Փաստ ինֆո

Ուղեկցող գումարտակի հրամանատար, փոխգնդապետ Ղազարյանը, ով պաշտպանական կողմի տվյալներով, առերևույթ բռնություններ է կիրառել ու ղեկավարել Պավլիկ Մանուկյանի և մյուսների գործի քննության ժամանակ, այսօր՝ «Սասնա Ծռեր»-ի մյուս գործով դատական նիստի ժամանակ այսօր գտնվում էր դատական նիստերի դահլիճում, այսինքն՝ նրա գործունեությունը կասեցված չէ:

«Սասնա Ծռեր»-2-ի գործով այսօրվա դատական նիստում այս մասին հայտարարություն արեց ամբաստանյալ Արամ Մանուկյանի պաշտպան, փաստաբան Ինեսսա Պետրոսյանը՝ հիշեցնելով, որ իր ունեցած տվյալներով, Պավլիկ Մանուկյանի և մյուսների գործի ժամանակ իր պաշտպանյալ Մխիթար Ավետիսյանին բռնի ուժով, անհարկի, ծեծելով, ջարդելով հանել էին դատական նիստերի դահլիճից դուրս և այնտեղ սկսել խոշտանգել հենց միջանցքում, իսկ հետո էլ արդեն խցերում են սկսել ուժգին ծեծի ենթարկել: Այդ օրը խոշտանգվել էր ոչ միայն Մխիթար Ավետիսյանը, այլև Արեգ Կյուրեղյանը և Արայիկ Խանդոյանը:

«Եվ ուղղակի ես այսօր իրեն տեսնում եմ դատական նիստերի դահլիճում, ինչն ինձ, իհարկե, հունից հանեց, մի անձ, որն առերևույթ արդեն բռնություններ է կիրառում ու ղեկավարում, ինքը նորից գալիս է, այդ ուղեկցումներն է կատարում, և դա դատարանի աչքի առջև: Ես դրա համար որոշեցի դատարանի ուշադրությունն այդ հանգամանքի վրա հրավիրել, մանավանդ որ դատարանը փաստորեն իր հայտարարություններով ցույց է տալիս, որ տեղյակ է, թե ինչ է կատարվում դատարանից դուրս և այլն, իրեն զեկուցում են: Այսօր էլ ես հայտարարեցի, բա Դուք չե՞ք տեսնում Ձեր կողքին կանգնած է մի անձ, որի մասին արդեն իսկ գիտենք, տեղյակ ենք ՀՔԾ-ն հաղորդագրություն է տարածել, որ նաև քրեական գործ է հարուցվել»,- «Փաստինֆո»-ի լրագրողի հետ զրույցում հայտարարեց Ինեսսա Պետրոսյանը:

Պաշտպանը հավելեց, որ իհարկե, անմեղության կանխավարկածը հարգելով՝ իրենք չեն կարող այսօր ասել, որ այդ անձն է կատարել, սակայն առերևույթ, խոսակցություններն այնպես են գնում, որ իր կողմից է այդ ամենը կազմակերպվել ու ղեկավարվել: «Ուստի ես գտնում եմ, որ նույն ոստիկանապետ Վովա Գասպարյանն պետք է թույլ չտար, որ այստեղ գտնվեր այդ անձնավորությունը, և նրա գործունեությունը պետք է որ կասեցված լիներ»,- ընդգծեց փաստաբանը:

Աղբյուր` Փաստինֆո