Փաստ ինֆո

Սասնա Ծռեր»-2-ի գործով՝ Արամ Մանուկյան և մյուսներ, այսօրվա դատական նիստում դատարանին հերթական ինքնաբացարկի միջնորդությունը ներկայացրեց ամբաստանյալ Թորոս Թորոսյանի պաշտպան, փաստաբան Լիպարիտ Սիմոնյանը:

Պաշտպանը հայտնեց, որ դեռևս նախաքննությունից գործում ներգրավվել է որպես Թ.Թորոսյանի պաշտպան, ամբաստանյալն իրենից չի հրաժարվել, իրեն որպես ամբաստանյալի պաշտպան են ծանուցումներ ուղարկվում: Այսինքն՝ դատարանի մոտ որևէ կասկած չի եղել, որ ինքը հիշյալ ամբաստանյալի պաշտպանն է:

Լ.Սիմոնյանը նշեց, որ ինքը գործով չորս նիստերից երեքին է ծանուցվել, ծանուցված նիստերին ինքը չի ներկայացել նախապես նշանակված այլ դատական նիստերի պատճառով, ինչի մասին ինքը նախապես գրավոր տեղեկացրել է դատարանին:

Թեև պաշտպանի չներկայանալու և նրան այլ պաշտպանով փոխարինելու անհնարինության դեպքում նիստը պարտադիր ենթակա է հետաձգման, սակայն դատարանն իր՝ Լիպարիտ Սիմոնյանի, բացակայության պայմաններում շարունակել է դատավարական գործողություններ իրականացնել: Այսօր էլ մի շարք պաշտպաններ են բացակայում, սակայն դատարանը նրանց բացակայությամբ դատավարական գործողություններ է իրականացնում՝ օրենքը կամայականորեն փոփոխելով:

Դատարանի ձևակերպմամբ՝ երբ պաշտպանը կգա, իր ներկայությամբ էլ դատավարական գործողություններ կիրականացնենք, ըստ Լիպարիտ Սիմոնյանի, դատարանը նույնպես կոպտորեն խախտում է օրենքը՝ համապատասխան դրույթը վերաբերվում է նոր ներգրավվող պաշտպանին, նորմը կիրառելի չէ արդեն ներգրավված պաշտպանի նկատմամբ:

Փաստաբանը ուշադրություն հրավիրեց դատարանի՝ ինքն իրեն հակասելու վրա, մի կողմից նա ասում է, որ պաշտպանները դեռևս ներգրավված չեն, մյուս կողմից՝ չներգրավված պաշտպանների նկատմամբ դատական սանկցիա է կիրառում:

Լ.Սիմոնյանը փաստեց, որ այսպիսով կոպտորեն խախտվում է պաշտպանական իրավունքը՝ խախտելով Սահմանադրության, Մարդու իրավունքների եվրոպական կոնվենցիայի, Քրեական դատավարության օրենսգրքի դրույթները:

Հաշվի առնելով, դատավոր Արտուշ Գաբրիելյանի տասը տարուց ավելի դատավոր աշխատելու հանգամանքը և նաև այն, որ նրա նախագահությամբ այլ դատական նիստերը պաշտպանի բացակայության դեպքում մշտապես հետաձգվել են, փաստաբանը եզրահանգեց՝ դատավորը տիրապետում է օրենսդրությանը: Ուստի պաշտպանը տեսակետ հայտնեց, որ դատավորը ուղղակի շահագրգռված է գործի ելքով՝ ի վնաս պաշտպանական կողմի:

Փաստաբանը նաև հայտարարեց դատարանի դահլիճից հեռացված ամբաստանյալների նկատմամբ դատական սանկցիայի ժամկետի կամայական հաշվարկի մասին՝ դատարանը հղում է կատարում դատավարական ժամ հասկացությանը, որն օրենքում առկա չէ:

Փաստաբանը ուշադրություն հրավիրեց դատական նիստից տուժողների բացակայության փաստի վրա և դատական նիստի մասին նրանց ծանուցված լինելու մասին կասկած հայտնեց:

Լ.Սիմոնյանը միջնորդեց որոշում կայացնել ինքնաբացարկ հայտնելու մասին:

Փաստաբանը միաժամանակ տեղեկացրեց, որ այսօր ինքը երկու այլ դատական նիստեր ունի, որոնցից մեկը մարզային դատարանում, խնդրելով իր բացակայությունը հարգելի համարել և իր բացակայության պարագայում ներկա դատական նիստը հետաձգել:

Դատարանը հեռացավ խորհրդակցական սենյակ՝ ինքնաբացարկի միջնորդության մասին որոշում կայացնելու:

Աղբյուր` Փաստինֆո