Փաստ ինֆո

Ուղկեցող գումարտակի հրամանատար փոխգնդապետ Արմեն Ղազարյանի զեկուցագիրի հիման վրա Ժիրար Սեֆիլյանի և մյուսների գործով կալանքի տակ գտնվող Գևորգ Սաֆարյանին պատժախուց են տեղափոխել: Այդ մասին իր ֆեյսբուքյան էջում գրառել է Գևորգ Սաֆարյանի պաշտպան Տիգրան Եգորյանը:

Գրառման մեջ մասնավորապես նշվում է.

01.07.2017թ. Գևորգ Սաֆարյանին տեղափոխում են պատժախուց, ինչի մասին տեղեկություններ ստանալուց հետո նրա պաշտպաններ Տիգրան Եգորյանը և Տիգրան Հայրապետյանը տարբեր օրերի տեսակցել են նրան:

Գևորգի նկատմամբ «Նուբարաշեն» քրեակատարողական հիմնարկում որևէ ուժի կիրառում կամ հոգեբանական կամ այլ ճնշում չի կիրառվել, բացի՝ պատժախուց տեղափոխելուց:

Պատճառը եղել է տխրահռչակ փոխգնդապետ Արմեն Ղազարյանի զեկուցագիրն այն մասին, թե իբր Գևորգը դատարանում հայհոյել է ոստիկաններին և իշխանությանը (ըստ Գևորգի փոխանցման):

Գևորգին պատժախուց են տեղափոխել 10 օրով: Նա ողջույններ էր փոխանցում և հայտնում, որ իր մոտ ամեն ինչ նորմալ է:

Գևորգի հետ տեսակցության ընթացքում արձանագրվել է իր հայտարարությունը մանրամասն նկարագրությամբ տեղի ունեցածի մասին, ինչի կապակցությամբ մանրամասները կհրապարակվեն առաջիկայում, իսկ այժմ կատարվում են աշխատանքներ՝ նրա իրավունքների խախտման կապակցությամբ պատասխանատուներին պատասխանատվության ենթարկելու ուղղությամբ:

Լուսանկարը՝ Ֆոտոլուրի

Աղբյուր` Փաստինֆո