Փաստ ինֆո

«Սասնա Ծռեր»-ի գործով դատավորն ինքն էլ չի կարողանում կողմնորոշվել, թե ինչ անել: Մասնավորապես, մի դեպքում դատավորը գտնում է, որ պաշտպանները ներգրավված չեն, բայց միաժամանակ սանկցիա է կիրառում պաշտպանների նկատմամբ:

Ինչպես լրագրողների հետ զրույցում նշեց «Սասնա Ծռեր»-2-ի գործով ամբաստանյալներ Արայիկ Հակոբյանի և Մարտիրոս Հակոբյանի պաշտպան, փաստաբան Լուսինե Սահակյանը, ընդհանրապես սրանք գործողություններ են, որոնք բխում են դատավորի կողմից թույլ տրված խախտումներից: Նպատակը պաշտպանների վրա ազդելն է և նաև նրանց թույլ չտալը, որպեսզի պաշտպաններն անկաշկանդ մտնեն դատարանի դահլիճ:

Ըստ պաշտպանի, դատավորը թույլ է տալիս, որպեսզի պահանջ ներկայացվի խուզարկել փաստաբաններին, դրանով իսկ խախտում է պաշտպանական իրավունքը, որովհետև ակնհայտ է, որ խուզարկության պահանջ ներկայացնելու պարագայում, համենայն դեպս, որոշ փաստաբաններ չեն մտնելու դատարանի դահլիճ և միևնույն է, դատարանը շարունակում է իր այդ գործելաոճը:

Ընդ որում, ըստ Լուսինե Սահակյանի, շատ տարբերակված մոտեցում կա՝ մի դեպքում պայուսակը ձայն է հանում, ասում են թույլ ենք տալիս, գնա առաջ, մյուս դեպքում՝ ոչ, թույլ չենք տալիս: Դրա համար ակնհայտ է, որ այդ զննությունը ուղղակի ձևական բնույթ է կրում, այն օգտագործվում է, որպեսզի փաստաբաններին թույլ չտան մտնելու դատարանի դահլիճ:

Լ.Սահակյանն ընդգծեց, որ նախագահող դատավորն այն դատավորն է, որը թույլ է տվել շատ ավելի կոպտագույն՝ Մարդու իրավունքների եվրոպական կոնվենցիայի երրորդ հոդվածի՝ Խոշտանգումների արգելում, խախտումներ: Այսինքն՝ անձին բռնության են ենթարկել իր նախագահությամբ քննվող գործի քննության ժամանակ՝ արդեն իսկ դահլիճից սկսած, ապա բռնությունը շարունակվել է և ձայներն էլ լսելի են եղել նրան: Այն դեպքում որ պաշտպանները՝ լսելով ձայները, Մարդու իրավունքների պաշտպան են հրավիրել, դատավորն ասում է, որ ինքը ոչ մի բան չի լսել ու չգիտի:

«Եթե ինքը չի լսել, չգիտի, արդեն իսկ դատավոր լինելու իրավունք չունի, որովհետև իր պարտականությունն է, որպեսզի ինքն այդ ամեն ինչից տեղյակ լինի: Ավելին, ակնհայտ է, որ մեղադրող և պաշտպանական կողմի միջև կա ակնհայտ տարբերակված մոտեցում»,- ասաց Լ.Սահակյանը՝ ընդգծելով, որ ակնհայտ է, որ դատավորը կաշկանդված է և բոլոր գործողություններով ամեն ինչ արվում է, որպեսզի թույլ չտան նորմալ դատավարություն իրականանալու:

