Փաստ ինֆո

«6-րդ զգայարան» հաղորդման էքստրասենս Անի Մաջնունյանի սպանության մեջ մեղադրվող Մուշեղ Մխիթարյանին հանրային պաշտպան կտրամադրվի:

Նման խնդրանքով այսօր ամբաստանյալը դիմել է դատարանին և այն բավարարվել է դատարանի կողմից: Ուստիև՝ դատարանը կդիմի հանրային պաշտպանի գրասենյակ՝ ամբաստանյալին պաշտպանով ապահովելու համար: Հիշեցնենք, որ ամբաստանյալն ինքն էր նախկինում հանրային պաշտպանից հրաժարվել և իր պաշտպանությունն իրականացնում էր ինքնուրույն:

Այսօր դատարանը հրապարակել է գործով առանցքային վկա Աննա Միսակյանի ցուցմունքները որոշ դրվագներ: Ի դեպ նշեք, որ վկան ամիսներ առաջ մահացել է:

Այսպիսով, ըստ հրապարակված նյութերի, երբ քննիչը նրան ցույց է տվել ամբաստանյալ Մուշեղ Մխիթարյանի բնակարանից հայտնաբերված դանակն ու գրտնակը, վկան դրանք ճանաչել է և ասել, որ դրանք դեպքի օրը եղել են Մուշեղ Մխիթարյանի մոտ, այնուհետև մնացել են իր պայուսակում:

Քրեական գործով իրեղեն ապացույց է ճանաչվել նաև այն գումարը, որը և հայտնաբերվել է էքստրասենսի բնակարանից:

Հրապարկված ապացույցի վերաբերյալ ամբաստանյալը հայտարարել է՝ եթե ինքը սպանությունը կատարեր գումարի համար, ապա սպանությունից հետո այդ գումարն Մաջնունյանի բնակարանում չէր հայտնաբերվի, ինքն իր հետ կտաներ:

Ավելին՝ ամբաստանյալը նաև հավելել է, որ Մաջնունյանի հետ մտերիմ է եղել և իմացել է, որ գումար ունի, իսկ թե որքան՝ այդ մասին տեղյակ չի եղել:

Դատարանը հետազոտել է նաև հեռախոսազանգերի վերծանումները, ըստ որոնց՝ սպանության օրը Անի Մաջնունյանը չորս անգամ զանգահարել է Մուշեղ Մխիթարյանին, իսկ նրանց վերջին խոսակցությունը տևել է 21 րոպե:

Ըստ մեղադրանքի՝ Մուշեղ Մխիթարյանն ապօրինաբար Անի Մաջնունյանին դիտավորությամբ կյանքից զրկել է, որը զուգորդվել է ավազակությամբ:

Նրան մեղադրանք է առաջադրվել ՀՀ քրեական օրենսգրքի 104-րդ հոդվածի 2-րդ մասի 8-րդ կետով և որպես խափանման միջոց է կիրառվել կալանավորումը։

Ավելի վաղ տեղեկացրել էինք, որ Անի Մաջնունյանի գլխի, դեմքի, պարանոցի, կրծքավանդակի, որովայնի, զույգ վերին և ձախ ստորին վերջույթների շրջաններում հայտնաբերվել է ծակած-կտրած և կտրած, թափանցող և չթափանցող 59 վնասվածք, որոնք էլ իրենց համակցության մեջ առաջացրել են հեմոռագիկ շոկ, որն էլ բերել է Ա.Մաջնունյանի մահվան։

Ավելի վաղ Քննչական կոմիտեն տեղեկացրել էր, որ ձեռք բերված ապացույցների համաձայն՝ Ա.Մաջնունյանի տանն առկա գումարը հափշտակելու դիտավորությամբ տղամարդը բնակարանի ննջասենյակում հարձակվել է Անի Մաջնունյանի վրա և դանակով, բութ առարկայով բազմաթիվ հարվածներ հասցրել նրա մարմնի տարբեր մասերին։

Ըստ քննության տվյալների՝ բնակարանում փնտրելով ու չկարողանալով գտնել Ա.Մաջնունյանի կուտակած գումարը՝ Մ.Մխիթարյանը հափշտակել է տարբեր զարդեր, տուժողի բջջային հեռախոսները, փակել է դուռը և հեռացել։

Աղբյուր` Փաստինֆո