Փաստ ինֆո

ՀՀ վերաքննիչ քրեական դատարանի կողմից բեկանվելուց և առաջին ատյանի դատարան վերադառնալուց հետո այսօր սկսվեց պետական դավաճանության՝ ամբաստանյալ Սերգեյ Պապոյանի վերաբերյալ գործով դատաքննությունը:

Ըստ մեղադրական եզրակացության, Սերգեյ Պապոյանը Թուրքիայում բնակվող հոր` Ռաֆիկ Պապոյանի, ուղղորդմամբ, Վրաստանի Թբիլիսի քաղաքում հանդիպել է Ադրբեջանի հետախուզական ծառայությունների աշխատակիցը հանդիսացող, Սեյրան անունով ներկայացած անձի հետ և հավաքագրվել վերջինիս կողմից` տրամադրելով տեղեկություն ԼՂՀ Մարտունու շրջանում որպես հետախույզ ժամկետային զինծառայության ընթացքում տիրապետած տեղեկությունների վերաբերյալ:

Վճարելով 750 ԱՄՆ դոլար գումար` վերոհիշյալ Սեյրանը տվել է առաջադրանք` ընդունվել պայմանագրային ծառայության Մատաղիսի զորամասերից մեկում և տեղեկություններ հայտնել այդ զորամասի մասին համացանցի «սկայպ» ծրագրի կամ «օդնոկլասնիկի» սոցիալական ցանցի միջոցով:

Ամբաստանյալը՝ ի պատասխան դատարանի հարցի, հայտարարեց, որ համաձայն չէ մեղադրանքի հետ, վերագրվող գործողություններն ու հանցագործություն չի կատարել:

Ըստ դատարանի սահմանած ապացույցների հետազոտության հաջորդականության, նախ դատարանում կհարցաքննվեն վկաները, նրանց հարցաքննությունը կսկսվի արդեն հաջորդ դատական նիստում:

Ինչպես լրագրողների հետ զրույցում նշեց ամբաստանյալի պաշտպան, փաստաբան Սուրեն Մնացականյանը, նախորդ դատաքննության ավարտին իր պաշտպանյալ Սերգեյ Պապոյանի նկատմամբ կայացված արդարացման դատավճիռը միանշանակ հիմնավոր էր, իսկ Վերաքննիչ դատարանի որոշումն՝ անհասկանալի՝ աբսուրդի աստիճանի:

Առաջին ատյանի դատարանը՝ դատավոր Արշակ Վարդանյանի նախագահությամբ, Սերգեյ Պապոյանի մասով գտել էր, որ նրա արարքում բացակայում են քրեական օրենսգրքի 299-րդ հոդվածի 1-ին մասով նախատեսված հանցակազմի առկայություն փաստող բավարար ապացույցները:

Ըստ էության միակ ապացույցը, ըստ դատարանի եզրահանգման, վերջինիս նախաքննական ցուցմունքն է, որը նախ՝ ինքնին մեղադրանքը հիմնավորող բավարար փաստական տվյալներ չի բովանդակում, ավելին՝ նույնիսկ բովանդակելու պարագայում այդ միակ ապացույցի հիման վրա ամբաստանյալ Ս.Պապոյանի մեղավորության փաստումը կհանգեցնի անմեղության կանխավարկածի, ապացույցները գնահատելու վերաբերյալ ՀՀ քրեական դատավարության օրենսգրքի 18-րդ, 25-րդ, 127-րդ, 365-րդ հոդվածների պահանջների խախտման։

Իսկ Վերաքննիչ քրեական դատարանը Սերգեյ Պապոյանի մասով դատավճիռը բեկանել էր ու ուղարկել ստորադաս դատարան՝ նոր քննության:
Վերաքննիչ դատարան այսպիսով բավարարել էր մեղադրող Արամ Արամյանի բողոքը, որով նա խնդրում էր կայացնել մեղադրական դատավճիռ, Սերգեյ Պապոյանին մեղավոր ճանաչել ՀՀ քրեական օրենսգրքի 299 հոդվածի 1-ին մասով և դատապարտել 14 տարի ժամկետով ազատազրկման՝ առանց գույքի բռնագրավման, կամ Սերգեյ Պապոյանի նկատմամբ գործն ուղարկել Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարան՝ նոր քննության՝ սահմանելով նոր քննության ծավալը:
Մասնավորապես, Վերաքննիչ դատարանն եզրահանգել է, որ Սերգեյ Պապոյանի ցուցմունքները այն մասին, որ նա հրաժարվել է օտարերկրյա հետախուզության առաջադրանքով գործողություններ կատարել, կասկածի տեղիք են տալիս և միայն մի շարք հանգամանքների բազմակողմանի, լրիվ և օբյեկտիվ ուսումնասիրության հիման վրա կարելի է խոսել Ս.Պապոյանի անմեղության մասին:

Ըստ Վերաքննիչ դատարանի, առաջին ատյանի դատարանն այս հանգամանքները հաշվի չի առել, Սերգեյ Պապոյանի մասով չի իրականացրել քրեական գործի բազմակողմանի և լրիվ քննություն՝ թույլ տալով ՀՀ Սահմանադրության 63, ՀՀ քրեական դատավարության օրենսգրքի 126, 127 հոդվածների խախտում, ինչը հանգեցրել է ՀՀ քրեական դատավարության օրենսգրքի 358 հոդվածի պահանջներին չհամապատասխանող դատական ակտի կայացմանը: Արդյունքում թույլ է տրվել ՀՀ քրեական դատավարության օրենսգրքի 398 հոդվածով նախատեսված՝ դատավարական իրավունքի խախտում:

Վերաքննիչ դատարանը գտել է, որ առաջին ատյանի դատարանը ամբաստանյալ Սերգեյ Պապոյանի մասով դատական ակտ կայացնելիս հանգել է ոչ ճիշտ եզրակացության, ինչը հանգեցրել է նյութական և դատավարական իրավունքի այնպիսի խախտման, ինչը հիմք է վիճարկվող դատական ակտն այդ մասով բեկանելու և գործն այդ մասով նոր քննության ուղարկելու համար:

Աղբյուր` Փաստինֆո