Փաստ ինֆո

Եվրամիությունը շարունակելու է տրամադրել իր հզոր աջակցությունը Հայաստանում քաղաքացիական հասարակության ձևավորմանը: «Արմենպրես»-ի հաղորդմամբ՝ այս մասին Եվրամիության
կողմից ֆինանսավորվող «Քաղաքացիական հասարակությունը հանուն զարգացման» խորագրով քննարկմանը հայտարարեց Հայաստանում Եվրամիության պատվիրակության ղեկավար, դեսպան Պյոտր Սվիտալսկին:

«Մեր առաջնահերթություններից է, եւ կարծում ենք, որ այն կարեւոր է Հայաստանի քաղաքացիների համար հատկապես մարզերում, որտեղ մենք խթանելու ենք տեղական առաջընթացը, աշխատատեղերի ստեղծումը, բիզնեսի զարգացումը:

Առաջին անգամն է, որ փորձում ենք այս փոքր դրամաշնորհների սխեման ներկայացնել Հայաստանում»,- ասաց նա:

Միջոցառմանը ներկա էին նաեւ լեհական պատվիրակության փորձագետները, եւ դեսպան Սվիտալսկին հույս հայտնեց, որ նրանք կկարողանան հայկական կողմին փոխանցել ՀԿ և ՏԻՄ կառավարման լեհական փորձը: Նրա վստահեցմամբ՝ լեհական ինքնակառավարման համակարգը հաջողված է, և Հայաստանն այս առումով շատ բան ունի սովորելու լեհ գործընկերներից:

«Ես շատ ուրախ եմ, որ ՀՀ կառավարությունը մտածում է ՏԻՄ-երի զարգացման մասին: Ինչ վերաբերում է լեհական տրանսֆորմացիային, ապա դա շատ ամուր, հզոր քաղաքացիական հասարակություն է: Լեհաստանում քաղաքային շատ բյուջեներ որոշվում են նույն այդ համայնքների քաղաքացիական հասարակության ներկայացուցիչների կողմից:

Այդ մարդիկ քվեարկում են, թե ինչ ծրագրեր են ուզում իրականացնել»,- նշեց ԵՄ պատվիրակության ղեկավարը եւ վկայականներ հանձնեց այն 17 հասարակական կազմակերպություններին, ում ներկայացրած ծրագրերը ԵՄ անկախ փորձագետների կողմից արժանացել են լավագույն գնահատականին:

Նրանց շարքում են Արմավիրի զարգացման կենտրոնը, «Զինվորի մայր» ՀԿ-ն, Գյումրու երիտասարդական նախաձեռնությունների կենտրոնը, «Ընտանիք եւ համայնք» ՀԿ-ն, Գորիսի զարգացման կենտրոնը եւ այլն: Ներկայացված ծրագրերի թիրախներն են եղել երիտասարդությունն ու երեխաները, կրթությունը, մշակույթը եւ զբոսաշրջությունը, մարդու իրավունքներն եւ քաղաքացիական ակտիվությունը, ինչպես նաեւ ձեռնարկատիրությունը:

Ծրագիրը բաղկացած է երեք փուլից և շարունակվելու է մինչև 2018 թվականի սեպտեմբեր ամիսը: Ծրագրի ընդհանուր բյուջեն կազմում է 2.7 միլիոն եվրո:

Աղբյուր` Փաստինֆո