Փաստ ինֆո

Կազմակերպված խմբի կողմից ապօրինի զենք- ռազմամթերք պահելու մեջ մեղադրվող Ժիրայր Սեֆիլյանի և մյուսների գործով այսօրվա դատական նիստը կայացավ պաշտպաններից մի քանիսի և դատական նիստերի դահլիճից հեռացված 3 ամբաստանյալների բացակայության պայմաններում:

Նշենք， որ մինչև դատական նիստի մեկնարկը՝ փաստաբաններ Տիգրան Հայրապետյանը,  Արայիկ Պապիկյանը և Նինա Կարապետյանցը հրաժարվել էին զննության ենթարկվել և նրանց չէ՚  թույլատրվել մուտք գործել դատական նիստերի դահլիճ, սակայն նրանց բացակայությունը չխոչընդոտեց դատարանին  սկսել դատական նիստը։  

Իսկ դատական նիստի ընթացքում արդեն սկսվելուց հետո դատական սանկցիաների արժանացան Ժիրայր Սեֆիլյանը և Ներսես Պողոսյանը，ովքեր ոտքի չէին կանգնել դատարանի՝ նիստերի դահլիճ մուտք գործելու ժամանակ， ինչը գնահատվեց որպես անհարգալից վերաբերմունք։

Արդյունքում երկու ամբաստանյալների՝  Ժիրայր Սեֆիլյանի，Ներսես Պողոսյանի ու նրանց պաշտպանների Տիգրան Հայրապետյանի， Արայիկ Պապիկյանի և Նինա Կարապետյանցի բացակայության պայմաններում դատարանը շարունակեց նիստը:

Նշենք, որ շուրջ 2 ժամ դատական նիստը շարունակելուց հետո դատարանը հիշեց, որ փաստաբան Արթուր Ալիխանյանը գրությամբ դատարանին հայտնել էր, որ վատառողջ է, ուստիեւ չի կարող ներկայանալ նիստին: Միևնույն ժամանակ պաշտպանը խնդրել էր դատական նիստը հետաձգել:

Հիշեցնենք նաև, որ նախորդ դատական նիստին էլ դատական սանկցիա էր կիրառվել ամբաստանյալ Գևորգ Սաֆարյանի նկատմամբ և նա 6 ժամով հեռացվել է դատարանի դահլիճից:

Վերջինս պաշտպան Տիգրան Եգորյանի  փորձերը՝  իր պաշտպանյալին դատարան վերադարձնելու վերաբերյալ ապարդյուն անցան՝  պաշտպանի կողմից արված  միջնորդությունները դատարանը մերժեց:

Դատարանը շտապում էր ինքնաբացարկի վերաբերյալ պաշտպանական կողմի միջնորդությունները լսել, ապա նաև նիստերի քարտուղարին բացարկի միջնորդության հարցը քննեց:

Ապա դատարանն անցավ ամբաստանյալների ինքնությունը  ճշտելուն՝ դատարանում ներկա 4 ամբաստանյալներն իրենց անձի վերաբերյալ տեղեկություններ հայտնեցին, որից հետո դատարանը որոշեց գործի նյութերից  հրապարակել բացակա ամբաստանյալների ինքնության վերաբերյալ տեղեկություններն:

Հետո դատարանը որոշեց  պաշտպանական կողմից պարզել՝ դատախազին բացարկ ունեն, թե ոչ: Ամբաստանյալ Սասունիկ Կիրակոսյանի պաշտպան Կարեն Հակոբյանը բացարկ հայտնեց， ինչը քննարկելու համար դատարանը հեռացավ խորհրդակցական սենյակ:

Աղբյուր` Փաստինֆո