Փաստ ինֆո

Հանցավոր համագործակցության վերաբերյալ աղմկահարույց գործով այսօր շարունակվեց մեղադրական եզրակացության եզրափակիչ մասի հրապարակումը` գործով մեղադրվում է  թվով քսան անձ, նրանց թվում է նաև ՀՀ նախկին փոխվարչապետ և պաշտպանության նախկին փոխնախարար Վահան Շիրխանյանը:

 Ըստ մեղադրական եզրակացության, Արթուր Վարդանյանը  2015թ. ապրիլից գտնվելով Հայաստանի Հանրապետության տարածքում, ստեղծել ու ղեկավարել է ՀՀ քաղաքացիներից կազմված հանցավոր համագործակցություն, կազմակերպված խմբի կազմում ապօրինի կերպով ձեռք է բերել,պահել, փոխադրել և կրել մեծ քանակությամբ զենք, ռազմամթերք, պայթուցիկ նյութեր, պայթուցիկ սարքեր` նպատակ ունենալով Հայաստանի Հանրապետությունում իշխանությունը յուրացնել, այսինքն` զավթել` բռնություն գործադրելու կամ բռնություն գործադրելու սպառնալիքով: Դա ավարտին չի հասցվել նրա կամքից անկախ հանգամանքներում, քանի որ հանցավոր համագործակցության մեջ ներգրավված անձինք բացահայտվել ու 2015թ. նոյեմբերի 25-ին վնասազերծվել են Հայաստանի Հանրապետության ազգային անվտանգության ծառայության աշխատակիցների կողմից:  

 Ըստ էության յուրաքանչյուր ամբաստանյալի մեղադրանքի հիմքում դրված է ընդհանուր մեղադրանքի նույն նկարագրությունը՝ չնչին երանգային տարբերություններով: Ըստ այդմ, Արթուր Վարդանյանը և «Ռադիո Մարիամ» մշակութային հիմնադրամի տնօրեն, Գյումրու Կաթողիկե եկեղեցու քահանա, Հայաստանի և Ավստրալիայի քաղաքացի Անտոն Դիկրան Թոթոնջյանը իրենց հերթական հանդիպման ժամանակ երկուստեք հանգել են համոզման, որ ստեղծված սոցիալ-տնտեսական խնդիրների, Արցախի հարցում հնարավոր զիջումների գնալու պայմաններում Հայաստանում անհրաժեշտ է իշխանափոխություն իրականացնել, այսինքն՝ իշխանությունը զավթել՝ բռնություն գործադրելու կամ բռնություն գործադրելու սպառնալիքի միջոցով:

 Ըստ մեղադրական եզրակացության, Արթուր Վարդանյանն՝ ունենալով զինված գործողությունների իրականացման փորձ և ռազմական հմտություններ, ստանձնել է ստեղծել հանցավոր համագործակցություն՝ իշխանության զավթումն իրականացնելու նպատակով, որի լրիվ ֆինանսավորումը պարտավորվել է ապահովել Անտոն Դիկրան Թոթոնջյանը:

 2015թ. ապրիլի վերջերից  սկսած Արթուր Վարդանյանը ձեռնամուխ է եղել հանցավոր համագործակցությունը ստեղծելու, դրանում Հայաստանի քաղաքացիներին ներգրավելու, զենք, ռազմամթերք, պայթուցիկ նյութեր հայթայթելու և իշխանությունը զավթելուն ուղղված այլ նախապատրաստական գործողություններ իրականացնելուն, որի համար Անտոն Դիկրան Թոթոնջյանից   պարբերաբար, մաս-մաս ստացել է շուրջ 60 000 ԱՄՆ դոլարին համարժեք գումար:

Արթուր Վարդանյանը ձգտել է հանցավոր համագործակցությունում ընդգրկել մարդկանց, ովքեր նախկինում մասնակցություն են ունեցել Արցախյան ազատամարտին, հաշվի առնելով նրանց անցած մարտական ուղին ու զենքին տիրապետելու հմտությունները, բացի այդ հիմնականում ներգրավել է սոցիալապես խոցելի, նյութական խնդիրներ ունեցող անձանց, որոնց համար, հավաքագրման ընթացքում, նա գումարային չնչին հարցեր է կարգավորել, ընդ որում՝ խմբում ներգրավվել են Թոթոնջյանի հետ կապ ունեցած, նրա շրջապատում եղած անձինք:

