Փաստ ինֆո

«Սասնա Ծռեր»-2-ի գործով ամբաստանյալներ Արայիկ Հակոբյանի և Մարտիրոս Հակոբյանի պաշտպան Լուսինե Սահակյանի նկատմամբ դատարանը դատական սանկցիա կիրառեց. դատարանը որոշեց դիմել Փաստաբանների պալատ՝ փաստաբան Լուսինե Սահակյանին պատասխանատվության ենթարկելու համար: 

Դատական նիստի ընթացքում ամբաստանյալ Թաթուլ Թամրազյանը հայտարարեց, որ չի ցանկանում մասնակցել դատական նիստին, քանի որ իր ընկերները ներկա չեն:

Դատարանի նկատմամբ անհարգալից վերաբերմունք դրսևորելու համար ամբաստանյալի նկատմամբ դատարանը դատական սանկցիա կիրառեց և 6 ժամով հեռացրեց նիստերի դահլիճից:

Հիշեցնենք, որ գործով մյուս 15 ամբաստանյալների նկատմամբ դատական սանկցիա էր կիրառվել նախորդ նիստերի ընթացքում՝ ոտքի չկանգնելու համար, և հեռացրել էին նիստերի դահլիճից, իսկ այսօրվա նիստի սկզբում ներկա էին միայն երեք ամբաստանյալ՝ Արամ Մանուկյանը, Թաթուլ Թամրազյանը և Հովհաննես Հարությունյանը:

Բացի փաստաբան Լուսինե Սահակյանից, դատական սանկցիայի արժանացավ նաև փաստաբան Մոնիկա Մարգարյանը: Վերջինս ներկայացնում է ամբաստանյալներ Տիգրան Մանուկյանի և Թաթուլ Թամրազյանի շահերը և քանի որ իր պաշտպանների նկատմամբ դատական սանկցիա է կիրառվել և նրանք նիստերի դահլիճում չէն, փաստաբանը լքել էր նիստերի դահլիճը:

Ուստիև՝ դատարանը Մարգարյանի նկատմամբ դատական սանկցիա կիրառեց և որոշեց դիմել Փաստաբանների պալատ՝ պատասխանատվության ենթարկելու համար:

Լուսանկարը՝ Ֆոտոլուրի

Աղբյուր` Փաստինֆո