Փաստ ինֆո

Լոռու մարզի ընդհանուր իրավասության դատարանի դատավճռով կաշառք ստանալու մեղադրանքով 8 տարի ժամկետով ազատազրկման դատապարտված դատավոր Խաչատուր Խաչատրյանի վերաքննիչ բողոքը մերժվել է:

Վերաքննիչ դատարանը՝ մերժել է ամբաստանվող դատավորի պաշտպաններ Կարեն Թումանյանի և Ռուբեն Հակոբյանի վերաքննիչ բողոքը օրինական ուժի մեջ թողնելով 2016թ. օգոստոսի 04-ի առաջին ատյանի դատարանի դատավճիռը:

Ավելի վաղ տեղեկացրել էինք, որ ամբաստանվող դատավորի պաշտպանները վերաքննիչ բողոք էին բերել՝ պահանջելով ամբողջությամբ բեկանել ՀՀ Լոռու մարզի ընդհանուր իրավասության առաջին ատյանի դատարանի դատավճիռը: Կայացնել նոր, գործն ըստ էության լուծող դատական ակտ` ճանաչել և հռչակել ՀՀ քր. օր-ի 311 հոդ. 4-րդ մասով չթույլատրված հանցանքի կատարման մեջ ամբաստանյալ Խաչատուր Ռաֆիկի Խաչատրյանի անմեղությունը:

Միևնույն ժամանակ՝ Խաչատուր Խաչատրյանին արդարացնելու հիմքեր չգտնելու դեպքում պատժի մասով բեկանել բողոքարկվող դատական ակտը և նրա նկատմամբ նշանակել համաչափ արդարացի մեղմ պատիժ` տվյալ հոդվածի սանկցիայով սահմանված նվազագույն չափով և կիրառել ՀՀ քրօրի 70 –րդ հոդվածի դրույթները` պատիժը պայմանականորեն չկիրառել:

Հիշեցնենք, որ 2014թ. դեկտեմբերի 25-ին ՀՀ ազգային անվտանգության մամուլի կենտրոնը տեսանյութ էր հրապարակել, որում ներկայացվում էր, որ ծառայության կողմից իրականացված օպերատիվ-հետախուզական միջոցառումների արդյունքում կաշառք ստանալու պահին ձերբակալվել է ՀՀ Լոռու մարզի ընդհանուր իրավասության դատարանի դատավոր Խաչատուր Խաչատրյանը: Ըստ ԱԱԾ-ի՝ դատավորն իր վարույթում քննվող գործարարի վերաբերյալ քաղաքացիական գործով, նրա օգտին գործողություններ կատարելու համար, պահանջել և ստացել է 20.000 ԱՄՆ դոլար: Ի դեպ, տեսանյութից պարզ էր դառնում, որ դատավորի ցուցումով կաշառք տվող գործարարն ինքն իր ձեռքով է այն դնում գրասեղանի դարակում: Ինքը՝ Խաչատրյանը, գումարին չի դիպչում: Ավելի ուշ Հատուկ քննական ծառայության կողմից գործի վերաբերյալ հաղորդագրություն տարածվեց որում մասնավորապես նշվում էր, որ 2014թ. հոկտեմբերի 2-ի դրությամբ «Զոսեկար» ՍՊԸ-ի պարտքը բանկի հանդեպ կազմել է շուրջ 517 մլն 940 հազ. ԱՄՆ դոլար, իսկ ՍՊԸ-ի պարտավորությունների կատարումն ապահովված է եղել անշարժ գույքի գրավադրմամբ: Դատավոր Խաչատրյանը սնանկության հետագա գործընթացում ինչպես իր լիազորությունների շրջանակում հիշյալ ՍՊԸ-ի տնօրեն Ս. Կարապետյանի օգտին գործողություններ կատարելու, այնպես էլ պաշտոնից բխող հեղինակությունն ու ազդեցությունն օգտագործելով, ՍՊԸ-ի վարկային պարտավորությունների կատարումն ապահովելու նպատակով բանկում գրավադրված անշարժ գույքն աճուրդի եղանակով վաճառքի գործընթացը մինչև 2015թ. մարտ երկարաձգելու, այդ կերպ` Ս. Կարապետյանին գրավադրված գույքը ձեռք բերելու հնարավորություն ընձեռելու դիմաց 2014թ. նոյեմբերին նրանից պահանջել է առանձնապես խոշոր չափերով` 10 հազ. ԱՄՆ դոլար կաշառք: Դատավորի կողմից առանձնապես խոշոր չափերով կաշառք ստանալու պահանջին ՍՊ ընկերության տնօրենը համաձայնել է:

Վերջինիս հետ կայացած մյուս հանդիպումների ժամանակ դատավոր Խ. Խաչատրյանը ավելացրել է սահմանված կաշառքի չափը և 2014թ. դեկտեմբերի 20-ին պահանջել ու 2014թ. դեկտեմբերի 25-ին` ժամը 18.30-ի սահմաններում, հիշյալ դատարանի իր աշխատասենյակում Ս. Կարապետյանից անձամբ ստացել է առանձնապես խոշոր չափերով` 9 մլն 186 հազ. ՀՀ դրամին համարժեք 20 հազ. ԱՄՆ դոլար կաշառք, որից անմիջապես հետո տեղում բռնվել է ԱԱԾ աշխատակիցների կողմից: Խաչատուր Խաչատրյանին մեղադրանք է առաջադրվել ՀՀ քրեական օրենսգրքի 311-րդ հոդվածի 4-րդ մասի 2-րդ և 3-րդ կետերով, և վերջինիս նկատմամբ մինչդատական վարույթում որպես խափանման միջոց ընտրվել է կալանավորումը:

Նշենք նաև, որ առաջին ատյանում մեղադրող դատախազը հիմնավորված համարելով նախկին դատավորին առաջադրված մեղադրանքը միջնորդել էր նրան դատապարտել 9,5 տարի ժամկետով ազատազրկման:

Ավելի վաղ «Փաստինֆո»-ի թղթակցի հետ զրույցում Խաչատուր Խաչատրյանի պաշտպան Ռուբեն Հակոբյանը կարծիք էր հայտնել է, որ իր պաշտպանյալին վերագրվող արարքին սխալ քրեաիրավական գնահատական է տրվել:

Աղբյուր` Փաստինֆո