Փաստ ինֆո

Ժիրայր Սեֆիլյանի և մյուսների գործով այսօրվա նիստն սկսվեց առանց միջադեպերի. համենայնդեպս դատարան մուտք գործող փաստաբանների զննության հետ կապված որևէ խնդիր չառաջավ:

Նշենք նաև որ այսօր դատարան մուտք գործելիս նկատեցինք, որ զննության էին ենթարկվում ոչ միայն այս գործով դատախազները, այլև` այլ գործերով դատախազները:

Նիստի մեկնարկին մեղադրող դատախազ Պետրոս Պետրոսյանը դատարանին գրությամբ տեղեկացրեց, որ մեղադրանքի պաշտպանությանը ներգրավվել է նաև ՀՀ գլխավոր դատախազության ԱԱԾ մարմիններում քննվող, թմրանյութերի ապօրինի շրջանառության հետ կապված և կիբերհանցագործությունների գործով վարչության պետի տեղակալ Հակոբ Ենոքյանը:

Դատարանը, նախագահությամբ Տաթևիկ Գրիգորյանի, դիմելով պաշտպանական կողմին, ասաց, որ ներկայումս պաշտպանների ներգրավման փուլն է, բայց քանի որ գործին ներգրավվում է նոր մեղադրող, նրանց հարցրեց՝ բացարկ ունե՞ն մեղադրողին, թե՝ ոչ:

Մինչ պաշտպանական կողմը կանցներ դատախազի բացարկ հայտնելուն, փաստաբան Արայիկ Պապիկյանը հայտարարությամբ հանդես եկավ իր պաշտպանյալի՝ Ներսես Պողոսյանի՝ դատարանում ներկա չգտնվելու վերաբերյալ: Դատարանն էլ պաշտպանին պարզաբանեց, որ ամբաստանյալն իր գործողություններով է իրեն զրկել դատաքննությանը մասնակցելու իրավունքից:

Դատարանն արգելեց հարցի վերաբերյալ փաստաբան Նինա Կարապետյանցին դիրքորոշում հայտնել՝ ասելով, որ վերջինս դեռևս ներգրավված չի գործոմ՝ որպես պաշտպան:

Կարապետյանցը լքեց դատական նիստերի  դահլիճը:

Նշենք նաև, որ այսօր հանրային պաշտպանի գրասենյակից ներկայացել էր փաստաբան Արկադյա Գևորգյանը, ով պետք է ներկայացնի ամբաստանյալ Գալուստ Գրիգորյանի շահերը:

Ամբաստանյալը, ով նախորդ նիստում հեռացվել էր դատական նիստերի դահլիճից, դատարանի կողմից ներս հրավիրվեց, որից հետո ամբաստանյալը հայտարարեց, որ ուղղակի չի ցանկանում, որ այդ պաշտպանը ներկայացնի իր շահերը, որպեսզի այլ բարդություններ չլինեն, քանի որ հարց կառաջանա դատական նիստը հետաձգելու, գործի նյութերին ծանոթանալու առումով:

Ի պատասխան՝ դատարանն ասաց, որ այդ հարցը դեռևս չի քննարկվում և գործում ներգրավեց պաշտպան Գևորգյանին:

Աղբյուր` Փաստինֆո