Փաստ ինֆո

Ժամեր առաջ Սուրբ Խաչ և Սուրբ Երրորդություն Հույսի Խորան Հաղորդարանում տեղի ունեցավ Խաչադրման արարողությունը:

Մեծ ոգևորությամբ և բարձր տամադրությամբ, հանդիսավոր կերպով հայ ազգի հերոս յոթ զինծառայողների խաչքավորությամբ տեղադրվեց 1717-րդ խաչը:

Հակառակորդը վերջին շրջանում շատ է ոտնձգություններ իրականացրել, առավել ևս ապրիլյան պատերազմի ժամանակ, սակայն հայոց բանակի և քաջ տղաների անձնուրաց ծառայության շնորհիվ արժանի հակահարված տրվեց եւ ապահովվեց մեր երկրի անվտանգությունը:

Պատերազմի թոհ ու բոհով անցած յոթ քաջորդիներին խաչքավորության վստահումը իրենք մեկ բառով՝ պատիվ որակեցին:

«Ես ինքս վիրավորվել եմ մարտական առաջադրանք կատարելիս, կորցել եմ ստորին վերջույթներս և մեկ ձեռքս, հիմա պրոթեզներով եմ կանգնած այս սուրբ հողի վրա և մասնակցում եմ այս միջոցառմանը, բայց հավատացեք՝ շատ ամուր եմ կանգնած և մեծ հավատքով»,-ասաց մերօրյա հերոս, ՀՀ զինված ուժերի մայոր Սարգիս Ստեփանյանը, ով 1717-րդ խաչի քավորներից մեկն է:

2016թ. ապրիլի 2-ին Թալիշում հակառակորդի դիվերսիոն խումբը ոչնչացրած հերոս հայորդիներց մեկն էլ Հարություն Բադալյանը մարտական ընկերների անունները թվարկելիս` Վլադիմիր Մելքոնյան, Նարեկ Գրիգորյան մի պահ լռեց, ապա ավելացրեց՝ մենք պետք է միասնականան լինենք, եթե հակառակորդը տեսնի, որ մենք միասնական ենք ինչպես ապրիլին, ինձ չի թվում, որ նա ռիսկ կանի հարձակվի մեր դիրքերի վրա:

Հարությունը իր զինակից ընկների հետ ոչնչացրել է հակառակորդի դիվերսոն խումբը, որը բաղկացած է եղել 20 հոգուց:

«Ապրիլի 2-ին` գիշերով, հանկարծակի փորձեցին մեր դիրքեր ներխուժել և գրավել, մենք նկատեցինք և մարտի բռնվեցինք, ինչի ժամանակ հակառակորդը տվեց 3 զոհ և 7-ից ավելի վիրավոր, իսկ փախուստի դիմածներն էլ իրենց հրամանատարին թողեցին մեր դիրքում»,- հիշում է Հարությունը:

Տնտեսագիտական համալսարանի ուսանող հայորդին ընդգծում է՝ սովորում է, որ ապագայում ևս կարողանա հայրենիքին օգնել:

Իսկ «Մարտական խաչ» 2-րդ աստիճանի շքանշանակիր Արթուր Աղասյանն այսօր էլ շարունակում է ծառայությունը, սակայն աշխատանքի տեսքով, ծառայում է նույն զորամասում. դասակի հրամանատար է: Փոքրամարմին, սակայն խիզախ այս տղան ապրիլյան պատերազմի ժամանակ Թալիշում ջախջախիչ պարտության է մատնել հակառակորդի դիվերսիոն հետախուզական խումբին. իր զինակից ընկերների հետ ստիպել են նահանջել հակառակորդին, ովքեր խուճապի մատնված անգամ իրենց դիակները չեն տարել:

Հերոսացած ընկերների մասին խոսելիս էլ Արթուրի ցանկությունը մեկն էր՝ «պետք է միշտ հիշել մեր նահատակ ընկերներին»:

Նշենք, որ 1717-րդ խաչի խաչքավորներ են Սարգիս Ստեփանյանը, Արման Ադամյանը, Արթուր Աղասյանը, Հարություն Բադալյան, Ռաֆիկ Կրպեյանը, Նարեկ Մալխասյանը և Մարատ Պետրոսյանը:

Աղբյուր` Փաստինֆո