Փաստ ինֆո

ՀՀ հատուկ քննչական ծառայությունը տեղեկացնում է, որ 2016 թվականի հուլիսի 29-ի լույս 30-ի գիշերը Երևան քաղաքի Սարի թաղում տեղի ունեցած դեպքերի վերաբերյալ ՀՀ հատուկ քննչական ծառայությունում քննվող քրեական գործի նախաքննության ընթացքում իրականացված քննչական և դատավարական գործողությունների արդյունքում հիմնավորվել է, որ Երևանի բնակիչ Սարգիս Սահակյանը խոչընդոտել է «1in.am»  էլեկտրոնային լրատվական կայքի լրագրող-օպերատոր Դավիթ Հարությունյանի մասնագիտական օրինական գործունեությանը և կոտրել վերջինիս տեսախցիկը: Այս մասին հայտնում է ՀՔԾ լրատվական ծառայությունը:

Կատարված նախաքննությամբ պարզվել է, որ Սարգիս Սահակյանը, 2016 թվականի հուլիսի 29-ին՝ ժամը 22:00-ի սահմաններում գտնվելով Երևան քաղաքի Սարի թաղի Գլինկայի փողոցում, նկատել է, որ իրեն տեսանկարահանում է լրագրողական անվանաքարտ (բեյջ) կրող «1in.am» լրատվական կայքի լրագրող-օպերատոր Դավիթ Հարությունյանը: Այդ պատճառով մոտեցել և վերջինիս ձեռքից խլել է «Sony» ապրանքանիշի` «HXR-NX3» մոդելի թվային տեսախցիկն իր մոնոպոդ սարքով (շտատիվ): Սարգիս Սահակյանը գետնին հարվածելով կոտրել է «1in.am»-ին պատկանող 920.000 ՀՀ դրամ արժողությամբ տեսախցիկն ու 152.000 ՀՀ դրամ արժողությամբ մոնոպոդ սարքը` հիշյալ կայքին պատճառելով 1.072.000 ՀՀ դրամի խոշոր չափի գույքային վնաս:

Վերը նշված հանցավոր արարքների` լրագրողի մասնագիտական օրինական գործունեությանը խոչընդոտելու, նրա գույքը դիտավորությամբ վնասելու և այդ կերպ խոշոր չափերի գույքային վնաս պատճառելու համար Ս. Սահակյանին մեղադրանք է առաջադրվել ՀՀ քրեական օրենսգրքի 164-րդ հոդվածի 1-ին մասով և 185-րդ հոդվածի 2-րդ մասի 2-րդ կետով:

Մեղադրյալ Սարգիս Սահակյանի վերաբերյալ անջատված քրեական գործի նախաքննությունն ավարտվել է: Գործը մեղադրական եզրակացությամբ հանձնվել է դատավարական հսկողություն իրականացնող դատախազին` այն հաստատելու և դատարան ուղարկելու համար:

Աղբյուր` Փաստինֆո