Փաստ ինֆո

 Մերի Մարգարյանի և նրա նորածնի մահվան գործով այսօր դատարանում հարցաքննվեց «Շենգավիթ» ԲԿ-ի բժշկուհի, ամբաստանյալ Շուշանիկ Բախշյանը, ում հարցաքննությունն այսօր չավարտվեց եւ կշարունակվի հաջորդ դատական նիստում:

Ըստ Բախշյանի՝ Մերի Մարգարյանը 2015թ փետրվարից՝ հղիության 10-11 շաբաթականում，  հաշվառվել է  իրենց ԲԿ – ում,  եւ նրա հղիությունը գտնվել է հենց իր՝ Շուշանիկ Բախշյանի հսկողության ներքո։

Ամբաստանվող բժշկուհին հայտնեց, որ 2015 թվականի հուլիսի 20-ին Մերի Մարգարյանի  կոնսուլտացիայի ժամանակ կատարվել է  զարկերակային ճնշման չափում, ընդհանուր զննում, տարբեր ստուգումներ, և որևէ խնդիր չի հայտնաբերվել, իսկ հուլիսի 23-ի ուշ երեկոյան նրանից  sms հաղորդագրություն է ստացել， որ ջերմություն ունի՝ 37.2 և թուլություն:

Հղին ջերմության մասին իր բժշկուհուն տեղեկացրել է նաև հաջորդ օրը՝ հուլիսի 24-ին, սակայն Շուշանիկ Բախշյանը գտնում է, որ նշված գանգատները հղիին հոսպիտալացնելու հիմք չեն: Ավելին ըստ նրա՝ Մերի Մարգարյանն ըստ էության գանգատ չի ունեցել:

Ինչ վերաբերում է հուլիսի 25-ին, ապա  Բախշյանը հայտնեց, որ Մերի Մարգարյանից տեղեկացել է, որ նա 38.1 աստիճան ջերմություն ունի և որ խմել է պարացետամոլ տեսակի դեղահաբ, սակայն ինքը Մերիին խորհուրդ  է տվել  գնալ հիվանդանոց, որտեղ ըստ Բախշյանի՝ Մերիի ջերմությունը չափելուց հետո  արձանագրվել է 37 աստիճան:

Բախշյանը  հայտնեց, որ այդ օրերին ինքը բացակայել է քաղաքից, սակայն հիվանդանոցի  հերթապահ անձնակազմի հետ խոսել է Մերի Մարգարյանի առողջական վիճակի մասին և որ գործով անցնող մյուս ամբաստանյալ Անի Բաբելյանը իրեն ներկայացրել է Մերի Մարգարյանի հետազոտությունների պատասխանները:

Ի վերջո տուժող կողմի հարցադրմանը, թե այդ օրերի ընթացքում ինչ ախտորոշում է դրվել Մերի Մարգարյանի մոտ՝  Բախշյանը պատասխանեց, որ սուր շնչառական հիվանդություն այն դեպքում, երբ հղիի հիվանդության պատմագրում  որևէ գրառում չկա քիթ-կոկորդ-ականջաբանի կողմից:

Բախշյանը նաև նշեց,  հուլիսի 26-ին Մերի Մարգարյանի մայրն  իրեն հեռախոսազանգի միջոցով տեղեկացրել է, որ Մերին  39.1 աստիճան ջերմություն ունի, ինքն էլ անմիջապես հորդորել է դիմել հիվանդանոց:

Միևնույն ժամանակ Բախշյանն անընդմեջ պնդում էր, որ կատարված հետազոտությունների արդյունքում որևէ շեղում  չի հայտնաբերվել Մերի Մարգարյանի մոտ, այդ թվում նաև՝ արյան բիոքիմիական անալիզում :

Անդրադառնալով HELLP սինդրոմի ախտորոշմանը՝ Բախշյանը հայտարարեց, որ այդ մասին իրենք ընդհանարապես չեն մտածել, իսկ կեսարյան հատման ցուցում չի եղել， ինչպես մոր այնպես էլ երեխայի կողմից:

Աղբյուր` Փաստինֆո