Փաստ ինֆո

Մերի Մարգարյանի և նրա նորածնի մահվան գործով ամբաստանվող մանկաբարձ-գինեկոլոգ Շուշանիկ Բախշյանը գտնում է, որ 2015թ. հուլիսի 23-ից 27-ն ինքը թերացում չի ունեցել և եթե ժամանակը հետ տային, իր գործողություններում տակտիկական ոչ մի փոփոխություն չէր լինի:

Հիշեցնենք, որ քրեական գործով ամբաստանվող բժշկուհու հարցաքննությունը նախորդ՝ հունիսի 27-ի նիստում անավարտ էր մնացել և այսօր Շենգավիթ վարչական շրջանի ընդհանուր իրավասության դատարանում շարունակվեց Շուշանիկ Բախշյանի հարցաքննությունը:

Ամբաստանյալ բժշկուհին հայտնեց, որ Մերի Մարգարյանը ռիսկային հղի չի եղել և երբևէ չի էլ համարվել:

Շուշանիկ Բախշյանն իր մասնագիտական կրթության վերաբերյալ տուժողի իրավահաջորդի ներկայացուցիչ Մարինե Թովմասյանի հարցից վրդովվեց և հայտարարեց՝ «մամուլի համար հարցեր մի տվեք»:

Սակայն Թովմասյանը հարցադրում կատարեց՝ հղում կատարելով գործում առկա հետազոտված փաստաթղթերի, ըստ որոնց՝ Բախշյանն ունի 4 տարվա բժշկության մասնագիտություն, 6 ամսվա մանկաբարձության և գինեկոլոգիական լրիվ ծավալով ավարտված մասնագիտական գիտելիքներ, այս պարագայում փաստաբանը հետաքրքրվեց. «Այդ փաստաթուղթը Ձեզ իրավասություն տալիս են, որ դուք ռիսկային կամ պրոբլեմատիկ հղիներով զբաղվեք»:

Ի պատասխան Բախշյանն ասաց, որ ինքն ավարտել է Երևանի պետական բժշկական ինստիտուտը. «Միգուցե խորանայիք ու հասկանայիք, թե քանի տարի էին սովորել այն ժամանակ և ունեմ պետական նմուշի դիպլոմներ և այն ինձ իրավունք է վերապահում զբաղվել բոլոր կարգի հղիներով», ապա նաև հավելեց, որ այդ կարգի հարցերին այլև չի պատասխանելու:

Ամբաստանյալի աթոռին հայտնված բժշկուհին պնդում էր, որ Մերի Մարգարյանը բժիշկների դինամիկ հսկողության ներքո է գտնվել, իսկ հուլիսի 27-ի առավոտյան զննության ենթարկվելուց հետո Մերի Մարգարյանի մոտ որևէ օրգան համակարգի անբավարարություն չի ախտորոշվել:

Իսկ թե ինչպես է ստացվել, որ ամեն ինչ անելու պարագայում, բժիշկների դինամիկ հսկողության տակ պահելու պայմաններում Մերի Մարգարյանի վիճակը գնալով վատացել է, Բախշյանը պատասխանեց, որ կան հիվանդություններ, որոնց ընթացքը կանգնեցնել հնարավոր չէ:

Դատաբժշկական փորձաքննության եզրակացության վերաբերյալ էլ ասաց, որ եզրակացությունը մեկը մյուսին հակասող տվյալներ է պարունակում:

Հարցին, թե ինչու մահացավ Մերի Մարգարյանը, եթե նա գտնվել է բժշկուհու հսկողության ներքո, Բախշյանն ասաց՝ ըստ փաստաթղթերի, բազմաօրգանային անբավարարությունից, իսկ մանկաբարձության մեջ կանխատեսել, հստակ պլան գծել, թե ինչով կավարտվի՝ ոչ ոք չի կարող և իրավունք չունի ասել:

Ամբաստանվող բժշկուհուն հարց ուղղեց նաև տուժողի իրավահաջորդ, մահացած Մերի Մարգարյանի հայրը՝ Վաղինակ Մարգարյանը, թե ինչու մահացավ Մերին և իր թոռնիկը, Մարգարյանը խնդրեց չստել, որին ի պատասխան Բախշյանն ասաց. «Ձեր հետ կիսում եմ այդ ցավը, ես ինքս իմ մեջ քննարկել եմ, թե ինչ կարող էինք անել, ինչը չենք արել, սակայն կա հիվանդության ընթացք, որտեղ ոչ մի բան կանգնեցնել հնարավոր չէ, կան հիվանդություններ, որոնց ընթացքը վերահսկել հնարավոր չէ»:

Ի պատասխան Մերի մարգարյանի ամուսնու հարցին էլ, թե ի՞նչ չեք արել, որը կարող էիք անել, Բախշյանն ասաց, որ ինքն ամեն ինչ արել է ու կաներ նույնը, իսկ թե ինչու մահացավ երեխան, ասաց՝ չի կարող պատասխանել:

Հաջորդիվ հարցաքննվեց գործով մյուս ամբաստանյալը՝ Անի Բաբելյանը, ով հայտարարեց, որ առաջադրված մեղադրանքում իրեն մեղավոր չի ճանաչում:

Ըստ Բաբելյանի՝ 2015թ. հուլիսի 25-ին՝ ժամը 20:00-ի սահմաններում, իրեն դիմել է ընդունարանի հերթապահ մանկաբարձուհին և հայտնել, որ հղի է եկել հիվանդանոց, չափել են նրա ջերմությունն ու վերցրել են անալիզներ:

Այդ ամենից հետո ինքը մոտեցել է Մերի Մարգարյանին, հարցրել է, թե նա ինչ գանգատներ ունի, ի պատասխան որի՝ Մերին ասել է, թե այդ պահին գանգատ չունի, իսկ մինչ այդ՝ տանը, ջերմություն է ունեցել, և որ հղիությունը վարող բժշկուհի Շուշանիկ Բախշյանն իրեն ասել է, որ դիմի հիվանդանոց:

Ըստ Բաբելյանի ցուցմունքի՝ այդ ամենից հետո արագ բարձրացրել են վիրահատության, քանի որ կյանքի ցուցումով՝ անհապաղ վիրահատություն պետք է կատարեր, իսկ երբ գտնվել է վիրահատարանում, իրեն են ներկայացրել հետազոտությունների արդյունքները, որոնց մասին ինքը հեռախոսազանգի միջոցով տեղեկացրել է Շուշանիկ Բախշյանին:

Վիրահատությունն էլ ավարտվելուց հետո գնացել է, որպեսզի տեսնի Բախշյանի հղիին, սակայն Մերի Մարգարյանին ու իր հարազատներին չի տեսել, նրանք արդեն գնացած են եղել:

Բաբելյանը նաև հայտնեց, որ Շուշանիկ Բախշյանին տեղեկացրել է, որ իր հղին՝ Մերի Մարգարյանը, առանց զգուշացնելու հեռացել է հիվանդանոցից, որից հետո այդ մասին տեղեկացրել է ԲԿ-ի բուժգծով տեղակալ Դավիթ Մխիթարյանին, ով էլ իրեն հրահանգել է մատյանում անպայման գրառում կատարել՝ փակցնելով նաև կատարված հետազոտության պատասխանները:

Բաբելյանը պնդեց՝ որևէ որոշում չէր կարող կայացնել Մերի Մարգարյանի վերաբերյալ, քանի որ գտնվել է վիրահատության:

Հարցին, թե ինչպես է պատահել, որ այդ օրվա հետազոտությունների արդյունքների բնօրինակը հայտնվել է Մերի Մարգարյանի մոտ, ամբաստանյալ բժշկուհին ասաց, որ իրեն ինչ տրամադրել են, ինքը դա էլ փակցրել է մատյանում:

Նշենք, որ տուժողի իրավահաջորդի ներկայացուցիչ Մարինե Թովմասյանն ասաց, որ այդ անալիզների բնօրինակ պատասխանները Մերիի հարազատների մոտ են եղել, և իրենք են տրամադրել վարույթն իրականացնող մարմնին:

Ցուցմունք տալուց հետո ամբաստանյալը հրաժարվեց հարցերին պատասխանել, դատարանը նրան պարզաբանեց, որ դա իր իրավունք է, սակայն կողմի իրավունքն է հարցեր հնչեցնել, այդ ընթացքում ամբաստանյալ բժշկուհու ինքնազգացողությունը վատացավ, նույնիսկ սկսեց լաց լինել:

Դատական նիստը հետաձգվեց և նշանակվեց հուլիսի 25-ին:

Աղբյուր` Փաստինֆո