Փաստ ինֆո

Քրեական հեղինակություն համարվող Թևոսիկի եղբոր՝ Արթուր Սաֆարյանի, սպանության և դա թաքցնելու համար Մովսես Ներսիսյանի սպանության գործով վերսկսված դատաքննությանն այսօր դատարանում հարցաքննվեց երկու փորձագետ:

Գործով ամբաստանյալ Իսրայել Սարգսյանի և Տիգրան Ասատրյանի խոսակցության (որի ընթացքում ամբաստանյալը հայտնել է Արթուր Սաֆարյանի սպանությունը կազմակերպելու և Մովսես Ներսիսյանի սպանությունը կատարելու մասին) ձայնագրությունը փորձաքննության ենթարկած փորձագետն ասած, որ կրճատումների ենթարկված ձայնագրությունը հինգ հատվածներից է բաղկացած, յուրաքանչյուր հատված հաջորդ հատվածից անջատված է աստղանիշներով:

Փորձագետը՝ պատասխանելով պաշտպանական կողմի հարցերին, հայտնեց, որ տեխնիկապես հնարավոր է բառ մտցնել կամ բառերը հետ ու առաջ տանել ձայնագրության մեջ, սակայն նման միջամտության, մոնտաժի հետքեր չեն հայտնաբերվել: Հնարավո՞ր է, որ ձայնագրվել են տարբեր օրերի խոսակցություններ ու իրար միացվել հարցին (այս մասին իր վերջին խոսքում հայտարարել էր Իսրայել Սարգսյանը)՝ փորձագետը հայտարարեց, որ միջավայրը չի փոխվել, ձայնագրող սարքի հանդեպ խոսողների հեռավորությունն ու աղմուկը նույնն է, որևէ տարբերություն չկա:

Իսկ Մովսես Ներսիսյանի դիակը չհայտնաբերելու հարցի հետ կապված (նա ենթադրաբար սպանվել ու կոյուղատարի դիտահորն է նետվել) դատարան հրավիրված մեկ այլ փորձագետը հայտնեց, որ դիտահորում կարող են պահպանված լինել դիակի կմախքային ոսկորները և մասնակիորեն փափուկ հյուսվածքները: Եթե կա դիակը, կմախքային ոսկորները պետք է պահպանվեին, թե ուր է դրանք քշել-տարել ջուրը, հայտնի չէ:

Դատարանը առաջարկեց հիմնականում ձայնագրության շուրջ լրացուցիչ հարցաքննել Իսրայել Սարգսյանին: Վերջինս դատարանից ժամանակ խնդրեց հարցաքննությանը նախապատրաստվելու համար, դատական նիստը հետաձգվեց մինչև հուլիսի 10-ը:

Աղբյուր` Փաստինֆո