Փաստ ինֆո

Թրիեստի վերաքննիչ դատարանը մեղմել է իտալացի դերասանուհի Օրնելլա Մուտիի վճիռը, որով նա 2015թ. դատապարտվել է ներկայացումը բաց թողնելու հետ կապված կեղծ բժշկական տեղեկանք ներկայացնելու համար: Ըստ BBC-ի ռուսական ծառայության, այս մասին հաղորդում է ANSA գործակալությունը:

Մուտին կվճարի տուգանք 500 եվրոյի չափով՝ 600 եվրոյի փոխարեն, նաև կրճատվել է բանտարկության ժամկետը՝ ութ ամսից՝ կես տարվա: Պայմանական ժամկետ ստանալու համար դերասանուհին պետք է տուժող կողմին վճարի 30 հազար եվրո:

Ի հավելումն տուգանքի դերասանուհին պետք է ստիպված լինի հաստատության ներկայացուցիչներին վճարել 3,6 հազար եվրո՝ որպես դատական ծախսերի հատուցում:

Դերասանուհի դեմ հայցով դատարան էր դիմել Պորդենոնայի թատրոնի վարչակազմը: Նրանք պնդում էին, որ Մուտին կեղծ բժշկական վկայական է ներկայացրել 2010թ. դեկտեմբերի 10-ին ներկայացմանը բեմ դուրս չգալու հետ կապված: Ընդ որում, նրա հոնորարը կազմել է 25 հազար եվրո:

Ներկայացման փոխարեն իտալական կինոյի աստղը գնացել է բարեգործական ընթրիքի Սանկտ Պետերբուրգ, որտեղ եղել են նաև նախագահ Վլադիմիր Պուտինը և ամերիկացի դերասան Քեվին Քոստները:

Տեղի ունեցածից հետո Մուտին ներողություն է խնդրել հանդիսատեսից: Նա բացատրել է, որ իր հիվանդությունը՝ լարինգոֆարինգիտ, թույլ չի տվել իրեն հանդես գալ, սակայն բարեգործական ընթրիքին ինքը կարող էր մասնակցել, քանի որ այնտեղ խոսել պետք չէր:

Աղբյուր` Փաստինֆո