Փաստ ինֆո

Հանրային մեծ հնչեղություն ունեցող Օֆշորի գործով դատավարությունը դատական վիճաբանությունների փուլում է: Արդեն իսկ մեղադրողը հանդես է եկել մեղադրական ճառով՝ պնդելով մեղադրանքն ողջ ծավալով և միջնորդելով ամբաստանյալ Աշոտ Սուքիասյանին դատապարտել 15 տարվա ազատազրկման:

Հիշեցնենք, որ Աշոտ Սուքիասյանը մեղադրվում է ՀՀ քրեական օրենսգրքի 190-րդ հոդվածի 3-րդ մասի 1-ին կետով՝ առանձնապես խոշոր չափերով հանցավոր ճանապարհով ստացված եկամուտներն օրինականացնելը (փողերի լվացումը), 178-րդ հոդվածի 3-րդ մասի 1-ին կետով՝ առանձնապես խոշոր չափերի խարդախություն, և 205-րդ հոդվածի 2-րդ մասով՝ առանձնապես խոշոր չափերով հարկերը վճարելուց չարամտորեն խուսափելը:

Այսօրվա դատական նիստում նախատեսվում էր, որ ճառերով հանդես կգան տուժող Փայլակ Հայրապետյանն ու նրա ներկայացուցիչները, սակայն դատական նիստը հետաձգվեց ամբաստանյալի պաշտպան Յուրիկ Խաչատրյանի բացակայության պատճառով: Նա տեղեկացրել էր դատարանին, որ մահացել է իր ազգականն, ինքը մեկնել է Արթիկ, խնդրել է իր բացակայությունը հարգելի համարել: Դատարանին անհայտ պատճառով նիստից բացակայում էր նաև մեղադրողը:

Լրագրողների հետ զրույցում տուժող Փայլակ Հայրապետյանը նշեց, որ մեղադրողի կողմից հրապարակված ճառն ամբողջն իրողություն է: Տուժողը միայն առաջարկում է, որպեսզի մեղադրանքի առաջին հոդվածը լինի Հայրենիքի դավաճանությունը: «10 հազար բանվորի աշխատանքից զրկել, նրանք փախած են, ուր են գնում, չգիտեմ, մեր երկիրը դատարկվում է: Միայն իմ ունեցածի համար չպետք է մտածենք»,- ասաց Փ.Հայրապետյանն՝ ընդգծելով, որ պետության նախաձեռնությամբ ինքն իր ունեցածը դրել է, որպեսզի 10 հազար բանվոր աշխատի:

«Եվ ի՞նչ է կատարվել: Բանկի ղեկավարության կողմից կազմվել է բիզնես ծրագիր տասը տարի ժամկետով՝ մինչև 2020թ. այդ բիզնես ծրագիրը ուժի մեջ պետք է լիներ, վեց ամիս հետո իմ ունեցածը բռնագանձել են: Սա Աշոտի հետ միասին մտածված, կազմակերպված՝ նախարարության հետ միասին, բանկի հետ միասին իմ ունեցածը վերցնելու համար»,- ասաց Փ.Հայրապետյանը՝ հավելելով, որ Հայաստանի յուրաքանչյուր քաղաքացի այսօր բանկին պարտք է: «Մենք ճորտ ենք այս բանկերի առաջ»,- ասաց տուժողը:

Փայլակ Հայրապետյանը հայտնեց, որ քաղհայց է ներկայացրել ինչպես Օֆշորի գործի շրջանակում՝ բռնագանձված գույքի արժեքի չափով փոխհատուցման պահանջով: Ի դեպ այդ մասով, ըստ տուժողի ներկայացուցիչ Լուսինե Աղլամազյանի, մեղադրողը գրեթե լռել է:

Քաղհայց է ներկայացվել նաև առանձին՝ քաղաքացիաիրավական կարգով, վնասների գանձման հայցապահանջով: «Դեռ պատրաստվում ենք փորձագիտական եզրակացությունը ստանալու հետ մեկտեղ ավելացնել մեր պահանջի չափը, քանզի արդեն ակնառու է ինչքան վնաս է պատճառվել Փայլակ Հայրապետյանին և իր ազգականներին՝ ոչ միայն Աշոտ Սուքիասյանի, այլև բանկի կողմից գործած գործողությունների արդյունքում»,- ասաց Լուսինե Աղլամազյանը:

Փայլակ Հայրապետյանը նշեց, որ բացի քաղհայցերից իրենք ժամանակին նաև դիմում են հղել ՀՀ նախագահին, ՀՀ գլխավոր դատախազին ու ՀՀ քննչական կոմիտեի նախագահին, որում նշել են, որ դատարան ուղարկված գործն ընդամենը գործի 10%-ն է. «Այս գործը խմբակային բնույթի է հանցագործություն է՝ ոչ միայն Աշոտ Սուքիասյանի մասնակցությամբ»: Տուժողը մեղավորների շարքում հիշատակել է «Ամերիաբանկին» ու նրա մի շարք պաշտոնյաների, էկոնոմիկայի ու ֆինանսների նախարարություններին, Կենտրոնական բանկին:

Դիմումում Փայլակ Հայրապետյանը պահանջում է վերադարձնել իր ունեցվածքը, որը կազմում է 31-32 մլն դոլար, բացի այդ պահանջ է ներկայացրել փոխհատուցել իր աշխատակազմի կրած վնասները՝ մոտ 5 մլն. դոլարի չափով և իր կրած բարոյական վնասը՝ 5 մլն դոլարի չափով: «Պահանջել եմ իմ ընտանիքի յոթը տարվա ողջ ունեցածը, որ պետք է աշխատեի, եկամուտ ստանայի, դա գերազացել է 20 մլն-ը»,- նշեց տուժողը՝ հավելելով, որ ինքը նաև պահանջ է ներկայացրել՝ մեղավորներին պատժել օրենքի ողջ խստությամբ:

Աղբյուր` Փաստինֆո