Փաստ ինֆո

«Փաստինֆո»-ին նոր տեղեկություններ է հայտնի դարձել Գյումրիում հուլիսի 20-ին տղամարդու դանակահարության դեպքով:

Այսպիսով, դանակահարվածը ներկայումս դատապարտյալ է. նա 2014թ. նոյեմբերից դատապարտվել է ՀՀ քրեական օրենսգրքի 242-րդ հոդվածի 3-րդ մասով՝ 6 տարի ժամկետով ազատազրկման:

34-ամյա տղամարդը մեղավոր է ճանաչվել այն բանի համար, որ իր կողմից վարած «Մերսեդես G-500» մակնիշի ավտոմեքենայով երթևեկելով Գյումրի- Երևան ավտոճանապարհով՝ թույլ է տվել ՃԵԿ-ի 65-րդ, 66-րդ կետերի և «Ճանապարհային երթևեկության անվտանգության ապահովման մասին» ՀՀ օրենքի 23-րդ հոդվածի 3-րդ կետի պահանջներին հակասող գործողություններ, իր վարած ավտոմեքենան դուրս է բերել հանդիպակաց Գյումրի տանող ուղեմաս, որտեղ բախվել է նույն պահին տվյալ ճանապարհահատվածով դեպի Գյումրի քաղաքի ուղղությամբ ընթացող «ԲՄՎ» մակնիշի ավտոմեքենային, որի հետևանքով ավտոմեքենայի վարորդին և նույն ավտոմեքենայի ուղևորին անզգուշությամբ պատճառել է մահ:

Հիշեցնենք, որ նախօրեին Քննչական կոմիտեն պաշտոնական հաղորդագրությամբ էր հանդես եկել՝ հայտնելով, որ հուլիսի 20-ին՝ ժամը 03:50-ին, «Գյումրի բժշկական կենտրոն» ՓԲ ընկերությունից հաղորդում է ստացվել առ այն, որ բազմաթիվ կտրած-ծակած վնասվածքներով, ծայրահեղ ծանր վիճակում բուժօգնության է տեղափոխվել 35-ից 45 տարեկան մի տղամարդ:

Ձեռնարկված անհետաձգելի գործողությունների արդյունքում պարզվել է, որ տղամարդը, ով հանդիսանում է «Արթիկ» ՔԿՀ-ի բաց ուղղիչ հիմնարկի դատապարտյալ, կյանքի համար վտանգավոր մարմնական վնասվածքներն ստացել է Գյումրի քաղաքի Խրիմյան Հայրիկ փողոցում մի քանի անձանց հետ տեղի ունեցած վիճաբանության ժամանակ:

Դեպքի առթիվ ՀՀ ՔԿ Շիրակի մարզային քննչական վարչությունում հարուցվել է քրեական գործ՝ ՀՀ քրեական օրենսգրքի 112-րդ հոդվածի 2-րդ մասի 6-րդ կետի հատկանիշներով:

Աղբյուր` Փաստինֆո