Փաստ ինֆո

«Սասնա Ծռեր»-ի գործով ամբաստանյալ Արայիկ Խանդոյանի պաշտպան, «Ընդդեմ իրավական կամայականության» ՀԿ փաստաբան Արա Ղարագյոզյանն այսօր դիմում է գրել «Նուբարաշեն» քրեակատարողական հիմնարկի պետին՝ պահանջելով իրեն տրամադրել իր պաշտպանյալի վնասվածքների վերաբերյալ քաղվածքը և նրան տանել քաղաքացիական հիվանդանոց՝ գլուխը համակարգչային տոմոգրաֆիայի ենթարկելու համար: 

Այս մասին «Փաստինֆո»-ին հայտնեց Արա Ղարագյոզյանը:

Պաշտպանը մտավախություն ունի, որ դատարանի նկուղում խոշտանգման ենթարկվելու հետևանքով Արայիկ Խանդոյանը առողջական լուրջ խնդիրներ ունի: «Խոշտանգման ենթարկված զոհերը պետք է պատշաճ բուժօգնություն ստանան, մինչդեռ արդեն քանի օր է անցել այդ դեպքից, սակայն նրա գլուխը չեն նկարել: Արայիկ Խանդոյանն ինձ ասաց, որ ահավոր հարվածներ են հասցվել իր գլխին»,- ասաց փաստաբանը:

Արա Ղարագյոզյանն ասաց, որ այսօր տեսակցել է իր պաշտպանյալին, ում երբևէ նման վիճակում չէր տեսել: Ըստ պաշտպանի, Արայիկ Խանդոյանը շատ վատ վիճակում է, ահավոր գլխացավեր ու գլխապտույտներ ունի, գլխի հետևի մասում հարվածի ենթարկված տեղերում կարծես թե նորագոյացություն լինի, ուռած տեղեր կան: «Աչքերի բիբերը վերև են թռած, շշմածություն է մոտը, հետը որ խոսում ես, շատ բաներ չի կարող ընկալել, որ ոտքի կանգնեց, գլխապտույտներ ուներ, այսինքն՝ ծայրահեղ ծանր վիճակում էր»,- ասաց Արա Ղարագյոզյանը:

Աղբյուր` Փաստինֆո