Փաստ ինֆո

Արմավիրի մարզպետի խորհրդական, 52-ամյա Մանուկ Սիմոնյանի սպանության գործի շրջանակներում ձերբակալվել են 2 անձինք: Այդ մասին «Փաստինֆո»-ն տեղեկացավ Քննչական կոմիտեից:
Հիշեցնենք, որ ավելի վաղ Քննչական կոմիտեն հաղորդագրություն էր տարածել, համաձայն, որի Մանուկ Սիմոնյանի կնոջից հաղորդում է ստացվել, այն մասին որ հուլիսի 23-ին ամուսինը դուրս է եկել տանից և այլևս չի վերադարձել: Նախնական տվյալներով՝ տան բակից Մ. Սիմոնյանին կանչել է մի տղամարդ, ինչից հետո նա դուրս է եկել տանից՝ առանց ասելու, թե ուր է գնում և այլևս չի վերադարձել:
Ձեռնարկված միջոցառումների արդյունքում՝ հուլիսի 25-ին՝ ժամը 23.30-ի սահմաններում, Արմավիրի մարզի Մյասնիկյան-Դալարիկ ճանապարհի 3-րդ կմ-ից դեպի աջ ընկած՝ մոտ 300 մ հեռավորությամբ գտնվող «Դալարիկի ձոր» կոչվող տարածքում, հայտնաբերվել է 1965 թ. ծնված Մանուկ Սիմոնյանի դիակը՝ կապկպված:
Դեպքի առթիվ հարուցվել է քրեական գործ՝ ՀՀ քրեական օրենսգրքի 104-րդ հոդվածի 1-ին մասի հատկանիշներով, որով նախաքննությունը կատարվում է Արմավիրի մարզային քննչական վարչության վարույթում։ Նշանակվել է դատաբժշկական փորձաքննություն՝ մահվան պատճառը պարզելու նպատակով։ Ձեռնարկվում են անհրաժեշտ քննչական գործողություններ՝ Մ.Սիմոնյանի սպանության հանգամանքները, ենթադրյալ հանցագործություն կատարած անձի ինքնությունը պարզելու ուղղությամբ։
Նշենք նաև, որ ըստ լրատվամիջոցներում շրջանառվող տեղեկությունների՝ Մանուկ Սիմոնյանի սպանության կասկածանքով ձերբակալվել են նրա կինը և որդին:

Աղբյուր` Փաստինֆո