Փաստ ինֆո

«Սասնա Ծռեր»-ի գործով ամբաստանյալ Արայիկ Խանդոյանի պաշտպան, «Ընդդեմ իրավական կամայականության» ՀԿ փաստաբան Արա Ղարագյոզյանն այսօր Ավան և Նոր Նորք վարչական շրջանների դատարանի նկուղում Ա.Խանդոյանին խոշտանգելու փաստով հանցագործության մասին հաղորդում է ներկայացրել ՀՀ գլխավոր դատախազ Արթուր Դավթյանին:

Ինչպես «Փաստինֆո»-ին հայտնեց Արա Ղարագյոզյանը, ինքը Գլխավոր դատախազից խնդրում է անհապաղ միջոցներ ձեռնարկել՝ ակնհայտ հանցագործություն կատարած ոստիկանների նկատմամբ հարուցել քրեական գործ և նրանց ենթարկել պատասխանատվության:

Միաժամանակ փաստաբանը խնդրում է ներկայացված հանցագործության մասին հաղորդումը չուղարկել ՀՀ հատուկ քննչական ծառայություն, քանի որ «նրանք Արայիկ Խանդոյանի նկատմամբ իրականացնում են քրեական հետապնդում, և ՀՀ հատուկ քննչական ծառայությունը օբյեկտիվ բազմակողմանի և լրիվ քննություն չի կարող իրականացնել»:

Արա Ղարագյոզյանը հաղորդման մեջ նշում է դեպքի հանգամանքները. 28.06.2017թ. Ավան և Նոր Մոր Նորք վարչական շրջանների ընդհանուր իրավասության դատարանում պետք է շարունակվեր «Սասնա Ծռերի» գործով դատական նիստը, որը հետաձգվեց:

Նույն օրը՝ դատական նիստերի ավարտից հետո, դատարանի նկուղային հարկի խցում մոտավորապես 15 ոստիկան ծեծի են ենթարկել Արայիկ խանդոյանին և մնացած ամբաստանյալներին:

«Նշեմ, որ 28.06.2017թ. Ավան և Նոր Նորք վարչական շրջանների ընդհանուր իրավասության դատարանում միջադեպ տեղի ուեցավ խմբի անդամներ Սմբատ Բարսեղյանի, Մխիթար Ավետիսյանի, Արեգ Կրուրեղյանի և ոստիկանների միջև, ինչից հետո ուղեկցող ոստիկանները բռնի ուժով խմբի անդամներին դուրս հանեցին դատական նիստերի դահլիճից»,- հայտնում է փաստաբանը:

Բռնի գործողությունները, ըստ Արա Ղարագյոզյանի, շարունակվել են դատարանի նկուղում, որտեղ ծեծի են ենթարկել նաև իր պաշտպանյալ Արայիկ Խանդոյանին:

Պատճառն այն է եղել, որ երբ Արեգ Կյուրեղյանին և Մխիթար Ավետիսյանին բռնությամբ տարել են, Արայիկը հարցրել է, թե ո՞րն է պատճառը, ոստիկանները սկսել են նրան ծեծել:

«Արայիկ Խանդոյանն առնվազն ուղեղի ցնցում է ստացել, հարվածներ է ստացել գլխի, երիկամների և ոտքերի շրջանում, մի շարք վնասվածքներ ուներ, բավականին երկար ժամանակ ծեծել են նրան»,- ՀՀ գլխավոր դատախազին ուղղած հաղորդման մեջ նշում է Արա Ղարագյոզյանը:

Պաշտպանը հայտնում է, որ 28.06.2017թ. ուշ երեկոյան տեսակցել է իր պաշտպանյալ Ա.Խանդոյանին «Նուբարաշեն» ՔԿՀ-ում, տեսանելի էին նրա մարմնական վնասվածքները, աչքը կարմրած էր, ուներ գլխացավեր, ոտքերի վրա առկա էր արյունազեղում և քերծվածքներ:

Իր պաշտպանյալի մարմնական վնասվածքները արձանագվել է «Նուբարաշեն» ՔԿՀ-ի մարմնական վնասվածքների մատյանում:

«Եվ այդ բռնի գործողությունները կատարվել է Ավան և Նոր Նորք Վարչական շրջանների ընդհանուր իրավասության դատարանի տարածքում»,- նշում է փաստաբանը՝ խնդրելով ՀՀ գլխավոր դատախազին փորձ չանել որևէ մեկին մոլորեցնել «նախաքննական գաղտնիք» եզրույթով՝ հանրությանը, Արայիկ Խանդոյանին, նրա պաշտպաններին տրամադրել ամենօրյա տեղեկատվություն՝ քննության ընթացքի, ոստիկանության համազգեստը հագած անձանց, կատարված բոլոր գործողությունների մասին:

«Մեր պահանջներից որևէ մեկի չկատարումը հաստատելու է մեր այն համոզմունքը, որ Հայաստանի իշխանությունը զավթված է, իսկ դրանց իրավաբանական հիմքով սահմանափակումն անթույլատրելի է, քանի որ Արայիկ Խանդոյանը քաղբանտարկյալ է ու ենթարկվել է խոշտանգման»:

Փաստաբանը հիշեցնում է ՄԻԵԿ-ի 3-րդ հոդվածը՝ Խոշտանգումների արգելում, ըստ որի՝ ոչ ոք չպետք է ենթարկվի խոշտանգումների կամ անմարդկային կամ նվաստացնող վերաբերմունքի կամ պատժի:

Աղբյուր` Փաստինֆո