Փաստ ինֆո

Երևանի Արաբկիր և Քանաքեռ-Զեյթուն վարչական շրջանների դատարանում է գտնվում  դատական ակտ կայացնելու համար դատավորին կաշառք տալու ու կաշառքի միջնորդության  փորձերի և առանձնապես խոշոր չափերի խարդախության գործը: Ամբաստանյալները չորսն են՝ արդեն նախկին դատական կարգադրիչը, ուղեկցող գումարտակի երկու նախկին ոստիկան և այլ գործով ամբաստանյալը:

Այսպես, ըստ մեղադրանքի, ՀՀ դատական դեպարտամենտի դատական կարգադրիչների ծառայության արդեն նախկին աշխատակից Գեղամ Աղաբաբյանն  իր մտերիմ՝ ուղեկցող գումարտակի ոստիկան Գագիկ Մաթևոսյանից ստանալով առաջարկ` միջամտելու և դատավորի միջոցով ապահովելու քրեական գործով  ամբաստանյալ Արեն Ծերունյանի համար բարենպաստ դատական ակտի կայացում, առանձնապես խոշոր չափերով ուրիշի գույքը խաբեությամբ հափշտակելու դիտավորությամբ, հայտնել է, որ իբր գործ քննող դատավորի հետ ունի ջերմ հարաբերություններ և դրա շնորհիվ հարցը դրական լուծելու հնարավորություն, իսկ այնուհետև տեղեկացրել է դատավորի հետ այդ հարցը 8000 ԱՄՆ դոլարով լուծելու վերաբերյալ կայացած պայմանավորվածության մասին և պատրաստակամություն հայտնել նպաստելու կաշառք տվողի և կաշառք ստացողի միջև կաշառքի շուրջ համաձայնության գալուն, իրականում առանց դատավորի հետ պայմանավորվածություն ձեռք բերելու:

Ըստ ուղեկցող գումարտակի արդեն նախկին ոստիկան Կարո Հովհաննիսյանին առաջադրված  մեղադրանքի, Կենտրոն և Նորք-Մարաշ վարչական շրջանների ընդհանուր իրավասության դատարանում քննվող  քրեական գործով ամբաստանյալ Արեն Ծերունյանի ազգականից  2016 թվականի մարտ ամսին ստացել է սկզբում 6.000, իսկ մի քանի օր անց ևս 2.000 ԱՄՆ դոլար, որը փոխանցել է Գեղամ Աղաբաբյանին, որպեսզի վերջինս փոխանցի դատավորին` իրականում չիմանալով` Գ.Աղաբաբյանի և դատավորի միջև պայմանավորվածության բացակայության մասին:

Ըստ ուղեկցող գումարտակի արդեն նախկին ոստիկան Գագիկ Մաթևոսյանին առաջադրված մեղադրանքի, պայմանավորվելով  ամբաստանյալ Արեն Ծերունյանի հետ հնարավոր բարենպաստ դատական ակտի կայացում ապահովելու համար և իր վերադաս Կարո Հովհաննիսյանի հետ միասին դատական դեպարտամենտի դատական կարգադրիչների նախկին աշխատակից Գեղամ Աղաբաբյանի միջոցով քրեական գործով ամբաստանյալ Արեն Ծերունյանի համար բարենպաստ դատական ակտի կայացում ապահովելու համար, դատավորի հետ այդ հարցը Գ.Աղաբաբյանի միջոցով 8.000 ԱՄՆ դոլարով լուծելու վերաբերյալ, կայացած պայմանավորվածության համար և պատրաստակամություն հայտնելով նպաստելու կաշառք տվողի և կաշառք ստացողի միջև կաշառքի շուրջ համաձայնության գալուն:

Այլ գործով ամբաստանյալ Արեն Ծերունյանն, ըստ  մեղադրանքի,  պատժից խուսափելու կամ ազատազրկման ձևի հետ չկապված այլ պատժամիջոցով դատապարտվելու նպատակով, 2016 թվականի փետրվար ամսին առաջարկել է  ուղեկցող գումարտակի աշխատակիցներ Գագիկ Մաթևոսյանին և Կարո Հովհաննիսյանին 8.000-10.000 ԱՄՆ դոլարի դիմաց միջնորդել  քրեական գործը քննող դատավոր Ա.Բեկթաշյանին` բարենպաստ դատական ակտի կայացումն ապահովելու համար:

 Գեղամ  Աղաբաբյանին մեղադրանք է առաջադրվել ՀՀ քրեական օրենսգրքի 178-րդ հոդվածի 3-րդ մասի 1-ին կետով՝  առանձնապես խոշոր չափերով խարդախություն, Կարո Հովհաննիսյանին և Գագիկ Մաթևոսյանին՝ 34-313-րդ հոդվածի 2-րդ մասի 2-րդ կետով՝ պաշտոնեական դրությունն օգտագործելով՝ կաշառքի միջնորդության փորձ, Արեն  Ծերունյանին՝  34-312-րդ հոդվածի 3-րդ մասի 1-ին կետով՝ առանձնապես  խոշոր չափերով կաշառք տալու փորձ:

Այսօրվա դատական նիստում նախկին ոստիկան ամբաստանյալները՝ Կարո Հովհաննիսյանը և Գագիկ Մաթևոսյանը, ովքեր պաշտպան չունեն,  հայտարարեցին, որ իրենք ցանկանում են, որպեսզի իրենց պաշտպանությունն իրականացնի հանրային պաշտպանը: Դատարանը բավարարեց ամբաստանյալների միջնորդությունը և ամբաստանյալներին հանրային պաշտպանով ապահովելու համար դատական նիստը հետաձգեց:

Նշենք, որ այլ՝ Արեն Ծերունյանի վերաբերյալ՝ երկու դրվագով առանձնապես խոշոր չափերի յուրացման գործը քննվում էր Երևանի Կենտրոն և Նորք-Մարաշ վարչական շրջանների դատարանի դատավոր Արմեն Բեկթաշյանի վարույթում, վերջինս  մարտի 28-ին սեփական նախաձեռնությամբ ինքնաբացարկ էր հայտնել: Ինքնաբացարկի միջնորդությունը բավարարվել է, և գործը  մակագրվել է նույն դատարանի մեկ այլ դատավորի՝ Արշակ  Վարդանյանին, այն ընդունվել է դատավորի վարույթ, դատաքննությունը վերսկսվել է:

Աղբյուր` Փաստինֆո