Փաստ ինֆո

«Սասնա Ծռեր»-2-ի գործով այսօրվա դատական նիստում ևս դատարանը նախապատրաստական փուլը չհաղթահարեց՝ հակառակ գործադրած բոլոր ջանքերին:

Դատարանը, հակառակ պաշտպանական կողմի առարկություններին, շարունակեց նիստն անցկացնել մի շարք պաշտպանների բացակայությամբ: Նրանց բացակայությունը խոչընդոտ չհանդիսացավ նաև դատարանին ինքնաբացարկի և դատական նիստերի քարտուղարին բացարկ հայտնելու հարցերը քննության առնելիս: Այս կապակցությամբ հնչած քննադատությանն ի պատասխան՝ դատարանն արձագանքեց՝ երբ փաստաբանները կգան, այն ժամանակ էլ կքննարկենք:

Իսկ ամբաստանյալ Արամ Մանուկյանի պաշտպան, փաստաբան Ինեսսա Պետրոսյանը նկատեց, որ աղմկահարույց մեկ այլ՝ Վահան Շիրխանյանի և մյուսների գործով, որը նույնպես գտնվում է նախապատրաստական փուլում, դատարանը պաշտպանի կամ պաշտպանների բացակայության պարագայում դատական նիստը միանգամից հետաձգում է:

Դատական նիստին ներկա չէին գործով 18 ամբաստանյալից 15-ը՝ նրանց հանդեպ դատարանը նախորդ նիստում դատական սանկցիա էր կիրառել և հեռացրել դատական նիստերի դահլիճից: Այսօր նրանց միացան նաև դահլիճում մնացած երեք ամբաստանյալները՝ նրանք հայտարարեցին, որ իրենք ուզում են լինել հեռացված ամբաստանյալների կողքին:

Մասնավորապես, ամբաստանյալ Արամ Մանուկյանը հայտարարեց, որ ինքը միանում է իր ընկերներին, չի մնա դահլիճում և թույլ չի տալիս իր պաշտպաններին շարունակել մասնակցել նիստին: Իսկ ամբաստանյալ Հովհաննես Հարությունյանն իր հերթին հայտարարեց. «Մենք հարգում ենք մեր հայրենիքը, նույնիսկ կարող ենք ջարդած ոտքերով կանգնել, բայց ինչո՞ւ մյուսներին չեք բերում, ընկել եք ոտքի կանգնել-չկանգնելու հետևից, խաղ ու պար եք սարքել նիստը»:

Երեք ամբաստանյալների նկատմամբ էլ դատական նիստերի դահլիճից հեռացվելու սանկցիա կիրառվեց, ապա դատարանը նախապատրաստական փուլը շարունակելու մղումով դիմեց նորամուծությունների: Նա արդեն իսկ հեռացված մի քանի ամբաստանյալի՝ առանձին-առանձին, ժամանակավորապես վերադարձրեց դատական նիստերի դահլիճ, ճշտեց նրանց ինքնությունները, ինչպես նաև այն, թե ստացե՞լ են մեղադրական եզրակացությունները և նրանց իրավունքներն ու պարտականությունները պարզաբանող դատարանի հուշաթերթիկը:

Հընթացս որոշվեց այդ ամբաստանյալների պաշտպանների ներգրավման հարցը: Մասնավորապես, դատարանը ճանաչեց փաստաբաններ Գրիշա Բալասանյանի, Արա Ղարագյոզյանի և Հայարփի Սարգսյանի լիազորությունները համապատասխանաբար որպես ամբաստանյալներ Տիգրան Սարգսյանի, Մանվել Աթոյանի և Հովհաննես Հարությունյանի պաշտպաններ: Դատարանը ճանաչեց նաև հանրային պաշտպաններ Կարեն Մեժլումյանի և Անուշ Մխիթարյանի լիազորությունները՝ համապատասխանաբար՝ որպես Մանվել Գևորգյանի և Հովհաննես Վարդանյանի պաշտպաններ:

Ինչպես «Փաստինֆո»-ի լրագրողի հետ զրույցում հայտնեց ամբաստանյալ Արամ Մանուկյանի պաշտպան Ինեսսա Պետրոսյանը, տեղեկություն ստացվեց, որ ժամանակավոր դատական նիստերի դահլիճ վերադարձվելուց հրաժարվել է իր պաշտպանյալը:

«Եվ ճիշտ արեց, իհարկե, որովհետև սա աննախադեպ իրավիճակ է: Սա մի սցենար է, որը որ գրվում է, այս պահին էլ, երբ դատավորը նստում է դահլիճում, իր համար այնտեղ անձինք կան, ովքեր այդ սցենարին օնլայն հետևում և գրում են: Նա էլ չգիտե իր հաջորդ քայլը, դա ինձ համար գոնե ակնհայտ է»,- ասաց Ինեսսա Պետրոսյանը:

Ի դեպ, այսօրվա նիստում դատարանն իր որդեգրած մարտավարությունից չհրաժարվեց՝ նա դատական սանկցիա կիրառեց ամբաստանյալներ Արայիկ Հակոբյանի և Մարտիրոս Հակոբյանի պաշտպաններ, փաստաբաններ Լուսինե Սահակյանի ու Երվանդ Վարոսյանի նկատմամբ՝ առանց իր թույլտվության դատարանի դահլիճը լքելու համար դատարանը որոշեց դիմել Փաստաբանների պալատին՝ փաստաբաններին պատասխանատվության ենթարկելու համար:

Հարկ է նշել, որ փաստաբանները հեռացել էին դատական նիստերի դահլիճից, քանի որ նրանց պաշտպանյալները չէին լիազորել պաշտպաններին իրենց բացակայությամբ մասնակցել դատական նիստին:

Աղբյուր` Փաստինֆո