Իսպանիայում մշտապես բնակվող Արթուր Վարդանյանը Հայաստանում տևական ժամանակ իր գտնվելը պատճառաբանելու, իրավապահ մարմինների տեսադաշտում չհայտնվելու և կասկածներից զերծ մնալու նպատակով շրջապատում ներկայացրել է, թե իբր մտադիր է մարզամշակութային բարեգործական գործունեություն ծավալել Հայաստանում և այդ նպատակով 2015թ. հուլիսի 10-ին անգամ հիմնադրել է «Հայոց վահան մեկ» անվանմամբ մարզամշակութային հասարակական կազմակերպությունը:

Ըստ մեղադրական եզրակացության, Վահան Շիրխանյանը համաձայնություն է տվել մասնակցել հանցավոր համագործակցությանը և կոնկրետ հանձնառություն ստանձնելով, պարտավորվել է ապահովել բանակի աջակցությունը կամ առնվազն  չեզոքությունը՝ Արթուր Վարդանյանի զինված խմբի կողմից իշխանությունը զավթելուն ուղղված գործողությունների իրականացման ընթացքում՝ դրանով իսկ վստահություն ներշնչելով Արթուր Վարդանյանին՝ իր հանցավոր մտադրությունում:

Ըստ մեղադրական եզրակացության, բացի այդ, Վահան Շիրխանյանն իր խորհուրդներով Արթուր Վարդանյանին առաջարկել է իշխանափոխության հասնել պետական մարմինների վրա առանց բացահայտ հարձակումներ գործելու՝ Հայաստանի Հանրապետության նախագահի դեմ հնարավոր տարբեր եղանակներով ու հանգամանքներում մահափորձ իրականացնելու միջոցով:

 Իշխանության զավթման ծրագիրն իրագործելու համար բավարար չափով համախոհներ հավաքագրելով, Արթուր Վարդանյանը նախատեսել է խմբի անդամների մասնակցությամբ հարձակումներ գործել ՀՀ նախագահի նստավայրի, ՀՀ Ազգային ժողովի, ՀՀ սահմանադրական դատարանի, ՀՀ կառավարության և «Հայաստանի հանրային հեռուստաընկերության» շենքերի վրա, վերջին շրջանում Ա.Վարդանյանն առավել հակված է եղել հարձակում գործել միայն Ազգային ժողովի, ՀՀ Նախագահի նստավայրի և «Հայաստանի հանրային հեռուստաընկերության» վարչական շենքերի վրա:

Ըստ մեղադրական եզրակացության, բացի այդ, քննարկվել է նաև ՀՀ Նախագահի օդանավը թռիչքի պահին «Զվարթնոց» օդանավակայանի անմիջապես հարևանությամբ գտնվող Արևաշատ գյուղի տարածքից, որտեղ բնակվել է գործով ամբաստանյալ Հարություն Սարիբեկյանը, «ՌՊԳ» տեսակի հակատանկային նռնականետով կամ «ՊԿ» գնդացրով խոցելու հնարավորությունը, սակայն սպանության ուղղությամբ նախապատրաստական կոնկրետ գործողություններ չեն ձեռնարկվել և իրականացվել:

Ըստ մեղադրական եզրակացության, նախատեսվել է, որ «Հայաստանի հանրային հեռուստաընկերության» վարչական շենքերի վրա հարձակումից հետո գործով ամբաստանյալ Արման Հայրապետյանն ապահովելու էր Արթուր Վարդանյանի կողմից նախապես ձայնագրված տեսագրության եթեր հեռարձակումը: Արթուր Վարդանյանը ձայնագրությամբ դիմելու էր  ժողովրդին՝ ներկայացնելով, որ զինված հեղաշրջումը կատարվել է  «Հայոց վահան» կազմակերպության կողմից՝ մի խումբ ազատամարտիկների աջակցությամբ, դրա շարժառիթը, նպատակը և սպասվող հեռանկարային իրադարձությունները:

20 անձի վերաբերյալ  մեղադրական եզրակացության՝ 120 էջ կազմող եզրափակիչ մասի հրապարակումը կշարունակվի հաջորդ դատական նիստում՝ երկու շաբաթ անց:   

Աղբյուր` Փաստինֆո