Փաստ ինֆո

Կազմակերպված խմբի կողմից ապօրինի զենք ռազմամթերք պահելու մեջ մեղադրվող Ժիրայր Սեֆիլյանի և մյուսների գործը Աջափնյակ և Դավթաշեն վարչական շրջանների ընդհանուր իրավասության դատարանի դատավոր Տաթևիկ Գրիգորյանին է մակագրվել այս տարվա մայիսի 26-ին:

7 ամբաստանյալով քրեական գործով կայացել է 8 դատական նիստ, այս ընթացքում դատավորի կողմից միակ գործողությունը, որը կատարվել է ջանասիրաբար, ամբաստանյալների և պաշտպանների նկատմամբ դատական սանկցիայի կիրառումն է եղել:

Այսօրվա նիստում ևս նախագահող դատավորը դատական սանկցիա կիրառեց ամբաստանյալ Ժիրայր Սեֆիլյանի պաշտպան Արա Զաքարյանի, ինչպես նաև՝ ամբաստանյալ Ներսես Պողոսյանի պաշտպան Նինա Կարապետյանցի նկատմամբ. դատարանը գրությամբ կդիմի փաստաբանների պալատ՝ նրանց պատասխանատվության ենթարկելու համար:

Իսկ փաստաբանների նկատմամաբ սանկցիայի հիմք էր հանդիսացել այն, որ նրանք լքել էին դատական նիստերի դահլիճը:

Դատական սանկցիա կիրառվեց նաև հանրային պաշտպանի գրասենյակի փաստաբան Աննա Ջուվանովայի նկատմամբ, ով այսօր ներկայացել էր դատարան՝ ամբաստանյալ Գալուստ Գրիգորյանի շահերի պաշտպանությունն իրականացնելու նպատակով, սակայն Գրիգորյանի նկատմամբ ևս դատական սանկցիա է կիրառված և հեռացված է նիստերի դահլիճից. դահլիճ բերվելուց հետո նա հայտարարեց, թե անձի դեմ ոչինչ չունի, սակայն ինքը չի ցանկանում հանրային պաշտպան ունենալ:

Միևնույն ժամանակ ամբաստանյալը հայտարարեց, որ ինքն այլ պաշտպան ունի և անհրաժեշտության դեպքում կմիջնորդի և կհրավիրի այդ պաշտպանին:

Եվ չնայած նրան, որ ամբաստանյալը հրաժարվեց հանրային պաշտպանի ծառայություններից, դատարանը, առանց հաշվի առնելու այդ հանգամանքը, գործին ներգրավեց հանրային պաշտպանին:

Փաստաբան Աննա Ջուվանովան էլ հայտարարեց, որ ինքը չի կարող ներկայացնել ամբաստանյալի շահերը, քանի որ նա չի ցանկանում, շատ կարևոր է, որ այն անձը ում ինքը պետք է պաշտպանի, համաձայնություն տա, իսկ տվյալ պարագայում անձը հստակ նշեց՝ չի ցանկանում, որպեսզի իր շահերը հանրային պաշտպան ներկայացնի, և որ նա նաև այլ պաշտպան ունի:

Նման պայմաններում Աննա Ջուվանովան դատարանին հայտնեց, որ այդ պահին պաշտպանի համար նախատեսված աթոռը լքում է և տեղ կզբաղեցնի դահլիճում՝ քաղաքացիների համար նախատեսված հատվածում՝ ապակիներից այն կողմ՝ կունկնդրի նիստը, սակայն որպես պաշտպան՝ չի մասնակցի:

Դատարանը դա դիտեց դահլիճից հեռացում և փաստաբանի նկատմամբ սանկցիա կիրառելու համար հեռացավ խորհրդակցական սենյակ:

Վերադառնալուց հետո էլ հանրային պաշտպան Աննա Ջուվանովայի նկատմամբ նախազգուշացման տեսքով սանկցիա կիրառելուց հետո փաստաբանին ներգրավեց նաև որպես ամբաստանյալ Գևորգ Սաֆարյանի պաշտպան:

Նշենք, որ Սաֆարյանի պաշտպանությունն իրականացնում էր փաստաբան Տիգրան Եգորյանը ով 3 անընդմեջ դատական նիստ բացակայել է, և այդ հիմքով դատարանը որոշել էր Սաֆարյանին այլ պաշտպանով ապահովվել:

Լուսանկարը՝ Hetq.am-ի

Աղբյուր` Փաստինֆո