Փաստ ինֆո

Պետական դումայում հնչած բոլոր այն մտքերը, ըստ որոնց՝ իբր ռուսերենը պետական լեզու չճանաչելը հանգեցնում է այդ երկրներում ռուսաստանցիների շահերի ոտնահարմանը, պարզապես համարում եմ դասական անլրջություն: Այդ մասին իր ֆեյսբուքյան էջում գրառել է «Սահմանադրական իրավունքի կենտրոն» ՀԿ-ի խորհրդի նախագահ Գևորգ Դանիելյանը, ով 2007-2010 թթ.-ին զբաղեցրել է նաև արդարադատության նախարարի պաշտոնը:

Գրառման մեջ մասնավորապես ասվում է.

Սահմանադրության 20-րդ հոդվածի համաձայն. «ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՊԵՏԱԿԱՆ ԼԵԶՈՒՆ ՀԱՅԵՐԵՆՆ Է», իսկ սա այն հոդվածներից է, որը կարող է փոփոխվել բացառապես հանրաքվեի միջոցով: Որևէ խելամիտ կապ՝ վարորդական իրավունքի վկայականի և ռուսերեն լեզուն պետական ճանաչելու միջև չկա այնպես, ինչպես կապ չի կարող լինել տեսիլքի և իրականության միջև:

Նախ, խոսքը, հիմնականում, Ռուսաստանում մշտապես բնակվող ու աշխատող մարդկանց մասին է, ուստի նրանց լեզվական հաջողությունների վրա՝ բուն Հայաստանում ռուսերենը պետական լեզու հռչակելը կունենա զրո ազդեցություն. եթե փոխվում են վկայականի պայմանները, ապա մարդը կանցնի վերապատրաստում կամ կաշառքի միջոցով նորը կստանա: Դժվար է պատկերացնել իրավիճակ, երբ Ռուսաստանում բնակվող և լեզվին կարգին չտիրապետող մարդը մեկեն կսկսի ռուսերեն փայլուն խոսել հենց այն պահից, երբ Հայաստանում ռուսերենը կճանաչվի պետական լեզու: Ի դեպ, ասվածը վերաբերում է նաև Հայաստանաբնակ մարդկանց:

«Պետական դումայում հնչած բոլոր այն մտքերը, ըստ որոնց՝ իբր ռուսերենը պետական լեզու չճանաչելը հանգեցնում է այդ երկրներում ռուսաստանցիների շահերի ոտնահարմանը, պարզապես համարում եմ դասական անլրջություն: Ի դեպ, Այս ամենի համատեքստում իրավաչափ կլինի, եթե Հայաստանում գործեն միայն Հայաստանի իրավասու մարմինների կողմից տրված վկայականները և վարորդական իրավունքի միջազգային վկայականները...»,-գրառել է Գևորգ Դանիելյանը:

Նշենք, որ այսօր Պետդումայի խոսնակ Վյաչեսլավ Վոլոդինը Հայաստանի իշխանություններին առաջարկել է ռուսերենին պետական լեզվի կարգավիճակ տալ, որպեսզի ազգային վարորդական իրավունքներն ընդունվեն Ռուսաստանում:

Այս տարվա հունիսի 1-ից Ռուսաստանում ուժի մեջ է մտել օտարերկրյա վարորդական իրավունք ունեցող վարորդներին ՌԴ-ի տարածքում աշխատելն արգելող օրենքը, իսկ հուլիսի 14-ին, Պետդուման օրենք է ընդունել, որի համաձայն՝ Ղրղզստանի, ինչպես նաև այլ երկրների քաղաքացիներին, որտեղ ռուսերենը պետական լեզու է, թույլատրվում է Ռուսաստանի տարածքում վարորդ աշխատել ազգային վարորդական իրավունքների հիման վրա։

Վյաչեսլավ Վոլոդինն ասել է՝ ամրագրեք ռուսերենը որպես պետական լեզու և այդ պարագայում օրենքը մեխանիկորեն կտարածվի նաև Հայաստանի Հանրապետության վրա:

Լուսանկարը՝ Ֆոտոլուրի

Աղբյուր` Փաստինֆո