Փաստ ինֆո

«Սասնա ծռեր»-ի գործով նախօրեին Ավան և Նոր- Նորք վարչական շրջանների ընդհանուր իրավասության դատարանում տեղի ունեցածից հետո փաստաբան Արա Ղարագյոզյանի կողմից արված հայտարարությունների առնչությամբ գործով նախագահող դատավոր Արտուշ Գաբրիելյանը դիմել է Փաստաբանների պալատ՝ փաստաբանի նկատմամբ կարգապահական վարույթ հարուցելու հարցով: 

Ի պատասխան «Փաստինֆո»-ի հարցման՝ այդ մասին հայտնեց ՀՀ դատական դեպարտամենտի արարողակարգի և հասարակայնության հետ կապերի վարչության պետ Արման Խաչատրյանը:

Նախագահող դատավորի դիմումին կից ներկայացվել է նաև այն թուղթը, որը մինչև գործով դատավարության մեկնարկը «Սասնա ծռեր» խմբի անդամ Արեգ Կյուրեղյանը փորձել է փոխանցել իր փաստաբան Արա Ղարագյոզյանին:

Ներկայացնում են դատավորի կողմից Փաստաբանների պալատի նախագահին ուղղված դիմումը.

Գործով հունիսի 28-ին դատական նիստից առաջ Ոստիկանության ուղեկցող գումարտակի ծառայողները կանխել են ամբաստանյալների կողմից փաստաբան Արա Ղարագյոզյանի միջոցով միմյանց ձեռագիր գրառումով թուղթ փոխանցելու փորձ:

Թղթի վրա առկա են եղել հետևյալ գրառումները.

1. Ժողովին (հատկապես երիտասարդությանը) ոգևորել
2. Ինքնակազմակերպմանը օժանդակելու
3. Մեր ազգային օրակարգը Արցախի միացմամբ նոր հանրապետություն, հետո Կույր-Արաքսյան տարածքի վերահատացում
4. Մեր գաղափարները տարածելու
5. Աշխարհին հասկացնելու, որ հայերին հնարավոր չէ ստրակացնել և մենք ազատվելու ենք գաղութատիրությունից
6. Դատավարությունը շուռ տալու և վերածելու ռեժիմի մահավճռի
7. Լինելու կազմակերպված և պայքարը շարունակելու մինչև հաղթանակ
8. Հետևել մեր առողջության, այն միայն մերը չէ նաև պայքարի համար է»:

Դատական նիստից հետո փաստաբանը լրատվամիջոցների հետ զրույցում հայտարարել է, թե նշված թղթի վրա առկա գրառումները հանդիսանում են փաստաբանական գաղտնիք կազմող տեղեկություններ, որոնք հասցեագրված են եղել իրեն:

Նշված տեքստի բովանդակությունից ակնհայտ է, որ դրա տարածումն ուղղված է գործի դատական քննությունը կազմակերպված կերպով խոչընդոտելուն, իսկ փաստաբանը, իր հայտարարությամբ չհամապատասխանող տեղեկություններ հայտնելով, փորձել է օրինականացնել նշված գործողությունները՝ իրավաբանական օգնություն ցույց տալու որևէ առնչություն չունեցող փաստաթղթի բովանդակությունը ներկայացնելով որպես օրենքով պահանջվող փաստաբանական գաղտնիք:

Աղբյուր` Փաստինֆո