Փաստ ինֆո

«Սասնա ծռերի» 14 անդամների գործով դատական նիստը վերսկսվելուց հետո էլ, ինչպես պարզ դարձավ, կրկին դատական նիստերի դահլիճում չէին պաշտպաններ Մուշեղ Շուշանյանը և Արայիկ Պապիկյանը:

Նախագահողը ներկաններին տեղեկացրեց, որ դատական կարգադրիչի կողմից արձանագրություն է կազմվել և ներկայացվեց, ըստ որի՝ Մուշեղ Շուշանյանին և Արայիկ Պապիկյանին մետաղաորսիչ սարքով զննելիս ազդանշան է հնչել, որ նրանց պայուսակներում կա մետաղյա իր: Կարգադրիչը պահանջել է դուրս բերել այն, սակայն պաշտպանները գտել են, որ իրենց ապօրինի պահանջ է ներկայացվել և պայուսակը չեն բացել և դուրս չեն բերել, այսպես կոչված, մետաղյա իրը, ուստիև՝ նրանց թույլ չի տրվել դատական նիստերի դահլիճ մտնել:

Իսկ մինչ այդ հարցը կլուծվի, դատարանը ներկաներին տեղեկացրեց, որ ամբաստանյալ Սմբատ Բարսեղյանի շահերի պաշտպան Հայկ Ալումյանից գրություն է ստացվել, որով պաշտպանը հայտնել է, որ Կենտրոն և Նորք-Մարաշ վարչական շրջանների ընդհանուր իրավասության դատարանում կալանքի սանկցիայի ժամկետը երկարացնելու մասին նիստի է և չի կարող ներկայանալ այս նիստին:

Դատարանը հայտնեց, որ Հայկ Ալումյանը անընդմեջ չի ներկայանում այս գործով 5 դատական նիստի և հղում կատարելով 304-րդ հոդվածի պահանջին՝ ամբաստանյալ Սմբատ Բարսեղյանին հարցրեց, թե նա այլ պաշտպան ունի՞, ում կարող են ներգրավել, սակայն Բարսեղյանը հրաժարվեց այլ պաշտպանից և ասաց, որ չի առարկում իր պաշտպանի բացակայությամբ դատական նիստի անցկացմանը:

Հաջորդ գրությունը դատարանն ստացել էր փաստաբան Լուսինե Սահակյանից, վերջինս ներկայացնում է ամբաստանյալներ Սեդրակ Նազարյանի և Էդուարդ Գրիգորյանի պաշտպանությունը:

Սահակյանը դատարանին տեղեկացրել է, որ հուլիսի 18-ից մինչև օգոստոսի 9-ը արձակուրդում է գտնվելու և բացակայելու է ՀՀ-ից, ուստիև՝ նշանակված դատական նիստերին չի կարող մասնակցել:

Ամբաստանյալներ Սեդրակ Նազարյանի և Էդուարդ Գրիգորյանի պաշտպանությունն իրականացնում էնաև փաստաբան Երվանդ Վարոսյանը, և այս պարագայում մյուս պաշտպանի բացակայությունը խոչընդոտ չէ նիստերի անցկացմանը:

Նախագահող դատավոր Արտուշ գաբրիելյանը, պաշտպաններին դիմելով, խնդրեց արձակուրդը կազմակերպել օգոստոսի 1-ից- 15-ն ընկած ժամանակահատվածում, որպեսզի նիստերը արձակուրդ գնալու պարագայում անհարկի չձգձգվեն, դատարանի այս առաջարկը կողմերին, մեղմ ասած, այնքան էլ դուր չեկավ. պատճառաբանեցին, որ իրենք այլ դատական գործեր ևս ունեն, արդեն նշանակված դատական նիստեր, և չեն կարող դատարանի այս առաջարկն ընդունել:

Ինչ վերաբերում է դատարանին հասցեագրված երրորդ գրությանը, ապա այն ստացվել էր ամբաստանյալներ Արայիկ Խանդոյանի, Արմեն Լամբարյանի և Արթուր Պետրոսյանի պաշտպան Արայիկ Պապիկյանից: Վերջինս գրությամբ դատարանին տեղեկացրել էր, որ այլ դատարանում դատական նիստի է մասնակցում և շուրջ 40 րոպե ուշացումով կներկայանա: Պաշտպանը խնդրել էր իր ուշացումը դատարանի նկատմամբ անհարգալից վերաբերմունք չդիտել:

Դատարանը որոշում կայացրեց անհարգալից վերաբերմունք դիտել փաստաբան Շուշանյանի վարքագիծը և նրա նկատմամաբ կիրառվեց դատական սանկցիա և դիմել Փաստաբանական պալատ:

Փաստաբանի նկատմամաբ դատական սանկցիայի կիրառումը կրկին բորբոք կրքերը, և փաստաբանները մեկ մյուսին հերթ չտալով փորձում էին հայտարարությամբ հանդես գալ. դատարանի գործողությունները փաստաբանները անօրինակ գնահատեցին:

Վիճաբանությունն այնքան թեժացավ, որ նախագահողը հեռացավ խորհրդակցական սենյակ՝ կրկին փաստաբանների նկատմամբ սանկցիայի հարց լուծելու նպատակով:

Լուսանկարը՝ Azatutyun.am-ի

Աղբյուր` Փաստինֆո