Փաստ ինֆո

Նախօրեին խորհրդակցական սենյակից վերադառնալով՝ դատարանը հրապարակել էր իր որոշումը՝ Արթուր Սաֆարյանի սպանությունը կազմակերպելու և օժանդակելու ու դա թաքցնելու համար Մովսես Ներսիսյանի սպանությունը կատարելու մեջ մեղադրվող Իսրայել Սարգսյանի գործով դատաքննությունը վերսկսելու մասին:

Այս և աղմկահարույց այս գործի քննությանն առնչվող այլ հարցերի մասին է «Փաստինֆո»-ի հարցազրույցը քրեական հեղինակություն Թևոս Սաֆարյանի եղբոր՝ Արթուր Սաֆարյանի, իրավահաջորդի ներկայացուցիչ, փաստաբան Երեմ Սարգսյանի հետ: 

-Ձեր կարծիքով հիմնավորվե՞լ է, արդյոք, Իսրայել Սարգսյանի մեղավորությունը քրեական հեղինակություն Թևոս Սաֆարյանի եղբոր Արթուր Սաֆարյանի և Մովսես Ներսիսյանի սպանության մեջ:

-Քրեական գործում առկա ապացույցները վկայում են հենց այդ մասին: Չնայած որ ողջ դատաքննության ընթացքում Իսրայել Սարգսյանն անընդհատ պնդում էր, որ բացահայտումներ է անելու, որ հիմնավորելու է, որ ինքը չի կատարել այդ սպանությունները, սակայն այդպես էլ որևէ նման բացահայտում չկատարեց: Պետք է նշեմ, որ տուժող կողմի նպատակն այն չէր, որ հիմնավորվի, որ հատկապես Իսրայել Սարգսյանն է կատարել այդ սպանությունները, այլ ցանկանում էի հստակ պատկերացում կազմել, թե իրականում ո՛վ է եղել այդ սպանությունը կատարողը և ինչո՛ւ է կատարել դա:

-Երբ ձեր ճառում Դուք միջնորդեցիք, որ Իսրայել Սարգսյանը դատապարտվի ցմահ ազատազրկման, դրանից հետո Իսրայել Սարգսյանն իր վերջին խոսքում նշեց, որ Արթուր Սաֆարյանի եղբայրը` քրեական հեղինակություն Թևոսիկն է Ձեզ ասել, որ նման պատիժ միջնորդեք: Դա իրականում այդպե՞ս է:

-Իսրայել Սարգսյանի այդ հայտարարությունը, բնականաբար, ընդհանրապես չի համապատասխանում իրականությանը: Ցավոք սրտի, որոշ լրատվամիջոցներ «հալած յուղի» պես ընդունեցին Իսրայել Սարգսյանի խոսքերը և ավելի առաջ գնալով՝ նշեցին, թե իբր Թևոս Սաֆարյանը հանդիսանում է Արթուր Սաֆարյանի իրավահաջորդը, սակայն պետք է նշեմ, որ քրեական գործի սկզբնական փուլից սկսած Արթուր Սաֆարյանի իրավահաջորդը հանդիսացել և հանդիսանում է նրա կինը, ում շահերն էլ ես ներկայացնում եմ:

Թևոս Սաֆարյանն այս հարցերին ընդհանրապես չի առնչվել և որևէ հետաքրքրություն չի ցուցաբերել: Ավելին ասեմ, նույնիսկ Արթուր Սաֆարյանի կինը և ընտանիքի մյուս անդամները երբևէ դատարան չեն եկել և չեն մասնակցել դատական նիստերին: Ի սկզբանե Արթուր Սաֆարյանի իրավահաջորդի` նրա կնոջ, նպատակը եղել է այն, որ իրականում բացահայտվի, թե ով է եղել իր ամուսնու սպանությունը կատարողը և հենց այդ նպատակով էլ ես մասնակցել եմ այս գործի քննությանը: Ո՛չ Արթուր Սաֆարյանի կինը, ո՛չ էլ առավել ևս Թևոս Սաֆարյանը չեն հետաքրքրվել, թե իմ ճառում ինչ պատիժ եմ միջնորդելու, քանի որ այդ հարցը նրանց չի էլ հետաքրքրում:

Դրա ապացույցն է նաև այն, որ ես չափազանց կարճ ճառով հանդես եկա, առանց խորապես վերլուծելու գործում առկա ապացույցները, նույնիսկ չմասնակցեցի ռեպլիկների փուլին և ներկա չգտնվեցի Իսրայել Սարգսյանի վերջին խոսքին: Իսկ ինչ վերաբերում է իմ կողմից միջնորդած պատժին, ապա իմ համար ուղղակի զարմանալի էր մեղադրողի դիրքորոշումը, որ միջնորդել էր ծանրացուցիչ հանգամանքներում երկու անձանց սպանելու համար մեղավոր ճանաչել Իսրայել Սարգսյանին, սակայն որպես պատիժ էր միջնորդել 25 տարի ժամկետով ազատազրկումը: Վստահ եմ, որ յուրաքանչյուր օբյեկտիվ դիտորդ կասի, որ եթե այդ երկու սպանությունների կատարումը հիմնավորված են, ապա միակ արդար պատիժն այս դեպքում կարող է լինել ցմահ ազատազրկումը, ինչի մասին էլ հայտարարեցի դատարանում:

-Իսկ ի՞նչ դիրքորոշում ունեք Դուք՝ որպես տուժողի իրավահաջորդի ներկայացուցիչ, գործով դատաքննությունը վերսկսելու դատարանի որոշման մասին:

-Քանի որ չնշվեց, թե ինչի համար է դատարանը վերսկսում դատաքննությունը, այս պահին որևէ բան ասել չեմ կարող: Երբ հաջորդ դատական նիստում պարզ դառնա, թե ինչ գործողություն կատարելու համար է վերսկսվել դատաքննությունը, դրանից հետո ես իմ դիրքորոշումը կհայտնեմ:

Լուսանկարը՝ ֆոտոլուրի

Աղբյուր` Փաստինֆո