Փաստ ինֆո

«Զինված խմբի» գործով դատավարությունն այսօր առատ էր դատական սանկցիաներով: Նախ գործով նախագահող դատավորը երեք դատական սանկցիա կիրառեց ամբաստանյալ Վահան Շիրխանյանի հանդեպ՝ ընդհուպ մինչև նրան երեք ժամով դատական նիստերի դահլիճից հեռացնելը:

Պատճառն այն էր, որ ֆիզիկապես ոտքի կանգնելու հնարավորություն չունեցող ամբաստանյալը ոտքի չէր կանգնում, երբ դատարանը մտնում էր նիստերի դահլիճ:

Պաշտպանյալի հանդեպ կիրառված սանկցիաներից հետո հերթը հասավ նաև նրա պաշտպան, փաստաբան Հայկ Ալումյանին:

Դատարանի գնահատմամբ, Հայկ Ալումյանը անհարգալից վերաբերմունք է դրսևորել դատարանի նկատմամբ՝ առանց նախազգուշացնելու հեռանալով դատական նիստերի դահլիճից:

Մեղադրողն իր հերթին միջնորդեց դատական սանկցիա կիրառել Հայկ Ալումյանի նկատմամբ, ինչի դեմ առարկեցին բոլոր պաշտպանները: Վերջիններս հայտարարեցին՝ Վ.Շիրխանյանը չի թույլատրել իր պաշտպանին իր բացակայությամբ մասնակցել դատական նիստին, ուստի Հայկ Ալումյանն իր պաշտպանյալի շահերից ելնելով՝ հեռացել է դատարանի դահլիճից:

Դատարանն էլ ավելի առաջ գնաց ու հայտարարեց, որ Վահան Շիրխանյանի՝ երեք ժամով հեռացված լինելու պարագայում պարտադիր է նրա պաշտպանի մասնակցությունը, ուստի որոշեց գործում հանրային պաշտպան ներգրավել՝ որպես Վահան Շիրխանյանի պաշտպան:

Պաշտպանները առարկեցին դրա դեմ՝ հայտարարելով, որ հանրային պաշտպան կարող է ներգրավվել ամբաստանյալի ցանկությամբ, կամարտահայտությամբ այն էլ այն դեպքում, երբ նա պաշտպան չունի:

Պաշտպան Ինեսսա Պետրոսյանն էլ իր հերթին դատարանի ուշադրությունը հրավիրեց այն հանգամանքի վրա, որ եթե Շիրխանյանն ունի առողջական խնդիրներ, պետք է հնարավորություն տրվի, որ նա նստած մասնակցի դատական նիստին: Ըստ փաստաբանի, արհեստական խոչընդոտներ են ստեղծվում մի մարդու նկատմամբ, ով չի կարողանում կանգնել, ում աթոռով բերում են ու աթոռով տանում, դժվարությամբ են ներկայացնում: Այդ բոլորն տեսանելի է, այդ ամեն ինչն արդեն ձևական բնույթ է կրում, տանում է դեպի փակուղի, նշեց Ինեսսա Պետրոսյանը:

Մրցակից՝ մեղադրող կողմը պաշտպանների առարկություններն ու փաստարկները գնահատեց որպես էմոցիոնալ ելույթներ: Ըստ մեղադրողի, քանի որ փորձաքննության եզրակացության մեջ չի նշված, որ Վահան Շիրխանյանը չի կարող կանգնել, հետևաբար՝ ինքը պետք է կանգնի:

Այս դիտարկմանն արձագանքեց պաշտպան Հովիկ Արսենյանը՝ նշելով, որ լինում են շատ նիստեր, որտեղ որ եզրակացություն չկա, բայց ամբաստանյալի առողջական վիճակից ելնելով նրան թույլ են տալիս նստած մնալ:

Դատավոր Արմեն Բեկթաշյանը նորից ու նորից կրկնում էր, որ գործում կա երկրորդ կարգի հաշմանդամ, որը ոտքի է կանգնում, Վահան Շիրխանյանն ինչո՞ւ չպետք է կանգնի:

Սանկցիաների արշավն հանգեցրեց նրան, որ դատարանն այսօր քննության առավ միայն մեկ միջնորդություն՝ ամբաստանյալ Վահագն Սալնազարյանի պաշտպան Մնացական Ղազարյանի միջնորդությունը իր պաշտպանյալի նկատմամբ կալանավորումը գրավով փոխարինելու մասին՝ միջնորդությունը մերժվեց:

Փոխարենը դատարանը որոշեց դիմել Փաստաբանների պալատին՝ «բնականոն ընթացքին խոչընդոտելու համար» ամբաստանյալ Վահան Շիրխանյանի պաշտպան Հայկ Ալումյանին պատասխանատվության ենթարկելու համար:

Դատարանը որոշեց նաև դիմել Հանրային պաշտպանի գրասենյակին՝ Վահան Շիրխանյանի պաշտպանությունն իրականացնելու համար հանրային պաշտպան ներգրավելու համար:

Լուսանկարը՝ 168.am-ի

Աղբյուր` Փաստինֆո