Փաստ ինֆո

ՀՀ ԱՆ քրեակատարողական հիմնարկներում 2017թ. հունվարի 1-ից մինչ այսօր գրանցվել է 9-ը մահացության դեպք:

Քրեակատարողական հիմնարկներում այս տարվա առաջին կիսամյակում անազատության մեջ հայտնված անձանց մահացությունների վերաբերյալ «Փաստինֆո»-ի թղթակիցը զրուցեց ՀՀ արդարադատության նախարարության Քրեակատարողական վարչության հանրային կապերի բաժնի պետ Գոռ Ղլեչյանի հետ:

-Պրն. Ղլեչյան, այս տարվա ընթացքում ՀՀ արդարադատության նախարարության քրեակատարողական հիմնարկներում քանի՞ դատապարտյալի մահվան դեպք է գրանցվել:

- 2017թ. հուլիսի 12-ի դրությամբ՝ ՀՀ ԱՆ քրեակատարողական հիմնարկներում գրանցվել է 9 մահվան դեպք, որոնցից մեկն ինքնասպանություն է:

Անազատության մեջ հայտնված անձի կողմից ինքնասպանությունը տեղի էր ունեցել ապրիլի 14-ին՝ «Հրազդան» քրեակատարողական հիմնարկում: Այս դեպքին «Փաստինֆո»-ն, անդրադարձել էր. ինքնասպանություն գործած անձը 22-ամյա Փայլակ Գևորգյանն էր, ով ապրիլի 1-ից էր գտնվում «Հրազդան» ՔԿՀ-ում, իսկ ինքնասպանություն գործել էր ջեռուցման համակարգի խողովակից կախվելու եղանակով: Գևորգյանը նախկինում երկու անգամ դատապարտված է եղել, իսկ դեպքի պահին էլ մեղադրվում էր ՀՀ քրեական օրենսգրքի 178-րդ հոդվածի 1-ին մասով:

- Համեմատություն անցկացնելու նպատակով կասեք նախորդ տարի նույն ժամանակահատվածում ի՞նչ պատկեր է եղել, դեպքերի քանակը աճե՞լ է, թե՝ նվազել:

-2016 թվականի նույն ժամանակահատվածում քրեակատարողական հիմնարկներում գրանցվել է 17 մահվան դեպք, որոնցից 4-ը ինքնասպանության դեպքեր են: Կարող ենք ասել, որ այս պահի դրությամբ նվազում է արձանագրվել ինչպես մահվան դեպքերի, այնպես էլ՝ ինքնասպանությունների: Անազատության մեջ գտնվող անձանց կողմից ՔԿՀ-ներում ինքնասպանության փորձերի մի շարք դեպքեր էլ ՔԿՀ ծառայողների կողմից կանխվել են, այդ մասին մամուլում ևս հրապարակումներ կան:

Աղբյուր` Փաստինֆո