Փաստ ինֆո

Շուրջ մեկ տարի առաջ «Սլավմեդ» բժշկական կենտրոնում կեսարյան հատման եղանակով ծննդալուծված Տաթևիկ Գասպարյանի մահվան գործով մեղադրանք է առաջադրվել նշված ԲԿ-ի երկու բժշկի:

«Փաստինֆո» -ի հարցմանն ի պատասխան՝ Քննչական կոմիտեից հայտնեցին, որ հարուցված քրեական գործի շրջանակներում մեղադրանք է առաջադրվել մանկաբարձ-գինեկոլոգ Լ. Դաղբաշյանին և հերթապահ բժիշկ Կ. Բաղդասարյանին՝ ՀՀ քրեական օրենսգրքի 130-րդ հոդվածի 2-րդ մասով:

Ավելի վաղ տեղեկացրել էինք, որ 28-ամյա Տաթևիկ Գասպարյանը 2015թ. դեկտեմբերի 25-ին հաշվառվել է «Սլավմեդ» բժշկական կենտրոնում, կնոջ հղիությունը վարել է նշված ԲԿ-ի մանկաբարձ-գինեկոլոգ Լիանա Դաղբաշյանը:

Մինչև կեսարյան հատում կատարելու մասին որոշում կայացնելը հղին պարբերաբար այցելել է բժշկական կենտրոն՝ կոնսուլտացիաների, ստուգումների, անհրաժեշտության դեպքում ստացել է նաև համապատասխան բուժումներ:

Կատարված հետազոտությունների ժամանակ պարզվել է, որ պտղի պորտալարը երկու անգամ փաթաթված է պարանոցին, ինչն էլ պատճառ է հանդիսացել՝ հղիի ծննդալուծումը կեսարյան հատման եղանակով կատարելու:

Ուստիև, պայմանավորվածության համաձայն, 2016թ.-ի հուլիսի 26-ին՝ առավոտյան, հղին գնացել հիվանդանոց և ժամը 11:45-ին կատարվել է վիրահատությունը:

Իսկ ժամեր անց՝ ժամը 16:00-ին, բժիշկ Լիանա Դաղբաշյանը գտել է, որ ծննդկանի վիճակը բավարար է և վաղաժամ կազմակերպել է նրան հիվանդասենյակ տեղափոխելու հարցը:

Մեր տեղեկություններով՝ նույն օրը երեկոյան ծննդկանի ինքնազգացողությունը վատացել է, իսկ արդեն հուլիսի 26-ի լույս 27 գիշերը, երբ կինը նեղ մասնագետների կողմից հետազոտման է ենթարկվել, նրա մոտ ենթաապոներոզիկ տարածության հեմատոմիա է հայտնաբերվել:

Որոշում է կայացվել նրան կրկնաորովայնահատում կատարել՝ հետվիրահատական բարդության՝ հետապոնևրոտիկ հեմատոմայի առաջացման պատճառով, որի ժամանակ մինչվիրահատական և վիրահատությունների ընթացքում առաջացած արյունահոսությունից համապատասխան քանակությամբ արյան ընդհանուր կորուստը կոմպենսացնելու և հիվանդի վիճակի հետ կապված՝ կատարվել է թարմ սառեցված պլազմայի փոխներարկում:

Սակայն վիրահատության ավարտին կնոջ մոտ թոքերի այտուց է առաջացել է, և նրան հուլիսի 27-ին ժամը 08:00-ի սահմաններում տեղափոխել են «Արմենիա» ՀԲԿ-ի վերակենդանացման բաժանմունք:

Ժամեր անց բուժմանը չենթարկվող թոքերի այտուց, թոքերի սուր ռեսպիրատոր դիստրես համախտանիշից Տաթևիկ Գասպարյանը մահացել է:

Ինչն է պատճառ հանդիսացել, որ բժշկուհին վաղաժամ որոշում է կայացրել ծննդկանին տեղափոխել հիվանասենյակ, փոխարենը հետվիրահատական վիճակի դինամիկ հսկողություն սահմանելու և խնդիրների առաջացման պարագայում անմիջապես նեղ մասնագետների կողմից հետազոտության նեթարկելու՝ հայտնի կդառնա գործով դատաքննության ընթացքում:

Մեր տեղեկություններով՝ քրեական գործով նախաքննությունն ավարտվել է, և գործն ուղարկվել է դատարան:

Նշենք նաև, որ գործով անցնող մյուս մեղադրյալը «Սլավմեդ» ԲԿ-ի ծննդատան հերթապահ բժիշկ Կարեն Բաղդասարյանն է, ով, ըստ մեր տեղեկությունների, մասնագիտական պարտականությունները պատշաճ չի կատարել՝ ժամանակին չի ձեռնարկել որակյալ ախտորոշիչ կարևորություն ունեցող հետազոտություններ, իսկ հիվանդի որովայնի օրգանների ուլտրաձայնային հետազոտության արդյունքում՝ եզրահանգել է, որ կեսարյան վիրահատությունից հետո կնոջ մոտ բարդություններ չեն հայտնաբերվել, և Գասպարյանի առողջական վիճակը գնահատել է բավարար:

Մինչդեռ նեղ մասնագետների կողմից ժամեր անց կատարված ուլտրաձայնային հետազոտությամբ այլ պատկեր է եղել. կնոջ մոտ հայտնաբերվել է ենթաապոնևրոտիկ տարածության արյունահավաք:

Այնինչ, ժամանակին ճիշտ ախտորոշում դնելու դեպքում, հնարավոր կլիներ վիրահատական միջամտությունն ավելի շուտ իրականացնել՝ արյունահոսությունը դադարեցնել՝ միևնույն ժամանակ ձեռնպահ մնալով պլազմայի ներարկումից:

Աղբյուր` Փաստինֆո