Փաստ ինֆո

ՀՀ ազգային ժողովի դիմաց հուլիսի 4-ին բնապահպանները կազմակերպեցին բողոքի ցույց՝ ուղղված «Սեւանա լճի էկոհամակարգի վերականգնման, պահպանման, վերարտադրման եւ օգտագործման միջոցառումների ու տարեկան համալիր ծրագրերը ուհաստատել մասին» ՀՀ օրենքում լրացումներ կատարելու մասին նախագծի դեմ:

«Արմենպրես»-ի հաղորդմամբ` բնապահպանները պահանջում են կասեցնել ՀՀ կառավարության կողմից առաջարկված սույն նախագիծը, քանի որ այնտեղ Սևանա լճից հավելյալ 100 միլիոն խորանարդ մետր ջուր բաց թողնելու վերաբերյալ առաջարկ է ներկայացվել: Բնապահպանների խոսքով` դա կարող է մեծ վնաս հասցնել Սևանա լճի էկոհամակարգին: Ակտիվիստները պաստառ փակցրեցին Ազգային ժողովի դիմաց, որի վրա գրված էր. «Սևանում հավելյալ ջուր չկա»:

«Հայաստանի անտառներ» ՀԿ տնօրեն, էկոլոգ-իրավաբան Նազելի Վարդանյանի խոսքով` ներկայումս Սևանա լճից ոռոգման նպատակներով 170 միլիոն խորանարդ մետր ջուր է օգտագործվում, որը նույնպես բավականին շատ է:

«Պետք է հստակ հաշվարկներ կատարվեն, թե ինչքան ջուր է անհրաժեշտ բաց թողնելու համար, որը չի վնասի Սևանա լճի էկոհամակարգը: Բացի այդ, «Շրջակա միջավայրի մոնիտորինգ և տեղեկատվության կենտրոն» ՊՈԱԿ-ի ներկայացրած տեղեկանքի համաձայն` Սևան լճի բաղադրությունը փոխվել է`մագնեզիումի, սելենիումի, վանադիումի, քրոմի, պղնձի սահմանային խտացումները բավականին բարձր են և չի կարելի այդ ջուրը օգտագործել ոռոգման համար: Օրինակ` մագնեզիումը կոշտացնում է հողը, քարացնում է և նպաստում աղակալմանը, իսկ սելենիումը ընդհանրապես թունավոր նյութ է»,- ասաց Նազելի Վարդանյանը:

Բնապահպան Լևոն Գալստյանը նշեց, որ պետք է բնապահպաններին հնարավորություն տրվի համացանցի միջոցով դիտարկումներ կատարել, թե Սևանա լճից ինչքան ջուր է բաց թողնվում:

«2001-2010 թվականներին Սևանի ջրի մակարդակը բավականին արագ բարձրացավ` 3-3,5 մետր, և ջրի որակը բավականին լավացավ` պղտորությունը պակասեց, թթվածնի պարունակությունն ավելացավ, բայց 2011 թվականից ջրի մակարդակի բարձրացման գործընթացը կանգնեց, ջրի որակի բարելավումը ևս դադարեց և նորից սկսեց վատանալ»,- ընդգծեց Գալստյանը:

Աղբյուր` Փաստինֆո