Անդրադառնալով սանկցիաների հարցին՝ Լուսինե Սահակյանը նշեց, որ ակնհայտ երևում է՝ ամեն ինչ արվում է, որպեսզի դատավարությունը ընթանա ամբաստանյալների և պաշտպանների բացակայությամբ կամ առնվազն գոնե այն պաշտպանների ներգրավմամբ, ովքեր լռելյայն ընդունելու են դատարանի և մեղադրողների ցանկացած գործելաոճ: «Մենք նախկինում ունեցել ենք նախադեպեր, երբ որ ներգրավվել են հանրային պաշտպաններ, և քանի որ անձինք չեն ցանկացել, որպեսզի նրանք պաշտպանեն իրենց, ուստի այդ հանրային պաշտպանները լքել են դատարանի դահլիճը հենց այն պատճառաբանությամբ, որ մենք իրավունք չունենք գտնվելու դատարանի դահլիճում՝ անձը ցանկություն չի հայտնել, որ իր պաշտպանությունը մենք իրականացնենք: Եթե գտնվեն այնպիսի հանրային պաշտպաններ, ովքեր պետք է մնան դատարանի դահլիճում, ակնհայտ է, որ համագործակցված աշխատելու են մեղադրողը, դատավորը և այդ պաշտպանները»,- ասաց Լուսինե Սահակյանը՝ միաժամանակ ընդգծելով, որ ինքը մեծ հույս ունի, որ հանրային պաշտպաններն էլ իրենց բարձր դիրքերում կմնան և չեն մտնի այսպիսի խաղի մեջ:

Դատարանն ինչո՞ւ է ցանկանում առանց ամբաստանյալների ու պաշտպանների քննել գործը հարցին ի պատասխան Լուսինե Սահակյանը ակնհայտ համարեց, որ նրանք չեն ուզում լսել ճշմարտությունը և չեն ցանկանում, որպեսզի հասարակությունն էլ իմանա այդ ճշմարտությունը և հասարակության առաջ չբացահայտվեն այն ապօրինությունները, որոնք կատարվել են այս գործով:

Ամբաստանյալներին դատարանի շենքում ծեծի ենթարկելու գործն, ինչպես և խոշտանգումների վերաբերյալ, առավել ևս քաղաքական այլ գործերի քննության պարագայում, ուղղակի երկար-երկար քննելու են, որպեսզի Եվրոպական դատարանին հետո կարողանան ասել, որ մենք համենայն դեպս քննություն կատարել ենք, հետո կարճելու են:

Դատարանի՝ դատական նիստերի դահլիճ մտնելիս ոտքի չկանգնելն, ըստ էության դա ամբաստանյալների որոշումն է եղել: «Պատկերացնում եք, չէ՞, որ նրանք այն անձինք են, ովքեր չեն վախենում սանկցիաների կիրառումից, մարդիկ են, ովքեր իրենց կյանքն են պատրաստ եղել զոհել հանուն գաղափարի: Այդ գաղափարը կլինի շատերի համար ընդունելի կամ անընդունելի՝ դա այլ հարց է, բայց սա այն անձինք են, ովքեր իրենց գաղափարի համար պատրաստ են եղել մահանալ: Հիմա դատավորը սանկցիա կիրառելով ինչի՞ պետք է հասնի՝ ոչնչի»,- ասաց Լ.Սահակյանը՝ նշելով, որ ըստ իրենց գաղափարախոսության, քանի որ ապօրինի ռեժիմ է, մենք չենք պատրաստվում հարգել դատարանին:

Ամենակարևորը՝ դատարանը պետք է մի քիչ շրջահայաց լիներ հասկանալու համար, որ սա այն գործը չէ, որի շրջանակներում պետք է նման մեթոդներով ամբաստանյալների վրա ազդել: «Ես տեսնում եմ, որ դատարանը համենայն դեպս նման ցանկություն չունի, և դատարանն, ընդհակառակը, օգտվում է այս իրավիճակից և ուղղակի ամեն ինչ անում է, որպեսզի առանց ամբաստանյալների, առանց պաշտպանների լռելյայն դատավարություն իրականացվի»,- ասաց Լուսինե Սահակյանը:

Աղբյուր` Փաստինֆո