Փաստ ինֆո

Թաիլանդի բնակչուհին, ով դեռահաս տարիքում կորցրել է երկու ոտքերը, հաղթել է «երկրում լավագույն աշխատանքի» համար մրցույթում:

Ըստ BBC-ի ռուսական ծառայության, Բանգկոկում Համաշխարհային բժշկական հոսպիտալի հետ կնքված վեցամսյա պայմանագրով Նիթչարի Պենեակչանասակը ամիսը կստանա մեկ մլն բաթ (29 հազար դոլար):

Բարձր վարձատրվող թափուր տեղին հավակնում էր 800-ից ավելի մարդ, սակայն հոսպիտալի վարչակազմը ընտրել է 21-ամյա Նիթչարիին: Հաղթողի անունը հրապարակվել էր հեռուստաշոուի ժամանակ:

Նիթչարիի պաշտոնը պաշտոնապես կոչվում է «երջանկության դիտորդ»: Նրա պարտականությունների մեջ մտնում է հիվանդներին դիտելը և նրանց հետ շփումը՝ հիվանդների թաքնված պահանջմունքները պարզելու նպատակով: Նա նաև պետք է ոգեշնչող պատմություններ գրի Ֆեյսբուքում:
«Ես կարծում եմ, որ հաղթել եմ մրցույթում, քանի որ ազնիվ եմ իմ առաջ: Ես ապացուցեցի, որ դա հենց այն է, ինչը որ ես սիրում եմ անել: Բացի այդ ես դժբախտ պատահար եմ վերապրել և ստացել ունիկալ փորձառություն»,- ասել է Նիթչարին BBC-ի հետ հարցազրույցում:

2011թ. դեռահաս աղջիկը ընկել էր Սինգապուրի մետրոպոլիտենի հարթակից հանդիպակաց գնացքի առաջ և զրկվել երկու ոտքից:

Մրցույթում հաղթանակը նրա համար անակնկալ է եղել: «Ես շատ զարմացել էի, կարծում էի, որ չափազանց երիտասարդ եմ ու անփորձ մյուս թեկնածուների համեմատությամբ: Ես շատ ուրախ եմ, որովհետև ինձ դուր է գալիս շփվել մարդկանց հետ, ես երազում էի հոգեբան դառնալ»,- հավելել է նա:

Ներկայումս աղջիկը Բանգկոկի համալսարանում լրագրություն է ուսումնասիրում:

«Համարվում է, որ բժիշկները կարող են բուժել միայն հիվանդների ֆիզիկական հիվանդությունները, սակայն մենք հազվադեպ ենք իմանում, թե ինչ կա նրանց մտքում»,- պարզաբանել է BBC-ին հոսպիտալի մամուլի ծառայության ներկայացուցիչը. «Եթե մենք հասկանանք նրանք ինչի կարիք ունեն ու օգնենք նրանց, նրանք ավելի արագ կառողջանան»:

«Նիթչարին ողբերգական դեպք է վերապրել, որը շրջադարձ է կատարել նրա կյանքում, սակայն նա շատ ուժեղ մտածողություն ունի: Նա շարունակում է շփվել մարդկանց հետ և նրանց պայքարի է ոգեշնչում: Մենք հպարտանում ենք, որ նա աշխատում է մեր հետ»,- ասել է մամուլի քարտուղարը:

Աղբյուր` Փաստինֆո