Փաստ ինֆո

Հայաստանի ֆինանսների նախարար Վարդան Արամյանը ճիշտ չի համարում ՀՆԱ-ի մեջ պետության մասնաբաժնի կրճատումը: Նախարարն այս մասին ասաց ՀՀ Ազգային ժողովի մշտական հանձնաժողովների համատեղ նիստում ՀՀ 2016թ. պետական բյուջեի կատարման հաշվետվության քննարկման ժամանակ՝ պատասխանելով ՀՀԿ խմբակցության պատգամավոր Ռաֆիկ Գրիգորյանի հարցին:

«Պետությունն այստեղ հարկաբյուջետային քաղաքականության միջոցով շատ կարևոր խնդիր է լուծում՝ դա վերաբաշխումն է: Եթե մենք վերաբաշխման այդ ֆունկցիան չկատարենք, կթուլացնենք տնտեսական աճի հենքերը:

Եթե մենք վերաբաշխումը չենք ապահովում, դա հնարավոր է հանգեցնի նրան, որ գումարները կուտակվեն հասարակության 10 տոկոսի ձեռքում, ինչը կթուլացնի տնտեսությունը: Օրինակ, աֆրիկյան շատ երկրներում մեկ շնչին բաժին ընկնող ՀՆԱ-ն մեզանից մի քանի անգամ բարձր է, սակայն նրանց մոտ կենտրոնացվածությունն այնքան մեծ է, որ տնտեսական աճի պոտենցիալները շատ ավելի թույլ են: Եվ դրա պատճառն այն է, որ ֆինանսները կուտակված են մեկի ձեռքերում»,- «Արմենպրես»-ի փոխանցմամբ՝ ընդգծեց նախարարը:

Նա հավելեց, որ դրա համար կարևոր է, որպեսզի պետությունը տնտեսության մեջ հարկաբյուջետային քաղաքականությանկշիռը պահի:

«Եթե մենք տնտեսության մեջ ունենում ենք 15-16 տոկոս կշիռ, թուլացնում ենք վերաբաշխման հնարավորությունը: Այսօր ունենք 25-26 տոկոս կշիռ, ինչն ուժեղացնում է վերաբաշխման հնարավորությունները:

Հարկաբյուջետային ճիշտ քաղաքականությունն այն կլինի, որպեսզի շոկերի ժամանակ ծախսերը չկրճատվեն: Ծախսերի կրճատում պետք է խիստ ծայրահեղ դեպքերում իրականացվի, իսկ եթե կա հնարավորություն, լավ կլինի, որ ծախսերը պահպանվեն»,- նշեց Արամյանը:

Եզրափակելով խոսքը՝ նախարարն ընդգծեց, որ պետությունը պետք է խիստ ուշադրություն դարձնի նաև տնտեսության տարբեր ճյուղերում կատարվող ծախսերի արդյունավետությանը:

Լուսանկարը՝ Azatutyun.am-ի

Աղբյուր` Փաստինֆո