Փաստ ինֆո

Հունիսի 23-ին ՀՀ ԱԻ նախարարությունում կայացավ ՀՀ սողանքային աղետի կառավարման ծրագրի միասնական համակարգող հանձնաժողովի նիստ: Այս մասին հայտնում է ԱԻՆ լրատվական ծառայությունը:

2014թ. օգոստոսից Ճապոնայի միջազգային համագործակցության գործակալության (ՃՄՀԳ) և ՀՀ ԱԻՆ միջև սկսված «Սողանքային աղետի կառավարում» ծրագիրը մոտենում է ավարտին: Այդ առիթով՝ կողմերը հանդիպել էին ամփոփելու կատարված անելիքները և նախանշելու առաջիկայում սպասվող քայլերը:

ՀՀ ԱԻՆ փրկարար ծառայության տնօրեն, փ/ծ գնդապետ Մուշեղ Ղազարյանը անդրադարձավ ծրագրի արդյունքներին և ամփոփեց կատարված աշխատանքները՝ մասնավորապես նշելով.

-Մեր համագործակցությունն ունի երկար տարիների պատմություն, որն այսօր արդեն շոշափելի արդյունքների է հասել: Այս ծրագիրը հիմք կհանդիսանա հետագայում մեր երկրում սողանքային աղետների կառավարման ծրագրերի զարգացմանը: Հուսով եմ, որ արդյունավետ համագործացությունը շարունակական բնույթ կունենա:

Նիստի ընթացքում Ճապոնիայի փորձագիտական խմբի ղեկավար Քենջի Յանոյի կողմից ներկայացվեց ծրագրի շրջանակներում կատարված աշխատանքները և գրանցված արդյունքները:

ՀՀ Շիրակի մարզի Առափի, Տավուշի մարզի Գետահովիտ և Կոտայքի մարզի Ողջաբերդ համայնքների սողանքավտանգ տեղամասերում տեղադրվել են սողանքային լանջերի վրա ակտիվացումներ գրանցող խորքային և մակերևույթային էլեկտրոնային տվիչներ: 2016-2017թթ. ընթացքում Առափի և Գետահովիտ համայնքում իրականացվել են հորատման աշխատանքներ, որի միջոցով հեռացվել են գրունտային ջրերը՝ գրանցելով սողանքային մարմինների կայունացում: Ճապոնական կողմը տրամադրել է հորիզոնական հորատման սարք, որը գործարկվել է, ինչպես նաև՝ ՔՊ գնդի կազմում գտնվող ինժեներական ստորաբաժանման անձնակազմի հետ անց են կացվել սարքի շահագործման դասընթացներ:

«Գեոքոմ» ընկերության ներկայացուցիչ Ալեքսանդր Առաքելյանը նշեց, որ ծրագրի շրջանակներում մշակվել և ներդրվել է «Իրական ժամանակում սողանքի մոնիտորինգի համակարգ», որը իրենից ներկայացնում է սողանքների իրական ժամանակում ավտոմատացված մշտադիտարկման և հնարավոր աղետի մասին նախազգուշացման համակարգ: Համակարգին են միացված վերոնշյալ երեք տեղամասերում տեղադրված մշտադիտարկման սարքավորումները:

ՀՀ ԱԻՆ ՓԾ տնօրեն Մ. Ղազարյանը և ՃՄՀԳ փորձագիտական խմբի ղեկավար Քենջի Յանոն ստորագրեցին Սողանքային աղետի կառավարման ծրագրի միասնական համակարգող հանձնաժողովի հինգերորդ հանդիպման արձանագրությունը:

Հանդիպման ավարտին Ճապոնայի միջազգային համագործակցության գործակալության փորձագիտական խմբի ղեկավար Քենջի Յանոն ՀՀ ԱԻ նախարար Դավիթ Տոնոյանի հրամանով պարգևատրվեց «Համագործակցություն հանուն փրկության» մեդալով՝ ՀՀ ԱԻՆ և ՃՄՀԳ հետ «Սողանքային աղետի կառավարում» ծրագրի արդյունավետ իրականացման, ինչպես նաև՝ Հայաստանում աղետների կանխարգելման գործում զգալի ավանդի համար: ՀՀ ԱԻՆ պատվոգրերի արժանացան ՃՄՀԳ թիմի փորձագետներ Տադաշի Կուդոն և Միչո Իսեկին:

Աղբյուր` Փաստինֆո