքի ձևով, գտել է, որ Գարեգին Հովսեփյանի նկատմամբ պատիժ կարող է սահմանվել միայն տուգանքի ձևով։

Աղբյուր` Փաստինֆո