Փաստ ինֆո

Երեւանի Կենտրոն եւ Նորք Մարաշ վարչական շրջանի դատարանում «Զինված խմբի» գործով այսօրվա դատական նիստում ամբաստանյալ Վահան Շիրխանյանի նկատմամբ կիրառվեց միանգամից երեք դատական սանկցիա՝ երկու անգամ նախազգուշացվեց, իսկ երրորդ անգամ երեք ժամով հեռացվեց նիստերի դահլիճից։

Պատճառը Վ.Շիրխանյանի ոտքի չկանգնելն է։ Դատարանի կարծիքով՝ այդպիսով Վահան Շիրխանյանը դատարանի նկատմամբ անհարգալից վերաբերմունք է դրսեւորում, թեեւ ամբաստանյալի պաշտպան Հայկ Ալումյանը հայտարարեց, որ նա ի վիճակի չէ ոտքի կանգնել ու պարտավոր չէ ֆիզիկական տառապանքների միջոցով հարգանք դրսեւորել դատարանի  նկատմամբ, իսկ դատարանը նրան նման երկընտրանքի առաջ է կանգնեցնում։

Դատարանը, վկայակոչելով Վ.Շիրխանյանի նկատմամբ նշանակված դատաբժշկական փորձաքննությունը, նշեց, որ նա ի վիճակի է մասնակցել դատական նիստերին։ Փաստաբանն էլ հակադարձեց, որ հիշյալ փորձաքննությամբ փորձագետներին հարց չի ուղղվել, թե արդյոք նա կարող է ոտքի կանգնել, հետեւապես այդ հարցը հետազոտության առարկա չի դարձել։

Արդյունքում՝ երբ հերթական անգամ դատարանը դիտողություն արեց ոտքի չկանգնելու համար՝ Վ.Շիրխանյանը հայտարարեց, թե դատարանը չի հասկանում, ինչից հետո էլ հեռացվեց նիստերի դահլիճից։ Հեռացավ նաեւ պաշտպան Հայկ Ալումյանը, ով «Փաստինֆո»-ի լրագրողի հետ զրույցում ասաց, որ իր պաշտպանյալն ասել է, որ իր բացակայության պայմաններում չմասնակցի դատական նիստերին։

Փաստաբանը Վ.Շիրխանյանի նկատմամբ կիրառված սանկցիաները որակեց որպես բացարձակ կամայականություն։

«Մարդը չի կարողանում ոտքի վրա կանգնել ու դա դիտում են որպես անհարգալից վերաբերմունք դատարանի հանդեպ， ինչը դատարանի կողմից անհարգալից վերաբերմունք է արդարադատության նկատմամբ։ Սա արդարադատություն չէ, այլ` հաշվեհարդար»,- ասաց Հ.Ալումյանը եւ հավելեց. «Երբ պարոն Շիրխանյանին հանեցին դատական նիստերի դահլիճից՝ փակ գոտու ուղղությամբ դատավորը բարձրաձայն շատ կոպիտ խոսում էր Շիրխանյանի հետ, ուղղակի գոռում էր, բղավում, դիմում էր դու-ով ասելով, թե ինչ իրավունք ունի ասել, թե ինքը (դատարանը.-խմբ.) ինչ-որ բան չի հասկանում»։

Փաստաբանի կարծիքով՝ այս ձեւով հնարավոր չէ դատարանի եւ դատավորի նկատմամբ հարգանք, վստահություն ներշնչել։

Լուսանկարը՝ Ֆոտոլուրի

Աղբյուր` Փաստինֆո