Փաստ ինֆո

Սպիտակ տունը հայտնել է չափանիշները, որոնց հիման վրա ԱՄՆ իշխանությունները մուտքի թույլտվություն են տալու փախստականներին և մուտքի արտոնագրեր՝ առավելապես մահմեդական բնակչությամբ վեց երկրների քաղաքացիներին:

Ըստ BBC-ի ռուսական ծառայության, շաբաթվա սկզբին ԱՄՆ Գերագույն դատարանը մասամբ վերանայել էր Դոնալդ Թրամփի հրամանագրի շրջափակումը, որը նախատեսում է առավելապես մահմեդական բնակչություն ունեցող վեց մերձավորարևելյան երկրների քաղաքացիների համար ԱՄՆ մուտք գործելու 90-օրյա արգելք, ինչպես նաև ԱՄՆ-ում փախստականներին ընդունելու 120-օրյա արգելք:

Չափանիշները վերաբերում են Իրանի, Լիբիայի, Սիրիայի, Սոմալիի, Սուդանի և Եմենի քաղաքացիներին: Գլխավորը, ինչին այժմ պետք է ուշադրություն դարձնեն միգրացիոն չինովնիկները, ԱՄՆ-ում մերձավոր ազգականների առկայությունն է:

Ինչպես հետևում է Սպիտակ տան հայտարարությունից, այդ կատեգորիայի մեջ մտնում են ծնողները, ամուսինները, երեխաները, փեսաները և հարսները, հարազատ եղբայրներն ու քույրերը:

Ընդ որում, տատիկներն ու պապիկները, քեռիներն ու մորաքույրները զարմիկներն ու զարմուհիները, թոռները և կնոջ կամ ամուսնու կողմից ազգականները մերձավոր ազգականներ, ԱՄՆ իշխանությունների սահմանման համաձայն, չեն համարվում:

Մուտքի արտոնագիր ստանալու համար ազգակցական կապերը պետք է հաստատված լինեն փաստաթղթերով:

Ընդ որում, Թրամփի կողմից ներդրված մուտքի ժամանակավոր արգելքը չի վերաբերելու նրանց, ովքեր սովորել կամ սովորում են ԱՄՆ-ում կամ այնտեղ բիզնես ունեն, ով ունի գործող մուտքի արտոնագիր կամ ԱՄՆ քաղաքացիություն:

Նոր կանոնները ուժի մեջ կմտնեն հինգշաբթի Վաշինգտոնի ժամանակով ժամը 20:00-ից (ուրբաթ օրվա ժամը 3:00-ից՝ Մոսկվայի ժամանակով):

Երկուշաբթի երկրի Գերագույն դատարանը համաձայնել էր քննել վեց երկրներից ԱՄՆ մուտք գործելու արգելքի մասին երկրի նախագահ Դոնալդ Թրամփի հրամանագրերը շրջափակող երկու ստորադաս դատարանի որոշումների դեմ վերաքննիչ բողոքները: Միաժամանակ դատարանը հնարավորություն էր տվել հրամանագրերից մեկի որոշ դրույթները մասնակի ուժի մեջ մտցնել:

Թրամփի հունվարյան հրամանագիրը առավելապես մահմեդական բնակչություն ունեցող յոթ երկրների քաղաքացիների համար մուտքը ժամանակավորապես սահմանափակելու մասին քննադատության էր արժանացել ՄԱԿ-ի, ինչպես նաև իրավապաշտպան կազմակերպությունների և հասարակական գործիչների կողմից ինչպես ԱՄՆ-ում, այնպես էլ նրա սահմաններից այն կողմ:

Նյու Յորքի դաշնային դատարանն այն ժամանակ ժամանակավոր արգելք էր սահմանել ԱՄՆ-ի օդանավակայաններից գործող ամերիկյան մուտքի արտոնագրերով միգրանտների արտաքսման վրա:

Փետրվարի սկզբին Սիեթլի դաշնային դատարանը (Վաշինգտոնի նահանգ) ամբողջությամբ կանգնեցրել էր հրամանագրի գործողությունը:

Դրանից հետո Թրամփը ստորագրել էր համանման բովանդակության նոր հրամանագիր, սակայն փոքր-ինչ ավելի փափուկ ձևակերպումներով: Սակայն երկրորդ հրամանագիրն էլ մարտին շրջափակվել էր Հավայիի նահանգի դաշնային դատավոր Դերրիկ Ուոթսոնի կողմից:

Երկրորդ հրամանագիրը, մասնավորապես, տարբերվում էր նրանով, որ ԱՄՆ մուտք գործելու արգելք ունեցող երկրների ցանկից հանվել էր Իրաքը: Բացի այդ, դրանում նշվում է, որ արգելքը չի տարածվում ԱՄՆ-ում մշտապես բնակվելու իրավունք տվող գրին քարտեր ունեցողների վրա:

Աղբյուր` Փաստինֆո